महाराष्ट्र हादरला! नऊ वर्षांच्या चिमुरडीवर लैंगिक अत्याचार करुन हत्या, खाऊचे आमिष दाखवत टेकडीवर नेले अन्...
नवी मुंबईतील तुर्भे परिसरात घराजवळ खेळताना बेपत्ता झालेल्या नऊ वर्षांच्या चिमुरडीवर लैंगिक अत्याचार करून तिची हत्या करण्यात आल्याची धक्कादायक घटना उघडकीस आली आहे.
गेल्या काही दिवसांपासून महिला अत्याचारातील घटना वाढत असतानाच महाराष्ट्र पुन्हा एकदा हादरला आहे. नवी मुंबईत नऊ वर्षांच्या चिमुकलीवर लैंगिक अत्याचार करुन तिची निर्घृणपणे हत्या करण्यात आली आहे. या घटनेने परिसरात तीव्र संताप व्यक्त करण्यात येत आहे. या प्रकरणी तुर्भे पोलिसांनी सीसीटीव्हीच्या आधारे 30 वर्षीय आरोपीला अटक केली आहे.
समोर आलेल्या माहितीनुसार, 10 ऑक्टोबर रोजी दुपारी चिमुकली घराबाहेर खेळत होती. घराबाहेर खेळत असताना ती अचानक बेपत्ता झाली होती. कुटुंबीयांनी तिचा अनेक ठिकाणी शोध घेतला. मात्र ती कुठेच सापडली नाही. तेव्हा मात्र तुर्भे पोलीस ठाण्याच तक्रार दाखल करण्यात आली. त्यानुसार पोलिसांनी अपहरणाचा गुन्हा दाखल करुन घेत मुलीचा शोध सुरू केला आहे.
अल्पवयीन मुलगी बेपत्ता झाल्याने परिसरात एकच खळबळ उडाली होती. पोलिसांनी तातडीने तपासाला सुरुवात केली होती. घटनास्थळासह परिसरातील सीसीटीव्ही तपासले. तेव्हा मुलीच्या परिचयातील आणि त्याच परिसरात राहणारा 30 वर्षीय व्यक्ती तिला खाऊचे आमिष दाखवून तिला रिक्षातून घेऊन गेला.
सीसीटीव्हीच्या आधारे पोलिसांनी आरोपीला माग काढत त्याला ताब्यात घेतले. तेव्हा चौकशीत त्याने मुलीला पावणे एमआयडीसी परिसरातील जंगलात मंदिराजवळ नेल्याचे सांगितले. तिथे तिच्यावर लैंगिक अत्याचार करुन गळा दाबून हत्या केल्याचे त्याने सांगितल्याची माहिती पोलिसांनी दिली. त्यानंतर पोलिसांनी संबंधित परिसरात शोध घेतला असता मुलीचा मृतदेह आढळला.
दरम्यान, चिमुरडीच्या अपहरणानंचर अत्याचार आणि हत्या झाल्याचे समोर येताच संतप्त नागरिकांनी तुर्भे एमआयडीसी पोलिस ठाण्याबाहेर जमून आरोपीला समोर आणण्याची मागणी करत घेराव घातला. परिस्थिती नियंत्रणात आणण्यासाठी पोलिसांनी आरोपीला कठोरात कठोर शिक्षा मिळावी यासाठी प्रयत्न केले जातील, असं आश्वासन त्यांनी दिल्यानंतर जमाव शांत झाला.
आदिवासी तरुणीवर अत्याचार
नाशिकच्या पंचवटीतील पवार चाळ परिसरात १९ वर्षीय आदिवासी तरुणीवर अत्याचार करण्यात आल्याचे समोर आले. आळीपाळीने लैंगिक अत्याचार केल्याप्रकरणी दोन आरोपींना अटक करण्यात आली आहे. विक्रमकुमार शाह आणि अशोक शाह अशी अटक केलेल्या संशयित आरोपींची नावे आहेत. म्हसरूळ पोलिसांकडून अनुसूचित जाती-जमाती अत्याचार प्रतिबंधक कायद्यासह संबंधित कलमांनुसार गुन्हा दाखल केला आहे.
