Maharashtra Breaking News Today LIVE Updates 7 November 2026 : महाराष्ट्रासह देशभरात दिवाळीचा उत्साह पहायला मिळत आहे. बाजारपेठांमध्ये खरेदीसाठी लोकांची झुंबड उडाली आहे. लक्ष्मीपूजनच्या मुर्हतावर शेअर बाजारातील मुहूर्त ट्रेडिंगचे वेळापत्रकाकजे सर्वांचे लक्ष आहे. तर, दुसरीकडे सराफा बाजारात देखील सोनं खरेदीसाठी लगबग पहायला मिळत आहे. यासह महाराष्ट्रात मोठ्या राजकीय घडामोडी देखील घडत आहेत. गोकुळवर शासन नियुक्त 4 संचालक नेमण्याचा अध्यादेशावर राज्यपालांची स्वाक्षरी आहे. यावरुन आता आरोप प्रत्यारोप होत आहेत.
वैजापूरच्या रोहित पठारे खून प्रकरणात पोलिसांनी एकूण 10 आरोपींना अटक केलीय. किरकोळ वादातून 2 गटात वाद झाला. त्यातून रोहित पठारे याला बेदम मारहाण झाली होती. याबाबत वैजापुरात आंदोलन सुद्धा झाले होते. पोलिसांची 5 पथक आरोपीचा शोध घेत होती. त्यातून 10 आरोपींना पोलिसांनी अटक केलीय.
कर्जतच्या जंगलातील वृक्षतोडीला अभिनेते सयाजी शिंदे यांचा विरोध कायम आहे. झाडं तोडून कोणताही प्रोजेक्ट करू नका, झाडे तोडून सरकारला काय मिळणार आहे, असा सवाल सयाजी शिंदे यांनी केलाय. तसंच प्रकल्प आल्याने कुणाला काही नोक-या लागत नाही, असंही त्यांनी म्हटलंय.
येवला शहरातील अंबिया शहा कॉलनीत आग लागली आहे. गोडाऊनसह 4 ते 5 घरं आगीच्या भक्ष्यस्थानी आली आहेत. अग्निशमन दल घटनास्थळी दाखल झाले आहे. आगीवर नियंत्रण मिळवण्याचे काम सुरु आहे. आगीमुळे परिसरात धुराचे लोट पसरले आहेत.
MIM मुंब्रातील नगरसेविका सहार युनिस शेख यांनी एका स्थानिक कार्यक्रमासाठी एक दिवसाची सुरक्षा मागितलीय. कौसा परिसरात आयोजित एका सांस्कृतिक कार्यक्रमाला जाण्यासाठी सुरक्षा द्या, असं पत्र सहर शेख यांनी पोलिसांना लिहिलंय. काही दिवसांपूर्वीच सोशल मीडियाच्या माध्यमातून त्यांना धमकी आली होती. सुरक्षेचा कोणताही धोका निर्माण होऊ नये आणि खबरदारीचा उपाय म्हणून सुरक्षा द्या, अशी मागमी या पत्रातून करण्यात आलीय.
मालेगावच्या सटाणामध्ये बनावट नोटा देऊन एका व्यक्तीची फसवणूक करण्यात आली. संभाजीनगरच्या एका व्यक्तीला ३० हजार रुपयांच्या खऱ्या नोटांच्या बदल्यात ३ लाख रुपयांच्या नोटा देण्यात आल्या. मात्र या नोटा बनावट असल्याचं त्याचा लक्षात आल्यानं त्यानं आरोपीचा पाठलाग करण्याचा प्रयत्न केला. मात्र आरोपीनं कोयत्या धाक दाखवून पसार होण्याचा प्रयत्न केला. दरम्यान, आरोपीचं वाहन दुभाजकावर धडकून अपघात झाला. त्यामुळे स्थानिकांनी आरोपीला पकडून पोलिसांच्या ताब्यात दिले.
चर्चगेट-विरार फास्ट लोकलमध्ये हाणामारी झाली आहे. हाणामारीदरम्यान प्रवाशी चालत्या ट्रेनमधून पडला आहे. ग्रँट रोड-मुंबई सेंट्रल स्थानकादरम्यान ही घटना घडली. लोकलचा वेग कमी असल्यानं मोठी दुर्घटना टळली आहे. घटनेचा व्हिडिओ सोशल मीडियावर व्हायरल झाला आहे. लोकलमधील प्रवाशांच्या सुरक्षेचा प्रश्न पुन्हा ऐरणीवर आला आहे. रेल्वे प्रशासन आणि रेल्वे पोलिसांच्या सुरक्षाव्यवस्थेवर प्रश्नचिन्ह उपस्थित झाले आहे. शुक्रवारी रात्री दरवाजाजवळ उभे राहण्यावरून दोन प्रवाशांमध्ये वाद झाला होता. वादाचे रूपांतर थेट मारहाणीत झाले.
दापोलीत महायुतीतील वाद पुन्हा पेटलाय. दापोलीतील एका कार्यक्रमात शिवसेना नेते रामदास कदम आणि खासदार सुनील तटकरे यांचे मेहुणे अजय बिरवटकर यांच्यात व्यासपीठावरच जोरदार शाब्दिक वाद झाला. या प्रकारानंतर बिरवटकरांनी रामदास कदमांवर पलटवार केलाय. खुर्ची तुमची असली तरी हे गाव आमचं आहे, अशा शब्दांत बिरवटकरांनी प्रत्युत्तर दिलंय
कोल्हापुरात सोमवारी समविचारी आघाडीनं मोर्चाचं आयोनज केलंय. या पार्श्वभूमीवर, शहरात बॅनरबाजी करण्यात आलीय. 'यायला लागतंय, कोल्हापूरचा संघर्ष मोर्चा', अशी टागलाईन घेऊन शहरातील विविध भागात सतेज पाटलांचे बॅनर्स लावले आहेत. सध्या या बॅनर्सची शहरात चर्चा सुरू आहे.
