माधुरी, अजिंक्य रहाणेसह अनेक सेलेब्रिटींचे व्हिडिओ, पण अमित साटमांचा दियाच्याच व्हिडीओवर आक्षेप का? त्या विधानांमुळे होतोय विरोध?

मुंबई महानगरपालिकेने दिवाळी सेलेब्रिटी कॅम्पेन सुरू केले होते. मात्र आता या महापालिकेच्या या कॅम्पेनवरुन वाद रंगला आहे. भाजपा आमदार अमित साटम यांच्याकडून थेट दिया मिर्झाच्या शुभेच्छा व्हिडिओवर आक्षेप घेण्यात आला होता.  महापालिकेनं न्यायालयाच्या सूचनेनुसार दिवाळी प्रदुषणमुक्त करण्याकरता सेलेब्रीटींचे व्हिडीओ ट्विट केले आहेत. मात्र भाजप आमदार अमित साटम यांनी दिया मिर्झा हिच्या निशाणा साधत दिवाळी कशी साजरी करावी, याचे धडे आम्हाला दिया मिर्झा यांच्याकडून घेण्याची गरज नाही, असं म्हटलं आहे.

अमित साटम यांनी एक ट्विट केलं आहे. यात त्यांनी थेट महानगरपालिकेला टॅग करत सवाल केला आहे. दिवाळी कशी साजरी करावी, याचे धडे आम्हाला दिया मिर्झा यांच्याकडून घेण्याची गरज नाही. आमच्या परंपरा आणि संस्कृती खोलवर रुजलेल्या आहेत, असं अमित साटम यांनी म्हटलं आहे. अमित साटम यांच्या आक्षेपानंतर पालिकेने व्हिडिओ डिलीट केला आहे. मात्र दिवाळी कॅम्पेनसाठी अनेक कलाकारांनी व्हिडिओ केले आहेत.

महापालिकेनं न्यायालयाच्या सूचनेनुसार दिवाळी प्रदुषणमुक्त करण्याकरता सेलेब्रीटींचे व्हिडीओ ट्विट केले आहेत. यात अजिंक्य रहाणे, माधुरी दीक्षित, हर्षदा खानविलकर, महेश कोठारे, स्वप्नील, शिव ठाकरे, सुबोध भावे, सिद्धार्थ जाधव, प्रशांत दामले, सीआयडी फेम शिवाजी साटम, मृणाल कुलकर्णी, मिलिंद गवळी यांनीही अवाहन केलं आहे. मात्र अभिनेत्री दिया मिर्झाच्याच व्हिडिओवर आक्षेप का घेण्यात आला? असा सवाल सध्या उपस्थित होतोय.

अमित साटम यांनी इतर सेलेब्रिटींचे व्हिडीओ वगळता दिया मिर्झाच्याच व्हिडीओवर आक्षेप का घ्यावासा वाटला? याची चर्चा आता राजकीय वर्तृळात रंगली आहे. दिया मिर्झाची आतापर्यंतची राजकीय आणि सामाजिक विषयांवरील भूमिकांमुळं हा आक्षेप घेण्यात आला का? अशी चर्चा होत आहे.

दिया मिर्झाने घेतलेल्या राजकीय भूमिका?

दिया मिर्झाने 1 सप्टेंबर 2019 रोजी मेट्रोला विरोध नाही. वृक्षतोडीला विरोध आहे, असं म्हणत तत्कालीन मुख्यमंत्री देवेंद्र फडणवीस यांना टॅग केले होते. तिची मागणी होती की मेट्रो कारशेडसाठी पर्यायी जागा उपलब्ध असताना आरे जंगलाचा बळी देऊ नये. तसंच, 4 ऑक्टोबर 2019 मध्ये आरेत वृक्षतोड सुरू झाल्यानंतर वृक्षतोडीला विरोध करणाऱ्या नागरिकांच्या आंदोलनाला पाठिंबा दिला होता.

जामिया मिलिया इस्लामिया विद्यार्थी आंदोलन

विद्यार्थ्यांवरील कारवाईबाबत दिया मिर्झा हिने नाराजी व्यक्त केली होती. देशातील नागरिकांनी एकजूट होण्याचे आवाहन तिने केले होते.

NEET पेपरफुटी आणि विद्यार्थी आंदोलन (जुलै 2026)

विद्यार्थ्यांच्या शांततापूर्ण आंदोलनाला पाठिंबा. परीक्षा व्यवस्थेत पारदर्शकता, उत्तरदायित्व आणि सुधारणा करण्याची मागणी.

मुंबईतील प्रदूषण आणि फटाके

हवेच्या प्रदूषणाबाबत सरकार आणि प्रशासनाला जबाबदार धरण्याची मागणी तिने केली होती. प्रदूषणाचा प्रश्न राजकीय व्होट बँकेचा मुद्दा नसल्याने त्याकडे पुरेसे लक्ष दिले जात नसल्याचे तिने नमूद केले होते.