नवी मुंबईतील दोन सख्ख्या बहिणींना टार्गेट केलं, घरात घुसून तरुणाचा गोळीबार, कारण हादरवणारे

प्रेमप्रकरणातून एका माथेफिरूने घरात घुसून दोन सख्ख्या बहिणींवर जीवघेणा हल्ला केल्याची घटना समोर आली आहे. या घटनेत एक तरुणी गंभीर जखमी झाली असून एक बहीण थोडक्यात बचावली आहे. प्रेमप्रकरणातून हल्ला केल्याचा प्राथमिक अंदाज वर्तवण्यात येत आहे. संशयित अर्जुन चौहान याला पोलिसांच्या ताब्यात देण्यात आले आहे.

कोपरखैरणे सेक्टर 1 येथे गुरुवारी रात्री घरात घुसून एका तरुणाने दोन सख्या बहिणींवर पिस्तुलातून गोळीबार केल्याची घटना घडली. रात्री सुमारे नऊच्या सुमारास घडलेल्या या घटनेत तन्नू धोबी (२०) हिच्या पाठीत गोळी लागल्याने ती गंभीर जखमी झाली, तर रितू धोबी (२२) हिच्या कानाला गोळी चाटून गेल्याने ती थोडक्यात बचावली आहे. या गोळीबारानंतर फरार झालेल्या आरोपी अर्जुन चौहान याला कोपरखैरणे पोलिसांनी ताब्यात घेतले आहे.

मिळालेल्या माहितीनुसार, धोबी कुटुंबीय कोपरखैरणे सेक्टर 1 मध्ये वास्तव्यास आहेत. गुरुवारी रात्री नितीन प्रदीप धोबी आणि त्याचे वडील कामानिमित्त घराबाहेर गेले होते. त्यावेळी घरात दोन्ही बहिणी आणि त्यांची आई उपस्थित होती.

रात्रीच्या सुमारास अर्जुन चौहान हा तरुण अचानक त्यांच्या घरात घुसला. त्याने दोन्ही बहिणींना लक्ष्य करून त्यांच्यावर पिस्तुलातून गोळीबार केला. या हल्ल्यात तन्नूच्या पाठीत गोळी लागली, तर रितूच्या कानाला गोळीचा स्पर्श झाला. गोळीबारानंतर हल्लेखोर घटनास्थळावरून पळून गेला.

या घटनेनंतर जखमी झालेल्या दोन्ही मुलींना त्यांच्या आईने तातडीने रुग्णालयात दाखल केले. तन्नूवर उपचार सुरू असून तिची प्रकृती गंभीर असल्याचे समजते. रितूवरही उपचार करण्यात आले आहेत.

प्राथमिक माहितीनुसार, या गोळीबारामागे प्रेमप्रकरणाची पार्श्वभूमी असण्याची शक्यता व्यक्त केली जात आहे. मात्र, हल्ल्यामागील नेमके कारण अद्याप स्पष्ट झालेले नाही. पोलिसांनी संशयित अर्जुन चौहान याचा शोध घेऊन त्याला रात्रीच ताब्यात घेतले आहे. गोळीबारासाठी वापरलेले पिस्तूल, हल्ल्यामागील कारण आणि अन्य काही व्यक्तींचा सहभाग आहे का, याचा तपास पोलिस करत आहेत.

पोलिसांनी दिलेल्या माहितीनुसार, आरोपी अर्जून चव्हाणचे मोठ्या बहिणीसोबत प्रेमसंबंध होते. मात्र काही कारणाने तरुणीने त्यांचे नाते तोडले. तिच्यासोबत प्रेमसंबंध असलेल्या अर्जूनने रागात दोन्ही बहिणींवर गोळ्या झाडल्या. या गोळीबारात ती तरुणी आणि तिची 22 वर्षीय मोठी बहिण जखमी झाल्या.