मुंबईतील सर्वात मोठा रिडेव्हलपमेंट प्रोजेक्ट, 39 मजली 10 इमारती अन् 10,432 घरे, कुठे आहे लोकेशन?
आशियातील सर्वात मोठी झोपडपट्टीचा कायापालय होत आहे. या प्रकल्पाचे काम वेगाने सुरू असून 10 इमारती उभारण्याच्या कामाचे भूमिपूजन पार पडले.
आशिया खंडातील सर्वात मोठी झोपडपट्टी असलेल्या धारावीचा पुनर्विकास होत आहे. या प्रकल्पाचे काम वेगात सुरू आहे. धारावीचा पुनर्विकास प्रकल्पांतर्गत कायापालट केला जाणार आहे. त्यानुसार आज माटुंगा येथील रेल्वेच्या 22 एकर जागेवर तब्बल गाळे 10,432 पुनर्वसन घरे आणि 1,379 व्यावसायिक, औद्योगिक असलेल्या 10 इमारती उभारण्याच्या कामाचे भूमिपूजन पार पडले.
धारावी येथील सेक्टर एक आणि सहामधील पात्र रहिवाशांना माटुंगा येथील घरे प्रथम मिळणार असून, त्यानंतर सुमारे 4,500 सदनिका धारावीतील इतर पात्र रहिवाशांना प्राधान्यक्रमानुसार दिल्या जाणार आहेत. पात्र रहिवाशांना 350 चौरस फुटांची घरे उपलब्ध करुन देणार आहेत.
या 10 इमारती तीन टप्प्यांमध्ये महाराष्ट्र शासनांतर्गंत येणाऱ्या धारावी पुनर्वसन/झोपडपट्टी पुनर्वसन प्राधिकरणाकडे हस्तांतरित केल्या जाणार आहेत. पहिल्या पाच इमारती मार्च 2029 पर्यंत तर त्यानंतरच्या दोन इमारती 2029 पर्यंत व उर्वरित तीन इमारती ऑगस्ट 2030 पर्यंत हस्तांतरित केल्या जाणार आहेत.
10 इमारती या 37 ते 39 मजली असून धारावीतील पात्र रहिवाशांसाठी 10 हजार 232 धरे बांधण्यात येणार आहेत. या इमारतीती घरे 350 चौ फुटांची असतील. तसंच, प्रत्येक इमारतीत 10 ते 12 लिफ्ट असतील. व्यावसायिक, औद्योगिक गाळ्यांसाठी स्वतंत्र्य दोन लिफ्ट असतील. तसंच, सभागृह, बागा, सोसायटी कार्यालय, खेळाचे मैदान, प्रार्थनास्थळे अशा सुविधांचाही येथे समावेश असेल.
धारावी पुनर्विकास प्रकल्पाची प्रमुख वैशिष्ट्ये
सिंगापूर-हाँगकाँगमधील अत्याधुनिक आणि नियोजनबद्ध गृहनिर्माण प्रकल्पांच्या धर्तीवर धारावीचा पुनर्विकास केला जाणार आहे. धारावीकरांसाठी 39 मजल्यांच्या 10 इमारती बांधल्या जाणार आहेत. पात्र रहिवाशांना मिळणाऱ्या नवीन घरांमध्ये स्वतंत्र किचन, बेडरूम, टॉयलेट-वॉशरूम आणि उत्तम नैसर्गिक प्रकाशव्यवस्था उपलब्ध करून दिली जाणार. प्रकल्प परिसरामध्ये महिलांसाठी स्वतंत्र स्वच्छतागृहांची उभारणी केली जाणार आहे.
देशातील पहिले ‘मल्टी-मोडल ट्रान्सपोर्ट हब’
धारावी पुनर्वसन प्रकल्पाचे सर्वात मोठे वैशिष्ट्य म्हणजे येथे उभारला जाणारा अत्याधुनिक ट्रान्सपोर्ट हब. ज्यामध्ये 5 वेगवेगळ्या प्रकारच्या पायाभूत सुविधा एकत्र केल्या जाणार आहेत. पश्चिम, मध्य आणि हार्बर हे तिन्ही रेल्वे मार्ग आणि विविध मेट्रो मार्ग या हबद्वारे एकमेकांशी जोडले जाणार आहेत. भविष्यात बुलेट ट्रेन थेट धारावीपर्यंत आणण्याचा विचार आहे. तसेच हवाई टॅक्सी सेवेसाठी व्हर्टीपोर्ट आणि जलवाहतुकीसाठी फास्ट जेट्टी विकसित केली जाणार आहे. विमान प्रवाशांसाठी धारावीतच सामानाची नोंदणी करण्याची सुविधा उपलब्ध करून दिली जाणार आहे. जेणेकरून प्रवासी ‘एअरपोर्ट एक्सप्रेस’ने थेट विमानतळावर पोहोचू शकतील.
