कर्ज काढून सोनं घेऊन जंगलात पुरण्याचा डेंजर ट्रेंड, बँकिंग लॉबीने दिला सावधानतेचा इशारा; ₹96.2 कोटी गायब
यासंदर्भात आता बँकिंग लॉबीने एक निवेदन जारी केलं असून आकडेवारीच समोर ठेवली आहे. नेमका हा सारा प्रकार आहे काय जाणून घ्या सविस्तपणे आणि लोक खरोखर असं का करत आहेत ते ही जाणून घ्या...
भारतात दसऱ्याच्या आठवड्यामध्ये सोन्याच्या दरात मोठी घसरण झाल्याचं पाहायला मिळत आहे. खरं तर सोन्याच्या चकाकीचं आकर्षण केवळ भारतात नाही तर जगभरातील सर्वच देशांमध्ये आहे. मात्र याच चकाकत्या धातूच्या मोह दाखवून विचित्र पद्धतीने आर्थिक फसवणूक केली जात असल्याचा प्रकार उत्तर युरोपातील एका सुंदर, समृद्ध आणि विकसित देशात समोर आला आहे. या देशातील बँकिंग क्षेत्रातील तज्ज्ञांनी सदर घोटाळ्याप्रकरणी इशाराच जारी केला आहे.
कोणत्या देशात घडतोय हा प्रकार?
ज्या देशात हा प्रकार घडतोय त्याचं नाव आहे नॉर्वे! येथील बँकिंग क्षेत्रातील एका लॉबीने, काही भामट्यांनी देशातील नागरिकांना सोने खरेदी करायला लावून त्यांना गंडवल्याचं म्हटलं आहे. आधी सोनं खरेदी करायला लावून नंतर ते जंगलात सोडून देण्यास प्रवृत्त करण्यात आल्याचा दावा या बँकिंग लॉबीने केलाय. असा प्रकार अनेकांसोबत घडला असून हा एक गुंतवणूक फसवणुकीचा ट्रेंड असल्याच सांगण्यात आलं आहे. या इन्व्हेस्टमेंट फ्रॉडपासून सावध राहण्याचं आवाहन करण्यात आलं आहे.
सोनं उघड्यावर ठेवण्यासाठी काय सांगितलं जातं?
'फिनान्स नॉर्गे' या बँकिंग लॉबीने गुरुवारी एका निवेदन जारी केलं आहे. या निवेदनामध्ये अनेक बँक ग्राहकांनी सोने खरेदी करण्यासाठी मोठी रक्कम खर्च केल्याचं म्हटलं आहे. म्हणजेच हे लोक बँकेकडून कर्ज घेतात आणि त्यानंतर त्यामधून सोनं खरेदी करतात. पण नंतर ते सोनं जंगलात किंवा मोकळ्या निसर्गरम्य ठिकाणी सोडून देण्यास सांगितलं जातं. अनेकजण खरोखर असं करतात. "सोन्याचे मूल्य वाढत असतल्याने तुम्ही ते संभाळत बसण्यापेक्षा असं उघड्यावर ठेवलं तर इतर कोणीतरी ते सुरक्षित ठेवेल," असं या लोकांना सांगण्यात आल्याचा दावा करण्यात आला आहे. मात्र, ज्या ठिकाणी हे सोनं लोकांनी पुरलं, सोडलं तिथून ते सोनं चोरीला गेलं.
कोणकोणत्या शहरांमध्ये घडला असा प्रकार?
'फिनान्स नॉर्गे'च्या म्हणण्यानुसार, फसवणुकीच्या ज्या तीन प्रकारांबाबत बँका सध्या विशेष सावधगिरी बाळगण्याचा इशारा देत आहेत, त्यामध्ये या सोनं मोकळ्या जागी सोडून देण्याच्या प्रकाराचाही समावेश आहे. 'फिनान्स नॉर्गे'मधील फसवणूकविरोधी विभागाच्या संचालक, ग्राय नेरगार्ड यांनी 'ब्लुमबर्ग'शी यासंदर्भात चर्चा केली. अशा प्रकारची पहिली घटना स्प्रींग सीझन (वसंत ऋतूमध्ये) समोर आली होती, असं नेरगार्ड म्हणाल्या. ओस्लो आणि आसपासच्या शहरांमध्ये, तसेच पश्चिम किनारपट्टीवरील बर्गन शहरातही अशा घटना घडल्याचं सांगितलं.
96.2 कोटी रुपयांचं नुकसान
गेल्या वर्षी नॉर्वेमधील बँका आणि त्यांच्या ग्राहकांना आर्थिक फसवणुकीमुळे 962 दशलक्ष क्रोनर (सुमारे 100 दशलक्ष डॉलर्स) (भारतीय चलनानुसार 96.2 कोटी रुपये) इतके नुकसान सोसावे लागल्याचं 'फिनान्स नॉर्गे'चं म्हणणं आहे. त्याचवेळी, बँकांनी 3.5 अब्ज क्रोनरहून अधिक रकमेची फसवणूक होण्यापासून रोखल्याचा दावाही 'फिनान्स नॉर्गे'ने केला आहे.
'नो वे – यू वोंट फूल मी' मोहीम
'फिनान्स नॉर्गे'ने नॉर्वेमधील बँकांच्या सहकार्याने 'नो वे – यू वोंट फूल मी' नावाची एक जनजागृती मोहीम सुरू केली आहे. नॉर्वेच्या नागरिकांना आर्थिक फसवणुकीचे प्रकार ओळखण्यासाठी आणि त्यापासून सावध राहण्यासाठी जागरूक करण्याचा या मोहिमेचा उद्देश आहे.
