‘कैसा हराया’फेम सहर शेखकडून औरंगजेबाला वाढदिवसाच्या शुभेच्छा; 'मुघलांचा इतिहास पुस्तकांमधून हटवाल पण...'

‘कैसा हराया’ या वक्तव्यामुळे काही महिन्यांपूर्वी चर्चेत आलेल्या AIMIM च्या नगरसेविका सहर शेख पुन्हा एकदा वादाच्या केंद्रस्थानी आल्या आहेत. मुघल सम्राट औरंगजेबाबाबतच्या सोशल मीडिया पोस्टमुळे पुन्हा वाद निर्माण झालाय. सहर शेख यांनी इन्स्टाग्रामवर औरंगजेबाला वाढदिवसाच्या शुभेच्छा देत त्याच्या राजवटीचे कौतुक केले. ‘इतिहास कधीही पुसता येणार नाही’, असा संदेश देतानाच त्यांनी ताजमहाल आणि हुमायूनचा मकबरा यांसारख्या वास्तूंचाही उल्लेख केला आहे. या पोस्टनंतर सोशल मीडियावर त्यांच्यावर टीका सुरू झाली असून महाराष्ट्रातील औरंगजेबाच्या इतिहासावरून पुन्हा राजकीय वातावरण तापण्याची शक्यता आहे. याबद्दल सविस्तर जाणून घेऊया.

काय घडलंय नेमकं?

सहर शेख यांनी औरंगजेबाला वाढदिवसाच्या शुभेच्छा देणारी पोस्ट सोशल मीडियावर शेअर केली. त्यात त्यांनी औरंगजेबाचा उल्लेख ‘श्रद्धा आणि ताकदीने राज्य करणारा सम्राट’ असा केला. औरंगजेबाबाबत कितीही नकारात्मक चित्रण केले किंवा त्याची प्रतिमा पुसण्याचा प्रयत्न केला, तरी इतिहास पुसता येणार नाही, असे त्या म्हणाल्या. या पोस्टमुळे सहर शेख यांच्या राजकीय भूमिकेवर प्रश्न उपस्थित केले जात आहेत.

ताजमहाल, हुमायूनच्या मकबऱ्याचा दाखला

या पोस्टमध्ये सहर शेख यांनी मुघलकालीन वास्तूंचे फोटोही शेअर केले आहेत. हुमायूनच्या मकबऱ्यासमोरचे छायाचित्र पोस्ट करत त्यांनी त्या काळातील वास्तुकलेचा उल्लेख केला. ताजमहालाचा फोटो शेअर करून मुघलकालीन स्थापत्यकलेचे महत्त्व अधोरेखित केले. मुघलांचा इतिहास पुस्तकांमधून बाजूला करता येईल; मात्र देशाच्या ऐतिहासिक वारशातून तो कसा पुसणार, असा सवालही त्यांनी पोस्टमधून उपस्थित केला.औरंगजेबाची प्रतिमा खराब करण्यासाठी चित्रपटांच्या माध्यमातून प्रयत्न केले जात असल्याचा दावा सहर शेख यांनी पोस्टमध्ये केला. अशा चित्रपटांमुळे इतिहास बदलणार नाही, अशा आशयाची पोस्ट त्यांनी केलीय. 

नितेश राणेंकडून टीका

सहर शेख यांच्या पोस्टनंतर भाजप मंत्री नितेश राणे यांनी त्यांच्यावर टीका केलीय. इकडे हिरवेकरण करण्यासाठी तिला सुपारी दिली गेली आहे. मुघलाची आठवण येत असेल तर ती पाकिस्तानात गेली तर आम्हाला त्याची काळजी नसेल.असे हिरवे साप आम्हाला देशात नको आहे. मुघलाची आठवण येत असेल तर वडिलांना घेऊन मुघलाकडे गेली तर आमची हरकत नाही, असे नितेश राणे म्हणाले. ती हिंदू राष्ट्रांमध्ये निवडून आली ही ती विसरली असावी.. मुघलांना गाडून तयार झालेली ही शिवाजी महाराजांची भूमी.. आणि महादेवाची भूमी आहे.  हा कोणाच्या अब्बाचा पाकिस्तान नाही हे त्यांनी आठवण ठेवावं नाहीतर असे पार्सल आम्हाला पाकिस्तान मध्ये पाठवता येतात, असेही ते पुढे म्हणाले.

‘कैसा हराया’नंतर पुन्हा चर्चेत

ठाणे महापालिका निवडणुकीनंतर ‘कैसा हराया’ या विधानामुळे सहर शेख यांचे नाव राज्यभर चर्चेत आले होते. त्यानंतर आता औरंगजेबाबाबतच्या पोस्टमुळे त्या पुन्हा राजकीय वादात सापडल्या आहेत.