SOCIAL MEDIA

Newsletter

PARTNER SITES
Select Language Select State

'भाजपला खाजच असेल, बाबासाहेबांबद्दल आदर असेल तर...', शिंदेंच्या उपनेत्याचा हल्लाबोल; दादरचं नाव 'चैत्यभूमी' करण्यावरून महायुतीतच मतभेद! 'बाळासाहेबांनी हा डाव हाणून...'

" म-हाठी माणसांनी आपसात डोकी फोडली की आणि भाजप मनोमन खूश होऊन रेशीमबागेत नाचणार. म-हाठी व्होटबँक फोडली म्हणून नाचणार," असं म्हणत भाजपावर निशाणा साधण्यात आलाय.

Reported By Swapnil Ghangale Written By Swapnil Ghangale
Published: Nov 19, 2026, 10:55 IST | Updated: Nov 19, 2026, 11:30 IST
Image Credit: महायुतीमध्येच दादरच्या नामांतरणावरुन मतभेद (प्रातिनिधिक फोटो)
Join

दादर स्टेशनचं नाव 'चैत्यभूमी' करण्याच्या मुद्द्यावरून आता महायुतीमध्येच दोन गट पडल्याचं चित्र दिसत आहे. तीन वर्षांपूर्वी म्हणजेच 2023 मध्ये उद्धव ठाकरेंच्या पक्षाला सोडचिठ्ठी देऊन उपमुख्यमंत्री एकनाथ शिंदेंच्या पक्षात प्रवेश करणारे माजी आमदार आणि शिंदेंच्या शिवसेनेचे उपनेते शिशिर शिंदे यांनी या प्रस्तावाला विरोध करताना थेट मित्रपक्ष असलेल्या भारतीय जनता पार्टीवर निशाणा साधला आहे.

भाजपाकडून मतांचं राजकारण करत ध्रुवीकरण

"महाराष्ट्र भाजपच्या महाराष्ट्राच्या शीर्षस्थ नेतृत्वाने-थिंकटँकने आधी मुंबईत कबूतरबाजीवरुन वाद पेटवला. मराठी विरुद्ध गुजराती/जैन समाज असा वाद भडकावला आणि मतांचं राजकारण करत ध्रुवीकरण केलं. नंतर छटपूजेवरुन वातावरण भडकवत मराठी विरुद्ध बिहारी/उत्तर भारतीय वाद पेटवला. छट उत्सवानंतर मुंबईतील बिहारी/भैय्यांनी मराठी माणसाला हिणवलं. पाणउतारा करत मराठी माणूस कोपऱ्यात ढकलला. सोशल मिडियावरुन मराठी माणसाविरुद्ध विषारी गरळ ठरवून सामूहिकपणे ओकली. आव्हाने दिली. मराठी माणसाला हिणवलं. पण मराठी माणसाने संयम दाखवला. मराठी समाज त्यांचा कावा ओळखून शांत बसला. भाजपने स्वतःची व्होटबँक मजबूत केली. पण मराठी अस्मिता जखमी केली. भाजपने मौनव्रत स्वीकारत मराठी माणसाला अपमानित केलं. एकटं पाडलं," असा घणाघात शिशिर शिंदेंनी केला आहे. एवढ्यावरच न थांबताना, "आता दादरचे नाव बदलून “चैत्यभूमी” नामकरणाची उबळ या भिक्कार भाजपला आली," असं शिशीर शिंदे म्हणालेत.

...आणि परप्रांतीयप्रेमी भाजप मिठाई वाटणार

"म्हणजे म-हाठींमधेच फूट पाडून मुंबईसह महाराष्ट्रात रस्त्यावर मराठी माणसांमध्येच आपसांत संघर्ष या भाजपला  घडवायचा आहे. म-हाठी माणसांनी आपसात डोकी फोडली की आणि भाजप मनोमन खूश होऊन रेशीमबागेत नाचणार. म-हाठी व्होटबँक फोडली म्हणून नाचणार. पोलिस ॲक्शन जोरदार होणार. पोलिस दडपशाहीने तुरुंगात म-हाठीच तरुण जाणार. मराठी जनांचे भवितव्य पोलिसांच्या खुंटीवर टांगणार. मराठींच्या चांगल्या रोजगार संधी घालवणार. मराठी माणूस अशक्त होणार. मराठी शक्ती क्षीण होणार आणि परप्रांतीयप्रेमी भाजप मिठाई वाटणार," असं शिशीर शिंदेंनी म्हटलं आहे.

नक्की वाचा >>
‘राज ठाकरेंना रात्रभर...’, दादर स्टेशन नमाकरणावरुन 'मनसे जातीवादी पक्ष' म्हणत हल्लाबोल! 'हिंमत कशी..', 'हा देश बाबासाहेबांनी...'

हे मराठीद्रोही अस्वस्थ झालेत

"महामानव डॉ. बाबासाहेब आंबेडकरांचे अतिशय भव्य आणि ऐतिहासिक स्मारक इंदू मीलमध्ये पूर्णत्वास येत आहे. गेले काही वर्षे इंदू मिलमधील स्मारकाचे रखडलेले आहे. प्रत्येक मराठी माणसाला भारतरत्न बाबासाहेबांच्या स्मारकाबद्दल आपुलकी आहे. जिव्हाळा आहे. आम्ही महामानव बाबासाहेबांच्या परिपूर्ण स्मारकासाठी आतूर आहोत. महाराष्ट्राच्या कानाकोप-यातून मराठी बांधव पुढील महिन्यात श्रद्धेने महापरिनिर्वाण दिनासाठी भाजपच्या आमंत्रणाविना येणार आहे. पन्नास वर्षांपेक्षा जास्त काळापासून स्वखर्चाने बाबासाहेबांचे अनुयायी मुंबईत येतात. स्वतःची तहानभूक विसरुन महामानव बाबासाहेबांच्या स्मृतींना वंदन करतात. पददलित येथेच अन्यायाविरुद्ध लढण्याची स्फूर्ती मिळवतात. असे भाग्य संपूर्ण देशातील इतर कोणत्या भाजप नेत्याला लाभले असेल तर भाजपने जाहीर करावे. बाबासाहेबांच्या अनुयायांचा महासागर पाहून हे मराठीद्रोही अस्वस्थ झालेत," अशी टीका शिशिर शिंदेंनी केली आहे.

भाजपला खाजच असेल व खराखुरा मनापासून आदर भारतरत्न बाबासाहेबांबद्दल असेल तर...

"महाराष्ट्रात जातीभेद गाडून म-हाठी शक्ती शिवसेनाप्रमुख बाळासाहेब ठाकरेंनी एकत्र करत या वज्रमूठीला टोकदार व धारदार करत बळकट केले. दादरचे नाव बदलण्याचा घाट बाळासाहेब ठाकरेंनी यशस्वीपणे,लढाऊ बाण्याने हाणून पाडला होता.हा गौरवशाली इतिहास भाजप विसरला आहे. महाराष्ट्राच्या 1969 च्या सीमा लढ्यात नरराक्षस मोरारजी देसाईंच्या गाडीने उन्मत्तपणे दादरच्या वेशीवर शिवसैनिकांच्या अंगावर गाडी घालून त्यांना चिरडले होते. मोरारजीचा सत्तेचा माज म-हाठी माणसाने लढून उतरवला व नरराक्षस मोरारजीला मुंबईतून पिटाळून लावले. शेकडो मराठी माणसांचे रक्त मोरारजी देसाईने सांडले हाच खरा इतिहास आहे. बाळासाहेबांचे हे जन्मशताब्दी वर्ष आहे. 17 नोव्हेंबरला बाळासाहेबांचा स्मृतिदिन भावपूर्ण वातावरणात पार पडला. बाळासाहेबांचे शिवसैनिक व म-हाठी बांधव लाखोंच्या संख्येने मुंबईत रिगल थिएटरजवळील पुतळ्याला वंदन करायला आणि छत्रपती शिवाजी महाराज मैदानावर “शक्तिस्थळावर” बाळासाहेबांना अभिवादन करायला उपस्थित होते.
मुंबईत, महाराष्ट्रात आता मराठींनी आपसातच वाद-विवाद करावे प्रसंगी एकमेकांवर हिंसक प्रहार करुन मराठी आणखी कमकुवत करावी हाच कुटील डाव यामागे आहे. मुंबईतील विविध मेट्रो स्थानकांना उद्योगांचे नाव प्रथम व मूळ नाव दुय्यम स्थानी देऊन भाजपने अकलेचे दिवाळे दाखविले आहेच. भाजपला खाजच असेल व खराखुरा मनापासून आदर भारतरत्न बाबासाहेबांबद्दल असेल तर इंदू मिल येथील प्रस्तावित भारतरत्न बाबासाहेबांच्या स्मारकाच्या उद्घाटनाची तारीख जाहीर करावी," अशी मागणी शिशिर शिंदेंनी केली आहे.

हा भाजपचा हलकट प्रयत्न

"मुंबईची संपूर्ण घडी विसकटून मुंबई व राज्याचे पार वाळवंट करुन मुंबईसह महाराष्ट्र उजाड करायचा हे कारस्थान मराठी माणूस हाणून पाडेल. महाराष्ट्र कमजोर करण्याच्या प्रयत्नात “कुटील भाजपच” हद्दपार होईल हे भाजप थिंकटॅंकने लक्षात घ्यावे. 17 नोव्हेंबरला शिवसेनाप्रमुखांचा स्मृतिदिन झाला आणि 24 तास उलटायच्या आतच भाजपने ही खेळी केली. हा खरा शिवसेनाप्रमुखांचा अपमान आहे. बाळासाहेब ठाकरेंनी दादरच्या नामकरणाचा डाव हाणून पाडला होता. आज “बाळासाहेब” शरीराने भूतलावर नसतील पण जातीभेद पूर्ण गाडून बाळासाहेबांनी उभे केलेले म-हाठी बांधव हा भाजपचा हलकट प्रयत्न हाणून पाडतील व भल्याभल्यांचे तोंड जमिनीवर आपटेल हे नक्की," असा विश्वास शिशिर शिंदेंनी व्यक्त केला आहे.

Add Zee News as a Preferred Source
TAGS:

About the Author

मोजक्या शब्दांमध्ये...स्वप्निल घंगाळे हे मागील 12 वर्षांहून अधिक काळापासून डिजिटल पत्रकारितेमध्ये सक्रीय आहेत. 'महाराष्ट्र टाइम्स', 'लोकसत्ता' यासारख्या नामांकित कंपन्यांमध्ये त्यांनी यापूर्वी काम केलेलं आहे. राजकीय बातम्यांबरोबरच ताज्या घडामोडी, ट्रेण्डींग/ व्हायरल, टेक्नोलॉजी, क्रीडा, मनोरंजन अशा सर्वच क्षेत्रातील बातम्यांमध्ये हातखंडा आहे. अवांतर वाचनाबरोबरच बातम्यांव्यतिरिक्त सोशल मीडियावर लिहायची आवड आहे. फावल्या वेळात चित्रपट पाहणे, भटकंती करायला आवडतं. बातमी अचूक असावी असा त्यांचा कटाक्षाने प्रयत्न असतो. सध्या ते 'झी 24 तास'मध्ये 'डेप्युटी न्यूज एडिटर' म्हणून कार्यरत आहेत.पत्रकारितेचा श्रीगणेशास्वप्निल यांनी पत्रकारितेच्या दुसऱ्या वर्षापासूनच 'ठाणे वैभव' या ठाण्यातील स्थानिक वृत्तपत्रामध्ये शिकाऊ पत्रकार म्हणून कामाला सुरुवात केली. सांस्कृतिक आणि गुन्हेगारी यासंदर्भातील वृत्तांकन यांनी या सहा महिन्याच्या कालावधीमध्ये केलं. बीएमएमच्या तृतीय वर्षाला ठाण्यातील जोशी-बेडेकर महाविद्यालयातील 'ऋत' या पत्रकारिता विभागाच्या महाविद्यालयीन वृत्तपत्रासाठी स्वप्निल यांनी उपसंपादक म्हणून काम पाहिले.डिजिटलमध्ये एन्ट्री'महाराष्ट्र टाइम्स डॉट कॉम'च्या माध्यमातून पहिल्यांदा डिजिटल क्षेत्रामध्ये काम करणाऱ्या स्वप्निल यांनी सुरुवातीला सोशल मिडिया व्यवस्थापक म्हणून काम पाहिले. त्यानंतर हळूहळू ते डिजिटल वृत्तांकनाकडे वळले. त्यांनी 'महाराष्ट्र टाइम्स' वृत्तपत्रामध्येही माहिती-तंत्रज्ञान या विषयावर लेखन केलं. मुख्य पुरवणीसोबतच अनेकदा रविवार विशेष अंकांमध्येही त्यांचे लेख छापून आले आहेत. 'मुंबई टाइम्स' या पुरवणीअंतर्गत विद्यार्थ्यांच्या विश्वातील अनेक विषय त्यांनी कॉलेज क्लब रिपोर्ट्सच्या माध्यमातून हाताळले. कॉलेज क्लब रिपोर्टर्ससोबतच्या कामासोबतच त्यांनी 'मटा सन्मान', 'मटा श्रावण क्विन' यासारख्या कार्यक्रमांसाठी डिजिटल आणि प्रिंटदरम्यान संयोजक म्हणून काम पाहिलं. जवळपास पाच वर्ष ते मटामध्ये कार्यरत होते.प्रगल्भतेची आसमहाराष्ट्र टाइम्सनंतर तितक्याच तोलामोलाच्या 'लोकसत्ता'मध्ये स्वप्निल यांनी काम केलं. या ठिकाणीही ते पाच वर्ष कार्यरत होते. 'मटा'पासून सुरु झालेल्या प्रवासाला 'लोकसत्ता'मध्ये प्रगल्भता लाभली. राजकीय बातम्या, ताज्या घडामोडी, ट्रेडींग बातम्या याबरोबरच त्यांनी डिजिटल आणि प्रिंटमधील समन्वयाचं (इंटीग्रेशन) कामही त्यांनी लोकसत्तामध्ये केलं. 'लोकसत्ता'मधील 'व्हिवा' या पुरवणीमध्ये तरुणाईसंदर्भातील विषयांवर त्यांनी लेखन केलं. तसेच 'लोकप्रभा'च्या माध्यमातून त्यांनी माहिती-तंत्रज्ञान या विषयावर लिखाण केलं. लोकसत्ता डॉट कॉममध्ये स्वप्निल यांनी चार ते पाच सेक्शनसची जबाबदारी पार पाडली.तो सध्या काय करतो?'लोकसत्ता'नंतर स्वप्निल यांनी पहिल्यांदाच टीव्हीशी संलग्न वेबसाईटसाठी म्हणजेच 'झी 24 तास'च्या वेबसाईटसाठी काम करण्याचा निर्णय घेतला. या ठिकाणी ते ताज्या घडामोडींबरोबरच, राजकीय बातम्या, ब्रेकिंग बातम्या, ट्रेडिंग बातम्या हाताळतात. बातमीमधील अचूक माहिती, व्याकरण, उत्तम मथळे यासारख्या गोष्टींकडे त्यांचं कटाक्षाने लक्ष असतं. लिखाणबरोबरच मॅरेथॉन पळणं, वेगवेगळ्या ठिकाणी खादडीसाठी जाणं, पुस्तकांसोबतच अवांतर वाचन यासारख्या गोष्टींना ते प्राधान्य देतात.
Read More

ZEENEWS TRENDING STORIES