हिंदुविरोधी म्हणत ब्लॅकलिस्ट केलं, BMC च्या कॅम्पेन वादावर दिया मिर्झाची पहिली प्रतिक्रिया
मुंबई पालिकेच्या प्रदुषणमुक्त दिवाळी कॅम्पेनमधून दिया मिर्झाचा व्हिडीओ हटवण्यात आलाय. यानंतर दिया मिर्झाने पहिली प्रतिक्रिया दिली आहे.
मुंबईत दिवाळी सेलिब्रिटी कॅम्पेनवरून नवा वाद निर्माण झालाय. अभिनेत्री दिया मिर्झा हिने नुकतंच दिवाळीनिमित्त जनजागृती करणारी पोस्ट शेअर केली होती. दिवाळीत फटाके फोडणे टाळावे आणि ध्वनिप्रदूषण रोखावे, असे आवाहन करणारा दिया मिर्झाचा व्हिडिओ बीएमसीकडून शेअर करण्यात आला होता. दरम्यान, या व्हिडीओवर भाजपचे मुंबई अध्यक्ष अमित साटम यांनी नाराजी व्यक्त केली. अमित साटम यांच्या आक्षेपानंतर दियाचा हा व्हिडिओ हटवण्यात आला... 'दिवाळीबाबत दियाकडून धडे घेण्याची गरज नाही... 'आमच्या परंपरा आमच्या संस्कृतीत खोलवर रुजलेल्या आहेत असं ट्विट साटम यांनी केलं होतं. आता दिया मिर्झाने यावर पहिली प्रतिक्रिया दिली आहे.
काय म्हणाली दिया मिर्झा?
'प्रदूषणमुक्त दिवाळी' कॅम्पेनभोवती निर्माण झालेल्या वादावर भाष्य करताना अभिनेत्री दिया मिर्झाने पहिली प्रतिक्रिया दिली आहे. मुंबई उच्च न्यायालय आणि बीएमसी (BMC) यांनी जनहितार्थ मला एक व्हिडिओ रेकॉर्ड करण्याची विनंती केली होती, मग त्यावर कोणाला आक्षेप का असावा? असा प्रश्न दिया मिर्झाने उपस्थित केला. तसेच वायू प्रदूषण ही चिंतेची बाब आहे आणि प्रदूषण कमी करण्याच्या कोणत्याही प्रयत्नांचे स्वागतच केले पाहिजे, कारण हा सार्वजनिक आरोग्याचा प्रश्न आहे, असे दिया मिर्झाने पुढे म्हटले.
महापौर रितू तावडेंची आक्रमक भूमिका
या वादात आता मुंबईच्या महापौर रितू तावडे यांनीही भूमिका मांडली आहे. आम्ही दिया मिर्झाला 100 टक्के ब्लॅकलिस्ट केल्याचे रितू तावडे यांनी पत्रकार परिषदेत सांगितले. देश आणि हिंदू धर्माबाबत आक्षेपार्ह बोलणाऱ्यांना विरोध कायम असेल म्हटले. दिया मिर्झाला अभिव्यक्ती स्वातंत्र्य असले, तरी बीएमसीच्या व्यासपीठावर तिला सहभागी करून घ्यायचे की नाही, हा निर्णय महापौर म्हणून आपला अधिकार असल्याचे तावडे यांनी सांगितले. या व्हिडीओबाबत आयुक्तांसोबत कार्यक्रम झाल्याचा उल्लेख करत त्यांनी प्रशासनाकडून स्पष्टीकरण मागवणार असल्याचेही स्पष्ट केले. दिवाळी कशी साजरी करायची हे दिया मिर्झाने आम्हाला शिकवू नये. तिने तिच्या वैयक्तिक प्लॅटफॉर्मवर काय वाटेल ते टाकावे पण बीएमसीच्या पोर्टलवर मी हे खपवून घेणार नाही, असे महापौर म्हणाल्या.
किशोरी पेडणेकरांची टीका
किशोरी पेडणेकर यांनी महापौरांवर टीका केली. महापालिका कामकाजात साटमांचा हस्तक्षेप कशासाठी?. महापौरांना अधिकार नसतील महापालिका बंद करा, असा घणाघात विरोधी पक्षनेत्या किशोरी पेडणेकरांनी केलाय. दिया मिर्झाचं ट्विट का हटवले?, उत्तर द्यावं लागेल.महापालिका आयुक्तांना जाब विचारणार असल्याचं किशोरी पेडणेकर म्हणाल्यात. कलाकरांमध्ये भेदभाव कसला करता?, असा थेट सवाल किशोरी पेडणेकरांनी केलाय. हिंदू-मुस्लीमशिवाय यांची दुकानदारी चालत नाही, अशी टीका काँग्रेस नेते विजय वडेट्टीवारांनी केलीय.
