'धंगेकर तुमची कुवत आणि औकाद काय', प्रवीण दरेकर संतापले, 'फडणवीसांवर बोलताना भान ठेवा, शिंदेंनी विचार करावा तुमची...'

विधानपरिषदेच्या पदवीधर व शिक्षक मतदारसंघातील निवडणुकीचे निकाल लागल्यानंतर महायुतीमधील मतभेद समोर येत आहेत. शिवसेना नेते रवींद्र धंगेकर यांनी पुण्यात घेतलेल्या भूमिका आणि विधानांवरुन भाजपा नेते प्रवीण दरेकर यांनी संताप व्यक्त केला आहे. धंगेकरांसारख्या फुटकळ लोकांच्या वक्तव्याला आम्ही भीक घात नाही. सूर्यावर कितीही थुंकला तरी फरक पडत नाही. उलट तुमचंच तोडं भाजेल अशा शब्दांत त्यांनी टीका केली आहे. रवींद्र धंगेकरांची पक्षविरोधी भूमिका घेऊन आधी पाठिंबा जाहीर करणं आणि विजय झाल्यानंतर आनंद व्यक्त करणं इतकी हिंमत आहे का? अशी विचारणाही त्यांनी केली आहे. एकनाथ शिंदेंच्या पक्षाने आपली भूमिका माध्यमांच्या माध्यमातून अतातायीपणे मांडू नये जेणेकरुन महायुतीत वितुष्ट होणार नाही असं ते म्हणाले आहेत.

महायुती न पाळल्याचा आरोप

"मैत्रीपूर्ण लढत केली इथपर्यंत ठीक आहे. पण मित्रपक्षाला एनडीएच्या उमेदवाराला पराभूत करण्याचं काम आमच्या युतीपक्षाने केलं आहे. हे स्पष्ट आहे कारण रवींद्र धंगेकर यांनी निवडणुकीपूर्वी आवाहन केलं आहे आणि जिंकल्यावर प्रतिक्रिया दिली आहे. पक्षाचा महत्त्वाचा नेता अशी भूमिका घेतो आणि हे वरुन आदेश आल्याशिवाय होत नाही. त्यामुळे याचं अवलोकन करता शिंदेंनी लक्ष घातलं पाहिजे," अशी मागणी त्यांनी केली आहे.

हे शेख चिल्लीसारखं आहे

"आमच्या बाजूने प्रदेशाध्यक्ष बैठक घेऊन आत्मचिंतन करतील. कारवाईची अपेक्षा आहे तिथे करतील. आमचा पक्ष समजून घेऊन दुरुस्त होणारा पक्ष आहे. पण महायुतीत राहून महायुतीचे पाय तोडायचे हे शेख चिल्लीसारखं आहे. फांदीवर बसायचं आणि आपलीच फांदी तोडायची. आपला कडेलोट होतोय याचंही भान शेख चिल्लीला नसतं, तसं होऊ नये," असा टोला त्यांनी लगावला आहे.

धंगेकरांची इतकी हिंमत आहे का?

"रवींद्र धंगेकरांनी पक्षविरोधी भूमिका घेऊन आधी पाठिंबा जाहीर करणं आणि विजय झाल्यानंतर आनंद व्यक्त करणं इतकी हिंमत आहे का? दुपारी एकजण, संध्याकाळी एकजण बोलणार. तुझं माझं जमेना आणि तुझ्यावाचून करमेना असं सुरु आहे. एकमेकांसोबत राहायचं आणि टीकाही करायची हे लोकांना आवडत नाही. हे योग्यही नाही. महायुतीत समन्वायतून वागली पाहिजे. क्रियाला प्रतिक्रिया मिळत असते. जर शिंदेसनेने अशा प्रकारची भूमिका घतेली तर भाजपाचे कार्यकर्ते ती मानणार नाही, त्यातून प्रतिक्रिया आली तर महायुतीचं वातावरण खराब होईल याची दक्षता सर्वांनी घ्यावी. महायुती म्हणून निवडून दिलं आहे याची जाण ठेवावी," असा सल्ला त्यांनी दिला आहे.

धंगेकर तुमची कुवत काय, तुमची औकाद काय?

"धंगेकरांच्या पोटातील ओठावर रोज येतं.. प्रत्येक पक्षाला आपला नेता मुख्यमंत्री व्हावंसं वाटतं. पण धंगेकर तुमची कुवत काय, तुमची औकाद काय? देवेंद्रजींचं नेतृत्व महारा्ट्राला माहिती आहे. महाराष्ट्र आज विकसित होत असून, अनेक योजना येत आहेत. कधी नव्हे ते महाराष्ट्र इतका पुढे जात आहे. पण त्यांच्याबाबत पोटात इतकी मळमळ, तिरसस्कर आहे की फिरुन त्यांच्या नेतृत्तावर येता. पण धंगेकरांसारख्या फुटकळ लोकांच्या वक्तव्याला आम्ही भीक घात नाही. सूर्यावर कितीही थुंकला तरी फरक पडत नाही. उलटत तुमचंच तोडं भाजेल," असा इशाराच त्यांनी दिला आहे.

"फडणवीसांवर बोलताना आपण महायुतीचा भाग आहोत याचं भान ठेवा. आम्ही कधीच तुमच्या नेतृत्वावर बोललो नाही. तुमची इच्छा काय आहे ती राहू द्या, पण फडणवीसांच्या लोकप्रिय नेतृत्वावर शिंतोडे उडवणार असाल तर खपवून घेणार नाही. शिंदेंनी याचा विचार केला पाहिजे. या वक्तव्याला पक्षाची संमती आहे का, ही पक्षाची अधिकृत भूमिका आहे का हे सांगितलं आहे. धंगेकर अधिकृत जबाबदार नेता वाटत नाही," असा टोला त्यांनी लगावला आहे.

भाजपा थिल्लर उचापती करणारा पक्ष नसून विचार करुन पावलं टाकणारा आहे. भाजपा आगतिक आणि टोकाची भूमिका घेत नाही. पण सातत्याने गृहित धरणार असाल तर त्याच पद्दतीने विचार करायला मागे पुढे पाहणार नाही असा इशाराही त्यांनी दिला आहे.