मुंबई विमानतळावर सापडलं मोठं घबाड, 3.47 कोटींचे सोनं जप्त, DRI च्या कारवाईची चर्चा

मुंबई विमानतळावर DRIने मोठी कारवाई केली आहे. सोन्याची तस्करी करणाऱ्या एका मोठ्या आंतरराष्ट्रीय रॅकेटचा भांडाफोड करण्यात आला. या कारवाईअंतर्गंत 2,317 ग्रॅम म्हणजेच साधारण 2.3 किलो सोनं जप्त करण्यात आलं आहे. आंतरराष्ट्रीय बाजारात याची किंमत 3.47 कोटी इतकी आहे. या प्रकरणी 5 जणांना अटक करण्यात आली आहे.

महसूल गुप्तचर संचालनालयाच्या (डीआरआय) मुंबई विभागीय युनिटने (एमझेडयू) मिळवलेल्या विशिष्ट गुप्त माहितीच्या आधारे, अधिकाऱ्यांनी मुंबईतील छत्रपती शिवाजी महाराज आंतरराष्ट्रीय विमानतळामार्फत (सीएसएमआयए) चालणाऱ्या एका संघटित सोन्याच्या तस्करीच्या टोळीचा पर्दाफाश केला. या टोळीत दोन प्रवासी, एक विमानतळ कर्मचारी आणि दोन ग्राहक अशा पाच जणांचा समावेश होता.

19-20 ऑक्टोबर 2026 रोजी केलेल्या या कारवाईदरम्यान, डीआरआय अधिकाऱ्यांनी अंदाजे 3.47 कोटी रुपये किमतीच्या 24-कॅरेटच्या 2.317 किलो विदेशी सोन्याच्या विटा जप्त केल्या आणि या तस्करीच्या जाळ्यात सामील असलेल्या पाच जणांना अटक केली.

प्राथमिक तपासात आरोपींचा तस्करीच्या गुप्त हालचाली आणि हाताळणीमध्ये सहभाग असल्याचे उघड झाले आहे. सीमाशुल्क कायदा, 1962 च्या तरतुदींनुसार हे सोने जप्त करण्यात आले असून, सर्व पाच आरोपींना अटक करण्यात आली आहे. या तस्करीच्या टोळीचे व्यापक जाळे शोधण्यासाठी आणि त्यात सामील असलेल्या इतर व्यक्तींची ओळख पटवण्यासाठी पुढील तपास सुरू आहे.

तपासात समोर आले आहे की, दुबईहून आलेल्या दोन प्रवाशानी एअरपोर्टच्या आतच कस्टमच्या अधिकाऱ्यांना हुलकावणी देत सोनं विमानतळ कर्मचाऱ्याकडे सोपवलं. तसंच, या कर्मचाऱ्याला सोनं टर्मिनल 2 मधून बाहेर काढून तिथे उपस्थित असलेल्या हँडलर्सकडे सुरक्षित पोहोचवण्याची जबाबदारी सोपवण्यात आली होती.

डीआरआयने दिलेल्या माहितीनुसार, सरुवातीला तपासात समोर आले आहे की, या रॅकेडचे धागेदोरे आंतरराष्ट्रीय स्तरावर दुबईपर्यंत जोडले गेले आहे. त्याव्यतिरिक्त नवी मुंबईतील एक व्यापारीदेखील यात सामील असल्याचे समोर येत आहे.

याव्यतिरिक्त, मुंबई विमानतळावर 19 ऑक्टोबर रोजी झालेल्या एका कारवाईत थायलंडमार्गे सिंगापूरहून आलेल्या एका प्रवाशाला त्याच्या बेल्टमध्ये लपवलेल्या 382 ग्रॅम सोन्यासह अटक करण्यात आली, ज्याची किंमत 55 ते 60 लाख रुपये आहे. तपास यंत्रणा सध्या या सर्व नेटवर्कची आणि त्यांच्याशी संबंधित इतर संशयितांची सखोल चौकशी करत आहेत.