मध्य रेल्वे नेमकी का विस्कळीत झाली आहे? कधीपर्यंत सुरळीत होणार लोकल? PRO नी दिली सर्व माहिती
मध्य रेल्वे प्रवाशांना आज मोठा मनस्ताप सहन करावा लागत असून, जवळपास दीड ते दोन तास सेवा विस्कळीत झाली.
मध्य रेल्वे प्रवाशांना आज आठवड्याच्या सुरुवातीलाच मोठा मनस्ताप सहन करावा लागत आहे. सकाळी लोकल सेवा विस्कळीत झाल्याने अनेक प्रवासी ट्रेन आणि स्थानकांवर अडकून पडले आहेत. कामावर तसंच महत्वाच्या ठिकाणी जाण्यासाठी निघालेल्या अनेक प्रवाशांची यामुळे कोंडी झाली आहे. दरम्यान मध्य रेल्वेवर नेमकी काय समस्या झाली आहे, तसंच लोकल पुन्हा कधी सुरळीत होईल यासंदर्भात मध्य रेल्वेच्या जनसंपर्क अधिकाऱ्यांनी माहिती दिली आहे
मध्य रेल्वेचे मुख्य जनसंपर्क अधिकारी स्वप्नील नीला यांनी सांगितलं आहे की, "सकाळी ओव्हरहेड वायरवर दुसरी वायर पडल्याने तांत्रिक बिघाड झाला. मुलुंड आणि ठाणेदरम्यान ही वायर पडली होती. त्या वायरला काढण्यासाठी 10 वाजल्यापासून एमर्जन्सी ब्लॉक घेण्यात आला. 10.48 वाजता तो ब्लॉक संपला आणि तेथील वाहतूक सुरळीत करण्यात आली आहे. याशिवाय कांजूरमार्ग येथील विक्रोळी आणि भांडुपदरम्यान सिग्नलिंग टेस्टिंग रूममध्ये आग लागल्याने दोन स्थानकांदरम्यानचे सर्व सिग्नलचे इंडिकेशन बंद झाले. कांजूरमार्ग स्थानकावर तसेच विक्रोळी ते भांडुप दरम्यान गाड्या ए-बोर्ड प्राधिकरणाच्या आधारे चालवण्यात येत आहेत. सर्वच लाईनवरील वाहतूक 40-45 मिनिटे उशिराने सुरु आहे".
एक्सवर मध्य रेल्वेने माहिती देताना सांगितलं आहे की, सुमारे 09:33 वाजता सिग्नल यंत्रणेतील बिघाडामुळे कांजूरमार्ग स्थानकावरील सर्व सिग्नल ब्लँक झाले. तसेच विक्रोळी ते भांडुप दरम्यानचे सिग्नलही ब्लँक झाले".
A-मार्कर: कांजूरमार्ग स्थानकावर तसेच विक्रोळी ते भांडुप दरम्यान गाड्या A-बोर्डवर चालविण्यात येत आहेत.
ॲब्सोल्युट ब्लॉक पद्धत: विक्रोळी ते भांडुप दरम्यान ॲब्सोल्युट ब्लॉक पद्धत लागू करण्यात आली आहे.
गाडी चालविण्याची परवानगी: गाड्या TD 912 प्राधिकरणानुसार चालविण्यात येत आहेत.
पहिल्या गाड्या:
डाउन लोकल लाईन, विक्रोळी येथून: गाडी क्रमांक K39
डाउन थ्रू लाईन, विक्रोळी येथून: गाडी क्रमांक BL11
सिग्नल यंत्रणा पूर्ववत करण्यासाठी युद्धपातळीवर प्रयत्न सुरू आहेत.
युद्धपातळीवर काम सुरु आहे. आता अप मार्गावरील गाड्या सुरू करण्याचा प्रयत्न करतोय . डाऊन मार्गावरील गाड्या सुरू केल्या आहेत अशी माहिती त्यांनी दिली.
