SOCIAL MEDIA

Newsletter

PARTNER SITES
Select Language Select State

जर मुंबई VIP साठी स्वच्छ करु शकता, मग सर्वसामान्यांसाठी का नाही? मुंबई हायकोर्टाने BMC ला सुनावलं

मुंबई स्वच्छ ठेवण्याबाबत मुंबई महापालिकेच्या (BMC) निवडक दृष्टिकोनावर मुंबई उच्च न्यायालयाने प्रश्नचिन्ह उपस्थित केलं आहे. केवळ व्हीआयपी (VIP) भेटींच्या वेळीच रस्ते का धुतले जातात? अशी विचारणा मुंबई उच्च न्यायालयाने केली आहे.

Reported By Shivraj Yadav Written By Shivraj Yadav
Published: Nov 19, 2026, 14:56 IST | Updated: Nov 19, 2026, 15:09 IST
Image Credit: मुंबई हायकोर्टाने BMC ला सुनावलं
Join

फक्त व्हीआयपी (VIP) व्यक्तींच्या भेटीच्या वेळीच मुंबईतील रस्ते आणि सार्वजनिक जागांची स्वच्छता आणि सुशोभीकरण का केलं जातं? अशी विचारणा मुंबई उच्च न्यायालयाने केली आहे. मुंबई महापालिकेच्या कारभारावर नाराजी व्यक्त करताना उच्च न्यायालयाने सामान्य नागरिकांसाठीही वर्षभर अशाच प्रकारची स्वच्छता राखली जावी असे निर्देश दिले आहेत. न्यायमूर्ती गिरीश कुलकर्णी आणि न्यायमूर्ती नीला गोखले यांच्या खंडपीठाने सार्वजनिक जागांच्या देखभालीबाबत पालिकेच्या दृष्टिकोनावर ताशेरे ओढले.

न्यायाधीशांनी यावेळी दक्षिण मुंबईतील 'बॅलार्ड इस्टेट'चे उदाहरण दिले. ब्रिटनचे राजकुमार विल्यम आणि राजकुमारी कॅथरीन यांच्या भारत भेटीच्या पार्श्वभूमीवर हा परिसर स्वच्छ करून पाण्याने धुवून काढण्यात आला होता. "बॅलार्ड इस्टेटकडे पहा. ते किती चकाकत आहे! काही महत्त्वाचे पाहुणे येणार आहेत म्हणून तुम्ही रस्ते पाण्याने धुवून स्वच्छ केलेत. मग मुंबईकरांना असे रस्ते का मिळू नयेत?," अशी विचारणा कोर्टाने केली आहे.

प्रिन्स विल्यम आणि राजकुमारी कॅथरीन तीन दिवसांच्या भारत दौऱ्यावर आहेत. बॅलार्ड इस्टेटला भेट देत त्यांनी आपल्या दौऱ्याला सुरुवात केली. तिथे त्यांनी क्रिकेटपटू सचिन तेंडुलकर आणि स्थानिक मुलांसोबत 'गल्ली क्रिकेट' खेळले. हा कार्यक्रम वसाहतकालीन इमारती, झाडांनी वेढलेले रस्ते आणि नव्याने स्वच्छ केलेल्या मार्गांच्या पार्श्वभूमीवर पार पडला. या शाही भेटीच्या निमित्ताने, बीएमसीने (BMC) रस्त्यांचे काही भाग पांढऱ्या कापडाने झाकून ठेवले होते.

न्यायालयाने म्हटले की, सार्वजनिक रस्त्यांवर साचलेल्या कचऱ्याच्या समस्येवर घटनात्मक न्यायालयाला लक्ष घालावं लागणं ही दुर्दैवी बाब आहे. तसंच, महत्त्वाच्या व्यक्तींच्या भेटीदरम्यान बीएमसी ज्या प्रकारे स्वच्छता राखते, तशीच स्वच्छता सामान्य नागरिकांसाठी का राखली जात नाही, असा प्रश्नही न्यायालयाने उपस्थित केला.

न्यायापीठाने टिप्पणी केली, "जेव्हा शहरात महत्त्वाच्या व्यक्ती येतात, तेव्हा बीएमसी रस्ते चकाचक करते. मग शहरात राहणाऱ्या नागरिकांसाठी ही स्वच्छता नेहमी का राखली जाऊ शकत नाही? रस्ते स्वच्छ आणि नीटनेटके आहेत असे दाखवण्यासाठी केवळ दोन दिवसांचा तात्पुरता देखावा करण्याऐवजी, बीएमसीने कायमस्वरूपी स्वच्छता का ठेवू नये?"

स्वच्छता केवळ व्हीआयपी भेट देतात अशा भागांपुरतीच मर्यादित न राहता, ती शहरातील प्रत्येक प्रभागात सुनिश्चित केली जाणे आवश्यक आहे. न्यायालयाने असेही निरीक्षण नोंदवले की, जर राज्य सरकार आणि महानगरपालिका प्रशासनाने कृती करण्याची इच्छाशक्ती दाखवली, तर ते शहरात मोठा सकारात्मक बदल घडवून आणू शकतात.

मुंबईच्या पूर्व उपनगरातील कांजूरमार्ग डम्पिंग ग्राऊंडच्या परिसरात वायू प्रदूषण आणि विषारी वायूंच्या उत्सर्जनाबाबत चिंता व्यक्त करणारी याचिका सुनावणीसाठी आली असता, न्यायालयाने हे भाष्य केलं.
 

Add Zee News as a Preferred Source
TAGS:

About the Author

शिवराज यादव झी 24 तास डिजिटलमध्ये सीनिअर सब एडिटर म्हणून कार्यरत आहेत. राज्यासह देश, विदेशातील चालू घडामोडींसह राजकीय, गुन्हेगारी विषयांवरील लिखाण ते करतात. हे लिखाण करताना ते सखोल पद्धतीने करण्याकडे कल असतो. वाचकाला बातमी अत्यंत सहजपणे समजावी यासाठी ती समजेल अशा पद्धतीने लिहितात. याशिवाय क्रीडा, मनोरंजन यांचीही आवड असल्याने त्या क्षेत्राशी संबंधित घडामोडींवरही लिखाण करतात.करिअरशिवराज यांनी 2009 मध्ये आपल्या पत्रकारितेतील करिअरला सुरुवात केली. सर्वात आधी Fotocorp संस्थेत कॅप्शन रायटर म्हणून काम केल्यानंतर पुढील 7 वर्ष त्यांनी टीव्हीमध्ये प्रदीर्घ अनुभव घेतला. लोकमतमधून ऑनलाइन पत्रकारितेला त्यांनी सुरुवात केली. त्यानंतर लोकसत्ता आणि सध्या झी 24 तास अशाप्रकारे त्यांच्याकडे 9 वर्षांचा अनुभव आहे.शैक्षणिक पार्श्वभूमीशिवराज यादव यांनी मुंबईतच आपलं शिक्षण पूर्ण केलं. मुंबई विद्यापीठ मान्यताप्राप्त एमडी कॉलेजमध्ये त्यांनी आर्टसमधून 12 वी उत्तीर्ण केली. यानंतर पुढील 3 वर्षं BMM मधून शिक्षण घेत पत्रकारितेत पदवी घेतली. यादरम्यान बातम्यांचं जग, त्याची समाजाला असणारी गरज आणि त्याचं महत्व याबद्दल चांगली समज निर्माण झाली.लेखन शैली आणि दृष्टीकोणशिवराज यांचं म्हणणं आहे की, प्रत्येक व्यक्तीला आपल्या आजुबाजूला तसंच देश, विदेशात नेमक्या कोणत्या घडामोडी घडत आहेत हे माहिती असलं पाहिजे. ही जबाबदारी माध्यमांवर जास्त असून, त्यांनी ती अवितरपणे पार पडली पाहिजे. प्रत्येक माहिती जशीच्या तशी वाचकांपर्यंत पोहोचवताना माध्यमांच्या खांद्यावर मोठी जबाबदारी असते.कोणत्या विषयांची सखोल जाणराजकीय घडामोडीचालू घडामोडीमनोरंजनक्रीडा
Read More

ZEENEWS TRENDING STORIES