दिया मिर्झा प्रकरणात हायकोर्टच्या नाराजीनंतर अमित साटमांची पहिली प्रतिक्रिया; 'तुकडे-तुकडे गँग...'

अभिनेत्री दिया मिर्झाच्या पर्यावरणपूरक दिवाळी व्हिडीओवरून सुरू झालेल्या वादात आता मुंबई भाजपचे अध्यक्ष आणि आमदार अमित साटम यांनी पहिली प्रतिक्रिया दिली आहे. मुंबई उच्च न्यायालयाने या वादावर तीव्र नाराजी व्यक्त करत राजकीय नेत्यांच्या वक्तव्यांवर प्रश्न उपस्थित केले. त्यानंतर साटम यांनी न्यायालयाचे निरीक्षण वेगळ्या संदर्भात असल्याचे सांगितले. तसेच, आपला आक्षेप कोणत्याही व्यक्तीच्या धर्म, जात, भाषा किंवा प्रांतावर नसून देशविरोधी शक्तींना पाठिंबा देणाऱ्यांवर असल्याचा दावा केला. दरम्यान, न्यायालयाने मुंबई महापालिकेला दिया मिर्झाचा हटवलेला व्हिडीओ पुन्हा अपलोड करण्यास सांगितले आहे. काय म्हणाले अमित साटम? जाणून घेऊया.

हायकोर्टाची राजकीय वक्तव्यांवर नाराजी

दिवाळीच्या काळात फटाक्यांमुळे होणारे ध्वनी आणि वायू प्रदूषण रोखण्यासाठी मुंबई उच्च न्यायालयात स्वतःहून दाखल झालेल्या जनहित याचिकेवर सुनावणी सुरू आहे. न्यायमूर्ती गिरीश कुलकर्णी आणि न्यायमूर्ती नीला गोखले यांच्या खंडपीठाने 3 नोव्हेंबर रोजी दिया मिर्झाच्या व्हिडीओवरून झालेल्या वादाबद्दल नाराजी व्यक्त केली. पर्यावरणाचा मुद्दा हा सार्वजनिक आरोग्याशी संबंधित असून त्याला धार्मिक किंवा अन्य रंग देऊ नये, असे न्यायालयाने स्पष्ट केले. भारत हा धर्मनिरपेक्ष देश असल्याचे सांगत न्यायालयाने अशा वक्तव्यांमुळे सामाजिक सलोख्याला बाधा पोहोचू नये, असेही नमूद केले.

‘न्यायालयाचे निरीक्षण वेगळ्या संदर्भात’

न्यायालयाच्या नाराजीनंतर अमित साटम यांनी माध्यमांशी बोलताना आपली भूमिका स्पष्ट केली. न्यायालयाचे निरीक्षण वेगळ्या संदर्भात होते. दिया मिर्झाच्या विशिष्ट व्हिडीओबाबत कोणतीही याचिका न्यायालयासमोर नव्हती, असे साटम म्हणाले. न्यायालयाच्या निरीक्षणांचा अभ्यास सुरू केला असल्याचेही त्यांनी सांगितले. त्यामुळे न्यायालयाच्या टिप्पणीला आपण कशा प्रकारे उत्तर देणार, याबाबत त्यांनी सविस्तर भूमिका मांडलेली नाही.

‘तुकडे-तुकडे गँग’वरील भूमिका कायम

आपला आक्षेप कोणत्याही व्यक्तीच्या धर्म, जात, भाषा किंवा प्रांतावर नसल्याचे साटम यांनी स्पष्ट केले. मात्र, भारतविरोधी शक्तींशी हातमिळवणी करणाऱ्या, ‘तुकडे-तुकडे गँग’ला सहानुभूती दाखवणाऱ्या आणि देशात अराजकता पसरवणाऱ्यांना पाठिंबा देणाऱ्यांविरोधात आपली भूमिका कायम असल्याचे त्यांनी म्हटले.

महापालिकेच्या समन्वयावर सवाल

दिया मिर्झाचा व्हिडीओ तयार करण्यापूर्वी महापालिका प्रशासनाने राजकीय पक्षांशी योग्य समन्वय साधला होता का, असा मुद्दाही साटम यांनी उपस्थित केला. आगामी महापालिका किंवा अन्य निवडणुकांच्या पार्श्वभूमीवर कोणत्या व्यक्तींना किंवा संस्थांना जनजागृती मोहिमेत सहभागी करून घ्यायचे, याचा आधी अभ्यास करायला हवा. ग्राउंड लेव्हलवर योग्य समन्वय आणि नियोजन झाले, तर भविष्यात असे वाद टाळता येतील, असे ते म्हणाले.

व्हिडीओ पुन्हा अपलोड करण्याचे निर्देश

मुंबई महापालिकेने पर्यावरणपूरक दिवाळी मोहिमेसाठी दिया मिर्झासह काही प्रसिद्ध व्यक्तींचे व्हिडीओ तयार केले होते. न्यायालयाच्या सूचनेनुसार या मोहिमेत कलाकारांनी विनामूल्य जनजागृती संदेश दिले होते. मात्र, अमित साटम यांनी आक्षेप घेतल्यानंतर दिया मिर्झाचा व्हिडीओ महापालिकेच्या सोशल मीडिया खात्यांवरून हटवण्यात आला. इतर कलाकारांचे व्हिडीओ मात्र उपलब्ध राहिले. यावर न्यायालयाने नाराजी व्यक्त करत हटवलेला व्हिडीओ पुन्हा अपलोड करण्यास सांगितले. त्यामुळे आता महापालिका प्रशासन याबाबत काय निर्णय घेते, याकडे लक्ष लागले आहे.