दुपारच्या रणरणत्या उन्हात राजगड पाहायला गेला अन् घडलं भलतंच, दोन मित्रांसोबत आलेल्या जिज्ञेशसोबत काय झालं?

पुणे जिल्ह्यातील ऐतिहासिक राजगड किल्ला चढताना 35 वर्षीय पर्यटकाचा मृत्यू झाला. जिज्ञेश सदाशिव खंडाळकर असे मृत पर्यटकाचे नाव आहे. शनिवारी दुपारी दोनच्या सुमारास पाल बुद्रुक मार्गावर ही घटना घडली.

पुण्यातील हडपसरच्या भेकराईनगरमध्ये राहणारे जिज्ञेश हे दोन मित्रांसह किल्ला पाहण्यासाठी आले होते. चढाईदरम्यान चक्कर येऊन ते बेशुद्ध पडले. हृदयविकाराचा झटका आल्याचा प्राथमिक अंदाज आहे.

मिळालेल्या माहितीनुसार,  पुणे येथून तिघेजण किल्ले राजगड पाहण्यासाठी आले होते. पद्मावती माची परिसरात आल्यानंतर त्यातील जिज्ञेश याला थकवा जाणवू लागल्याने त्याला त्याच ठिकाणी बसवून इतर दोघे जण बालेकिल्ल्याकडे गेले. काही वेळानंतर त्याला अस्वस्थ वाटू लागले. गडावर बसलेल्या इतर पर्यटकांनी त्याला सीपीआर देण्याचा प्रयत्न केला, मात्र त्याचा मृत्यू झाला होता. या घटनेची माहिती मिळताच वेल्हे पोलिस घटनास्थळी दाखल झाले. पोलिसांनी पंचनामा करून मृतदेह शवविच्छेदनासाठी पाठविला आहे. या प्रकरणी वेल्हे पोलिस ठाण्यात आकस्मिक मृत्यूची नोंद केली असून पुढील तपास वेल्हे पोलिस करीत आहेत.

दरम्यान, गेल्या काही दिवसांपासून उन्हाची तीव्रता वाढत आहे. काही जिल्ह्यांमध्ये पारा चाळीशीच्या उंबरठ्यावर आहे. पुणे जिल्ह्यातही तापमानाचा पारा चढतच आहे. ऑक्टोबर हिटची तीव्रता वाढत असताना हवामान विभागाने दुपारच्या वेळेत घराबाहेर पडणे टाळावे असं अवाहनही केलं आहे. त्यामुळं दुपारी 12 ते 4 या वेळेत घराबाहेर पडू नका. तसंच, डिहायड्रेशनपासून वाचण्यासाठी थोड्या थोड्या वेळाने पाणी पित राहा.

पुण्यातील आठ विद्यार्थ्यांचा दिवेआगर येथील समुद्रात बुडून मृत्यू

आळंदीतील आठ विद्यार्थ्यांचा दिवेआगरच्या समुद्रात बुडून मृत्यू झाल्याची घटना 1 ऑक्टोबर रोजी घडली होती. आळंदी येथील 'विनर्स अकॅडमी फॉर 11 वी-12वी सायन्स'चे विद्यार्थी होते. समुद्रात भरतीची वेळ असताना पाण्यात उतरलेल्या 8 विद्यार्थ्यांचा नाकातोंडात पाणी आणि वाळू गेल्याने करुण अंत झाला. जीवरक्षक आणि स्थानिकांनी अवघ्या पाच मिनिटांत सर्वांना बाहेर काढले, मात्र तोपर्यंत त्यांची प्राणज्योत मालवली होती.