चक्रीवादळामुळं ऐन हिवाळ्यात महाराष्ट्रात पाऊस कोसळणार, या 7 जिल्ह्यांना अलर्ट, वादळी वाऱ्यासह पाऊस होणार

बंगालच्या उपसागरातील अर्बण चक्रीवादळामुळं आज पुन्हा राज्यात मुसळधार पावसाची शक्यता वर्तवण्यात आली आहे. विदर्भासह, मध्य महाराष्ट्रात विजांसह पावसाची शक्यता आहे. त्यामुळं या विभागांना यलो अलर्ट देण्यात आला आहे. मराठवाड्यात काही ठिकाणी विजांसह पावसाचा अंदाज आहे. तर उर्वरित राज्यात ढगाळ वातावरण राहिल. त्याचबरोबर कमाल आणि किमान तापमानात चढ-उतार होण्याची शक्यता आहे.

राज्याच्या किमान तापमानात घट झाल्याने पहाटेच्या वेळी काहीसा गारवा जाणवतो. राज्यात काही ठिकाणी धुके आणि दव पडल्याचे निदर्शनास आले. पूर्व विदर्भात तुरळक ठिकाणी पाऊस झाल्याने किमान तापमानात घट झाली आहे. त्यामुळं काहीशी थंडीची जाणीव होऊ लागली आहे.

विदर्भ, मध्य महाराष्ट्र आणि मराठवाड्यात ढगाळ हवामानासह विजांसह पावसाची शक्यता आहे. मध्य महाराष्ट्रातील नाशिक, अहिल्यानगर, विदर्भातील अमरावती, नागपूर, भंडारा, गोंदिया आणि गडचिरोली जिल्ह्यांत विजांसह पावसाची शक्यता आहे. त्यामुळं येथे सतर्कतेचा यलो अलर्ट देण्यात आला आहे. उर्वरित राज्यात अंशतः ढगाळ हवामानासह चढ-उतार होण्याची शक्यता आहे.

अमरावतीत पावसाची रिपरिप

अमरावती शहरासह ग्रामीण भागामध्ये काल रात्रीपासून पावसाची रिपरिप वाढली आहे. त्यामुळं नागरिकांना उकाड्यापासून दिलासा मिळाला आहे. बंगालच्या उपसागरामध्ये तयार झालेल्या अर्णब चक्रीवादळाचा परिणाम यामुळं पाऊस झाला आहे. पुढील दोन ते तीन दिवस अशाच पद्धतीने पाऊस राहणार असल्याचा हवामान विभागाचा अंदाज आहे. अवकाळी पावसामुळे रब्बी हंगामातील गहू आणि हरभरा पिकाला फायदा होण्याची शक्यता आहे.

भारतीय हवामान विभागाने पुढील चार आठवड्यांसाठी पावसाचा अंदाज जाहीर केला आहे. नोव्हेंबरच्या पहिल्या आठवड्यात पूर्व आणि ईशान्य भारतासह छत्तीसगड, पूर्व मध्य प्रदेश आणि पूर्व उत्तर प्रदेशात सरासरीपेक्षा जास्त पाऊस पडण्याची शक्यता असून दक्षिण भारतात कमी पावसाचा अंदाज आहे.

अर्णब चक्रीवादळ निवळणार

अर्णब चक्रीवादळ जमिनीवर आल्यानंतर छत्तीसगड, ओडिशामध्ये तीव्र कमी दाबाचे क्षेत्र सक्रीय आहे. ही प्रणाली आता निवळणार असून वरील प्रणालीपासून दक्षिण कोकण आणि परिसरावरील चक्राकार वाऱ्यांपर्यंत हवेचा कमी दाबाचा पट्टा सक्रीय आहे.