शाळेचे छत कोसळून 28 शाळकरी मुलांसह एका महिला शिक्षिकेचा मृत्यू, 40 हून अधिक जखमी

पाकिस्तानमधील पेशावर इथे हादरवणारी आणि मनं सुन्न करणारी घटना घडली आहे. दिर कॉलेज रोडवरील एका खाजगी शाळेचे छत कोसळल्यामुळे मोठी दुर्घटना घडली आहे. ही घटना घडली तेव्हा विद्यार्थी शाळेत होते. छत कोसळल्यामुळे अनेक जण अजूनही ढिगाऱ्याखाली अडकले असून मदतकार्य सुरु आहे. या भयानक दुर्घटनेत एका महिला शिक्षिकेसह  28 शाळकरी मुलांचा मृत्यू झाला आहे. तर 40 हून अधिक जण जखमी झाल्याचे वृत्त आहे.

अधिकाऱ्यांनी सांगितलं की, मृत पावलेल्या मुलांचं वय हे 13 वर्ष किंवा त्याहून कमी वयाचे होते. या अनेक मुलं जखमी झाले असून त्यापैकी काहींची प्रकृती गंभीर आहे. या भयानक दुर्घटनेमुळे रुग्णालयात आणीबाणी जाहीर करण्यात आली आहे.

दुसरीकडे शाळेचे छत कोसळल्यानंतर लष्करी जवान बचावकार्यात सामील झाले आहेक. एवढंच नाहीतर घटना समजल्यानंतर इतर मदत संस्थांची पथकंही शाळा परिसरात मदतीसाठी पोहोचले आहेत. दरम्यान, या घटनेनंतर रुग्णालयात मुलांच्या आईवडिलांचा एकच आक्रोश मनाला सुन्न करणारा आहे.

महत्त्वाचे म्हणजे एका अहवालानुसार , पाकिस्तानमध्ये छत किंवा इमारत कोसळणे ही नवी किंवा सामान्य बाब आहे. सुरक्षेची ऐसीतैसी आणि बांधकामांसाठी वापरण्यात येणाऱ्या निकृष्ट दर्जाच्या सामानामुळे यापूर्वीही अशा अनेक घटना घडल्या आहेत. गेल्या सहा महिन्यांमधील ही चौथी घटना आहे. जुलैमध्ये उमरकोटमध्ये शाळेची भिंत कोसळून तीन मुलींचा मृत्यू झाला होता. त्यानंतर जुलैमध्येच लाहोर खासगी शाळेचे छत कोसळून एका मुलाचा मृत्यू, जूनमध्ये लाहोरमध्ये शिकवणी केंद्राचे छत कोसळून 14 मुलांचा मृत्यू आणि डेरा गाझी खानमध्ये शाळेचे छत कोसळून चार मुलांचा मृत्यू झाला होता.

पंतप्रधान शाहबाज शरीफ यांनी व्यक्त केलं शोक

या घटनेनंतर पाकिस्तानचे पंतप्रधान शाहबाज शरीफ यांनी तीव्र दुःख व्यक्त केलं आहे. त्यांनी मृतांच्या कुटुंबीयांप्रती शोक व्यक्त करताना त्यांनी लिहिलंय की, या कठीण काळात त्यांना शक्ती मिळो. तसंच जखमींना लवकरात लवकर बरे होण्यासाठी मी दुर्वा करतो. त्यांनी अधिकाऱ्यांना जखमींवर सर्वोत्तम उपचार करण्याचे आणि बचावकार्य जलदगतीने करण्याचे निर्देश दिले आहेत.

राज्यपालांनी दिले चौकशीचे आदेश

खैबर पख्तुनख्वाचे राज्यपाल फैसल करीम कुंडी यांनीही अपघाताबद्दल दुःख व्यक्त करत, निष्पाप मुलांचा जीव जाणे ही एक अत्यंत दुःखद शोकांतिका आहे. दरम्यान त्यांनी अधिकाऱ्यांकडून शाळेचे छत कोसळण्याच्या घटनेबाबत सविस्तर अहवाल मागवला असून अपघाताच्या कारणांची चौकशी करण्याचे निर्देश देण्यात आले आहेत.