'कर्मचारी स्पेशल' लोकलची दारं आतून बंद करणाऱ्या रेल्वे कर्मचाऱ्यांसाठी Bad News; आता प्रशासन Viral Video वरून...

सोमवारी (26 ऑक्टोबर रोजी) दिवसभर मध्य रेल्वेची वाहतूक विस्कळीत झाल्याने मुंबईत नोकरीनिमित्त येणाऱ्या कर्मचाऱ्यांना दिवसभर मनस्ताप सहन करावा लागला. उशीराने म्हणजे अगदी कधीही धावणाऱ्या लोकल ट्रेन, प्रवाशांची प्रचंड गर्दी, ट्रॅकवरुन चालणारे प्रवासी असं चित्र सोमवारी दिवसभर पाहायला मिळालं. असं असतानाच दुसरीकडे खचाखच भरलेल्या ठाणे स्थानकाच्या प्लॅटफॉर्मवर 'कर्मचारी विशेष लोकल' आल्यानंतर जो प्रकार घडला तो अजून धक्कादायक होता.

सर्वसामान्य प्रवाशांना आत येऊ देण्याऐवजी या ट्रेनमध्ये बसलेल्यांनी आतून दारं लावून घेतली. त्यामुळे इतर लोकलमध्ये अगदी जीवावर उदार होऊन दारात लटकून प्रवास करणाऱ्या सर्वसामान्य प्रवाशांना रेल्वे कर्मचाऱ्यांनी प्रवेश नाकारल्याचे व्हिडीओ सोशल मीडियावर व्हायरल झाले. विशेष म्हणजे सर्वसामान्यांना एवढा त्रास होत असताना अशा दिवशी रेल्वे कर्मचारी विशेष लोकल सोडण्याची गरज काय होती? असे प्रश्नही उपस्थित झाले. यावरुन संताप व्यक्त होत असतानाच रेल्वे प्रशासनाने या साऱ्या प्रकारची दखल घेतली असून ऑडिओ व्हिडीओंच्या आधारे दारं बंद करुन घेणाऱ्या कर्मचाऱ्यांची ओळख पटवली जाणार असल्याचं रेल्वेनं जाहीर केलं आहे. तसेच या प्रकरणातील दोषींविरोधात कारवाई केली जाणार असल्याचे संकेत दिले आहेत.

सोमवारी सिग्नल यंत्रणा आणि ओव्हरहेड वायरशी संबंधित तांत्रिक बिघाड झाल्याने, मध्य रेल्वेची लोकल सेवा नऊ तासांहून अधिक काळ कोलमडली होती. सामान्य गाड्याच वेळेत चालत नसताना मध्य रेल्वेच्या कर्मचाऱ्यांसाठी सोडली जाणारी 'कर्मचारी विशेष लोकल' चालवण्यात आली. परळवरुन दुपारी चार वाजण्याच्या सुमारास सोडलेली कल्याणच्या दिशेने धावणारी कर्मचारी विशेष लोकल ऑफिस सुटण्याच्या वेळी म्हणजेच पावणेपाच-पाचच्या आसपास ठाणे स्थानकात आली. या लोकलच्या डब्यात मोजकेच कर्मचारी बसले होते. तशी लोकल बऱ्यापैकी रिकामीच होती. काही कर्मचारी तर सीटवर आरामात झोपले होते.

Mumbai commuters were stranded, but an allegedly empty staff-only local reportedly refused to open its doors to them. In a crisis, shouldn’t humanity come first? #MumbaiLocal #CentralRailway https://t.co/0qWOicQ5qG

— Mumbai Heritage (@mumbaiheritage) October 27, 2026

काळ-वेळ आणि झालेला खोळंबा लक्षात घेता सदर लोकलमधून सर्वसामान्य प्रवाशांना प्रवास करू देणे आवश्यक होते. मात्र ठाणे स्थानकात प्लॅटफॉर्म क्रमांक दोनवर आलेल्या कल्याणच्या दिशेने जाणाऱ्या कर्मचारी विशेष स्लो लोकलच्या एका डब्याचे दरवाजे आतून बंद करण्यात आले होते. प्लॅटफॉर्मवर तुडुंब गर्दी असताना तब्बल दोन ते तीन मिनिटं हा दरवाजा उघडण्यात आला नाही. प्लॅटफॉर्मवरील प्रवाशी आरडाओरड करुन दरवाजा उघडण्याची विनंती करत होते. मात्र त्यानंतरही त्यांनी दरवाजा उघडण्यास नकार दिल्याचं दिसून आलं. काही रेल्वे कर्मचाऱ्यांनी दरवाजाला आजून दोरी बांधून ते बंद करुन ठेवले. प्लॅटफॉर्मवरील प्रवाशी दरवाजा उघडण्याचा प्रयत्न करत असतानाच डब्यातील कर्मचाऱ्यांनी आतून दरवाजा धरुन ठेवला होता. आता याच प्रकरणाची चौकशी केली जाणार आहे.

Mumbai local commuters already battle overcrowding every day. Now they allegedly have to plead with railway staff just to get a coach door opened At Thane station, a frustrated passenger reportedly threw water at a locked coach door after being ignored for 2–3 minutes What exactly was the reason for keeping the doors locked? Central Railway owes commuters an explanation https://t.co/Vsyrr6ZB9X

— SaffronSoul (@TheRealDharm) October 26, 2026

यावरुन संताप व्यक्त होत असून सोशल मीडियावरुन टीकेची झोड उठवली जात आहे. या साऱ्या गोष्टींची दखल घेत आता रेल्वे प्रशासनानेच मोठा निर्णय घेतला आहे. सोशल मीडियावरील व्हायरल व्हिडीओवरुन दार न उघडणाऱ्या आणि ते बंद करुन ठेवणाऱ्या कर्मचाऱ्यांची ओळख पटवण्याचं काम सुरु केलं आहे. चौकशीदरम्यान दोषी आढळणाऱ्या कर्मचाऱ्यांवर नियमानुसार करावाई करण्यात येईल अशी माहिती मध्य रेल्वेचे मुख्य जनसंपर्क अधिकारी डॉ. स्वप्नील नीला यांनी दिली आहे.