ऑक्टोबर हिटनंतर नागरिकांना दिलासा मिळणार, महाराष्ट्रात थंडीची लाट येणार, पण...

ऑक्टोबर महिना सरत आला आहे. नोव्हेंबर महिना सुरू होण्यास अवघे काही दिवसच शिल्लक आहेत. त्यानंतर पहिल्याच आठवड्यात दिवाळी आहे. साधारणपणे दिवाळीत थंडीची चाहुल लागण्यास सुरुवात होते. मात्र यंदा एल निनोचा परिणाम यामुळं महाराष्ट्रातील हवामानावर त्याचा परिणाम दिसून येईल. महाराष्ट्रात यंदा पावसाची मोठी तूट होती. तसंच, थंडीवरही परिणाम होणार आहे. मुंबईकरांना थंडीसाठी थोडी आणखी वाट पाहावी लागणार आहे. दिवाळीनंतर थंडीची पहिली लाट येण्याची चिन्हे आहेत.

ऑक्टोबरमध्येच उष्णतेच्या लाटां निर्माण झाल्या होत्या. त्यामुळं राज्यातील विविध भागात मोठ्या प्रमाणात उष्णता वाढली होती. वाढत्या तापमानामुळं नागरिक बेजार झाले होते. त्यामळं नागरिक मोठ्या आशेने थंडीची वाट पाहत होते. आता ऑक्टोबर हिट कमी होणार आहे. तर गारवा वाढण्यास सुरुवात होणार आहे.

यंदा दिवाळीनंतर थंडीची पहिली लाट येण्याची चिन्हे दिसत आहेत. मात्र यंदा थंडीचा हंगाम कमी काळ टिकण्याची शक्यता आहे. मध्येच पुन्हा उष्णता वाढू शकते. दिलासादायक बाब म्हणजे ऑक्टोबरमध्ये जाणवणारा उकाडा आता संपला आहे.

मागील वर्षी नोव्हेंबर महिन्यात मुंबईत अनेकदा चांगली थंडी जाणवली होती. मात्र डिसेंबर आणि जानेवारीत थंडीचा जोर कमी होता. यंदाही थंडी कधी सुरू होणार, याकडे मुंबईकरांचे लक्ष लागले आहे. दिवाळीनंतर गारवा वाढण्याची शक्यता असली, तरी यंदा सलग अनेक दिवस थंडी राहीलच, याची शक्यता कमी आहे. एकूणच, ऑक्टोबरचा उकाडा कमी होण्यास सुरुवात झाली असली, तरी मुंबईकरांना थंडीसाठी दिवाळीनंतरच वाट पाहावी लागणार आहे. यंदा थंडी अधूनमधून जाणवेल; मात्र ती फार काळ टिकेलच असे नाही, असंही हवामान विभागाने स्पष्ट केलं आहे.

पुण्यात पहाटे गारवा दुपारी उन्हाचा चटका....

गेल्या काही दिवसांपासून जाणवणाऱ्या उकळल्यानंतर पुणेकरांना आता थंडीची चाहूल लागली आहे त्यामुळे गेली दोन दिवसांपासून शहर आणि परिसरात पहाटे आणि रात्रीच्या वेळी काहीसा गारठा जाणवत आहे. कमाल तापमानातही घट होत असल्याने पुणेकरांना उकाड्यापासून मोठा दिलासा मिळत आहे. मात्र ही हुडहुडी फार काळ टिकणार नसून पुढील दोन ते तीन दिवसात पुन्हा तापमान वाढ होण्याची शक्यता भारतीय हवामानशास्त्र विभागाने वर्तवली आहे.

नाशिकमध्ये थंडीचा जोर वाढला

नाशिकमध्ये थंडीचा जोर वाढला असून किमान तापमान 14.3अंशांवर पारा पोहोचला आहे.  28 ऑक्टोबरचे तापमान गेल्या 5 वर्षांतील नीचांकीवर पोहोचले आहे. दिवसा ऑक्टोबर हीटचा तडाखा, रात्री मात्र हुडहुडी अशी सध्या नाशिककरांची अवस्था आहे.