लोकलचा लेट मार्क आता टळणार, तुमची लोकल वेळेत स्थानकात येणार; मध्य रेल्वेच्या प्रवाशांसाठी महत्त्वाची बातमी

लोकल ही मुंबईकरांची जीवनवाहिनी आहे. नोकरदार वर्ग हा लोकलवर अवलंबून आहे. लोकल लेट झाल्यावर ऑफिस गाठायलादेखील उशिर होतो. मात्र आता तुमची लोकल वेळेत स्थानकात दाखल होणार आहे. मध्य रेल्वेचा लोकलचा खोळंबा थांबणार आहे. कसारा तिसऱ्या मार्गाला रेल्वे सुरक्षा आयुक्तांनी मंजुरी दिली आहे. त्यामुळं आता या रेल्वे मार्गावरुन वाहतूक सुरू होणार असून लोकल आणि लांब पल्ल्याच्या गाड्यांच्या संचालनात सुधारणा होणार आहे.

कल्याण-कसारा तिसऱ्या मार्गिकेच्या पहिल्या टप्प्याचे म्हणजेच कसारा ते खर्डी  या 14 किमी मार्गिकेचे लोकार्पण मुख्य सुरक्षा आयुक्त (Commissioner of Railway Safety) गुरु प्रकाश यांच्या हस्ते विधिवत पूजा करून आणि तिसऱ्या मार्गिकेची जोडणी करून करण्यात आले. यामुळे कसारा घाटातील वाहतूक कोंडी आणि लोकलच्या बंचिंग समस्येवर मोठा तोडगा निघणार आहे.

कल्याण-कसारा मार्गावार टिटवाळा, आसनगाव आणि कसारा परिसरातून दररोज मोठ्या संख्येने प्रवासी मुंबईच्या दिशेने प्रवास करतात. मात्र याच मार्गावरुन लोकल, मेल एक्सप्रेस आणि मालगाड्यांची वाहतूक होते. त्यामुळं लोकलचा खोळंबा हा ठरलेला असतो. त्याचा परिणाम वाहतुकीवर होतो. मात्र आता तिसरा रेल्वे मार्गिका सुरू झाल्यामुळं लोकलचा वक्तशीरपणा वाढेल.

तिसऱ्या मार्गिकेचा दुसरा टप्पा खर्डी ते आसनगाव हा मार्च 2027 पर्यंत पूर्ण होणार असल्याचे एका रेल्वे अधिकाऱ्याने सांगितले आहे, तर पुढील तिसरा टप्पा आसनगाव ते कल्याण हा डिसेंबर 2027 पर्यंत पूर्ण करण्याचा उद्देश रेल्वे प्रशासनाने ठेवला आहे. यामुळे कसारा घाटातील वाहतूक कोंडी आणि बंचिंगच्या समस्येवर मोठा तोडगा निघणार असून, लोकल सेवांना वेळेत धावण्यास मदत होणार आहे, ज्याचा थेट फायदा शहापूर, कसारा, आसनगावच्या हजारो प्रवाशांना होणार आहे.

रेल्वे सुरक्षा आयुक्तांनी 17 ऑक्टोबर रोजी नव्या मार्गाची पाहणी केली. तर 18 ऑक्टोबर रोजी विशेष रेल्वेच्या माध्यमातून वेगाची चाचणी घेण्यात आली. त्यानंतर या मार्गावर ताशी 100 किमी वेगाने गाड्या चालवण्यास मंजुरी मिळाली. मात्र खर्डी स्थानकाच्या यार्डातील काही सिग्नलच्या पायाभरणीत त्रुटी आढळल्याने संबंधित सिग्नलच्या दोन्ही बाजूंना प्रत्येकी 100 मीटर अंतरापर्यंत ताशी 30 किमी वेगमर्यादा लागू करण्याचे निर्देश दिले आहेत.