किचनमधील 'या' 5 गोष्टींमुळे वाढतो हृदयविकाराचा धोका, कशाप्रकारे होतं नुकसान?
Heart Care Tips : दैनंदिन सवयींचा हृदयाच्या आरोग्यावर खोलवर परिणाम होतो. किचनमधील अशा काही गोष्टी आहेत ज्यामुळे हृदयविकाराचा धोका वाढतो. तेव्हा अशा 5 गोष्टींविषयी जाणून घेऊयात.
Heart Care Tips : हृदयाशी निगडित अनेक आजारांचा धोका सध्या वाढत असून अनेक युवकांना सुद्धा हृदयविकाराचा धोका जाणवू लागला आहे. जागतिक आरोग्य संघटनेच्या मते आग्नेय आशियाई प्रदेशात हृदय आणि रक्तवाहिन्यांशी संबंधित आजारांमुळे दर मिनिटाला आठ जणांचा मृत्यू होतो आणि यापैकी निम्म्या मृत्यूंचे स्वरूप अकाली असते. आपल्या दैनंदिन सवयींचा हृदयाच्या आरोग्यावर खोलवर परिणाम होतो. आपल्या स्वयंपाकघरातच अशा काही गोष्टी असतात, ज्यांचा अतिवापर केल्यास हृदयाला हानी पोहोचू शकते.
जास्त मीठ आणि साखर :
जर जेवणात मीठ जास्त असेल तर जेवण बेचव होतं, मात्र मिठाचे सेवन जास्त वाढलं तर ब्लड प्रेशर वाढण्याचा धोका असतो. ज्यामुळे हृदयावर अतिरिक्त दबाव पडतो. त्याचप्रमाणे साखरेचे अतिसेवन वजन वाढणे, लठ्ठपणा आणि डायबेटिजचा वाढता धोका यांसारख्या समस्यांना कारणीभूत ठरू शकते ज्यामुळे पुढे हृदयविकाराचा धोकाही वाढतो.
रिफाइंड तेलाचा जास्त वापर :
सध्याच्या घडीला अनेकजण जेवणासाठी रिफाइंड तेलाचा वापर करतात. मात्र तज्ज्ञ सांगतात की गरजेपेक्षा जास्त रिफाईंड तेलाचा वापर झाल्यास शरीरात अनहेल्दी फॅट्सचं प्रमाण वाढतं आणि हृदय चांगलं राहत नाही.
मैद्याचा वापर :
मैद्यापासून बनवलेली उत्पादने आरोग्यासाठी हानिकारक ठरतात. कारण कुकीज, पास्ता, पिझ्झा किंवा ब्रेड यांसारख्या अनेक दैनंदिन खाद्यपदार्थांमध्ये याचा वापर केला जातो. मैद्याचे वारंवार आणि अतिप्रमाणात सेवन करणे संतुलित आहाराचा भाग मानले जात नाही. पचनक्रियेवर परिणाम करण्यासोबतच यामुळे हृदयाच्या आरोग्यालाही हानी पोहोचू शकते.
प्लास्टिकचे डबे :
खाण्यापिण्याच्या गोष्टींसह स्वयंपाक घरात वापरल्या जाणाऱ्या प्लास्टिक कंटेनर सुद्धा हृदयविकाराचा धोका वाढवू शकते. तज्ज्ञ गरम अन्न प्लास्टिकच्या डब्यांमध्ये दीर्घकाळ साठवून ठेवण्याच्या सवयीविरुद्ध सल्ला देतात आणि शक्य असेल तेव्हा अधिक सुरक्षित पर्याय वापरण्याची शिफारस करतात.
खाण्यापिण्याच्या सवयी सुधारा :
हृदय निरोगी ठेवण्यासाठी, दैनंदिन आहारात मीठ, साखर आणि तेलाचे प्रमाण नियंत्रित ठेवले पाहिजे. तसेच ताजे आणि पौष्टिक अन्नपदार्थांना प्राधान्य देणेही महत्त्वाचे आहे. आहारविषयक सवयींमध्ये सुधारणा करण्यासोबतच, हृदयाच्या आरोग्यासाठी दररोज शारीरिक हालचाल करणेही आवश्यक आहे.
