टायगर श्रॉफवरील हल्ल्याचा संदर्भ देत फडणवीसांनी विरोधकांना सुनावलं! राऊत म्हणाले, '...तोपर्यंत राष्ट्रपती राजवट लावण्याचा विचार करावा!'
राज्याचे मुख्यमंत्री देवेंद्र फडणवीस यांनी टायगर श्रॉफवर झालेल्या हल्ल्यावरुन विरोधकांकडून केल्या जाणाऱ्या टीकेवरुन जुन्या प्रकरणांचा संदर्भ दिल्याचं ऐकल्यानंतर संजय राऊत चांगलेच संतापल्याचं दिसून आलं. नेमकं ते काय म्हणाले जाणून घ्या
अभिनेता टायगर श्रॉफवर रविवारी रात्री झालेल्या गोळीबाराच्या मुद्द्यावरुन खासदार संजय राऊत यांनी राज्याचे गृहमंत्री देवेंद्र फडणवीस यांच्यावर कठोर शब्दांमध्ये निशाणा साधला आहे. "देवेंद्र फडणवीस गृहमंत्री झाल्यापासूनचा काळ बघितला तर मुंबईसह महाराष्ट्रामध्ये जंगलराज निर्माण झाला आहे. गँगवॉर, धमक्या, खंडणी हा 90 चा काळ पुन्हा एकदा फडणवीस-शिंदे-पवार यांच्या काळात पाहायला मिळतोय," असं राऊत यांनी म्हटलं आहे.
राष्ट्रपती राजवट लावण्याचा विचार करावा
"बाबा सिद्दीकी, पूर्णेकर यांच्यावर गोळ्या झाडून हत्या झाली. या राज्याला पूर्णवेळ गृहमंत्री हवा असा आम्ही सांगतो. यांना फक्त विरोधकांना खोट्या गुन्ह्यात अडकवायला गृह विभाग पाहिजे," असा टोला राऊत यांनी लगावला आहे. "राज्य चालवता येत नाही तोपर्यंत राष्ट्रपती राजवट लावण्याचा राज्यपालांनी विचार करावा," असंही राऊत यांनी म्हटलं आहे.
फडणवीसांची विरोधकांवर टीका
मुख्यमंत्री फडणवीस यांनी पत्रकारांशी संवाद साधताना विरोधकांकडून या विषयावरुन राजकारण केलं जात असल्याचा आरोप केला आहे. त्यांनी यावरुन मनसुख हिरेन प्रकरणाची आठवण करुन दिली. "विरोधक ज्यावेळी टीका करतात त्यावेळी त्यांनी मागे वळून बघितलं पाहिजे. हे तेच लोक आहेत त्यांच्या काळामध्ये पोलिसांच्या मदतीने शासन स्पॉन्सर अशा पद्धतीने देशातल्या सर्वात मोठ्या उद्योगपतीच्या घरासमोर बॉम्ब ठेवण्यात आला," असा टोला फडणवीसांनी लगावला. "मनसुख हिरेन यांची हत्या ते कदाचित विसरले आहेत. ट्रान्सफर पोस्टिंगमध्ये घोटाळे झाले. सीबीआयने ते घोटाळे बाहेर काढले. त्याचे सगळे टेलिफोन टॅपिंग आलं. त्यात संपूर्ण वार्तालाप आला या सगळ्या गोष्टी ते विसरले असतील म्हणून बोलत असतील," असं फडणवीस म्हणाले. यावरुन प्रश्न विचारला असता राऊत चांगलेच संतापले.
राऊत संतापून काय म्हणाले?
"तू मागचं काय सांगोतोस? तू मुख्यमंत्री आहे ना? यांचं मानसिक स्वास्थ बिघडलयं वाटतं. यांचा गजनी झालाय," असं राऊत म्हणाले. एवढ्यावरच न थांबता त्यांनी, "मेंदूला बधिरता आलीय. निर्घृण मनाने तुम्ही बारा वर्ष काय करताय? मागील पाच वर्ष तुमचं राज्य आहे. ज्ञानेश कुमार यांनी तुम्हाला निवडून दिलाय ना? हे ज्ञानूचं सरकार आहे. त्यानुसार ते वागत आहेत. तुमच्या अपयशावर बोला. त्यावर तुम्ही बोला मुख्यमंत्री आहात ना? तिरंगा लहरवणाऱ्यांना अटक करता. हातभर फाटली तुमची," अशी टीका राऊत यांनी केली.
