लग्नाच्या मांडवातच नवऱ्यामुलासह त्याच्या नातेवाईकांना जिवंत जाळण्याचा प्रयत्न; कारण समजल्यावर पोलिसही हादरले

नाशिक क्राईम : लग्नाच्या मांडवातच नवऱ्यामुलासह त्याच्या नातेवाईकांना जिवंत जाळण्याचा प्रयत्न करण्यात आला आहे. प्रेम विवाहाच्या रागातून मुलीच्या नातेवाईकांनी हा हल्ला केला. येवला शहरातील एका लॉन्समध्ये हा सगळा प्रकार घडला आहे. या घटनेमुळे परिसरात एकच खळबळ उडाली आहे.  

येवल्यातील तरुणाचं निफाड तालुक्यातील तरुणीसोबत प्रेमसंबंध होते. या दोघांनी पळून जाऊन नोंदणीकृत लग्न केलं. त्यानंतर मुलाच्या नातेवाईकांनी दोघांचा रितसर विवाह सोहळा आयोजित केला. मात्र, प्रेम विवाहाचा राग मनात धरत मुलीच्या नातेवाईकांनी लग्न सोहळ्यात डिझेलचे कॅन ओतून नवरदेव आणि त्याच्या नातेवाकांना जिवंत जाळण्याचा प्रयत्न केला. यावेळी दोन्ही गटात तुंबळ हाणामारी झाली. यात सात ते आठ जण जखमी झालेत. या प्रकरणी पोलिसांनी संशयित आरोपींना ताब्यात घेतलं असून दोन्ही बाजूनं गुन्हा नोंदवला आहे. 

नेमकं काय घडलं?

येवला शहरातील ऋषभ दीपक भगुंडे तरुणाचे निफाड तालुक्यातील रामपूर नैताळे येथील एका तरुणी सोबत प्रेम संबंध होते या दोघांनी पळून जाऊन सप्टेंबर महिन्यात हिंदू विवाह कायद्यांतर्गत नोंदणीकृत विवाह केला होता दरम्यान आज येवला शहरातील एका लॉन्स मध्ये नवरदेवाकडील नातेवाईकांच्या उपस्थितीमध्ये पारंपरिक पद्धतीने विवाह सोहळा आयोजित केला होता.

हा विवाह सोहळा सुरू असताना मुलीच्या नातेवाईकांनी प्रेम विवाहाचा राग मनात ठेवून लग्न सोहळ्यात डिझेलचे कॅन सोबत घेऊन नवरदेव व त्याच्या नातेवाईकांच्या अंगावर डिझेल ओतून जिवंत जाळण्याचा प्रयत्न करून त्यांना मारहाण केली यावेळी नवरदेवच्या नातेवाईकांनी देखील प्रतिकार केल्याने दोन गटात तुंबळ हाणामारी झाल्याने हा सर्व प्रकार उपस्थितांनी आपल्या मोबाईलच्या कॅमेरात कैद केला आहे
दरम्यान या घटनेची माहिती येवला शहर पोलिसांना मिळतात त्यांनी तत्काळ घटनास्थळी दाखल होत संशयित आरोपींना ताब्यात घेतले असून दोन्ही बाजूने गुन्हा नोंदवण्याची प्रक्रिया सुरू सुरू असल्याची माहिती पोलीस सूत्रांनी दिली आहे.

पिकअप वाहनात चोरीछुपे पद्धतीने मृतदेह घेऊन जाणाऱ्या व्यक्तीला अटक

नाशिकच्या येवल्यात संभाजीनगर महामार्गावर गंगा दरवाजा परिसरामध्ये एका छोटा हत्ती पीकअप वाहनांमध्ये मयत झालेल्या इसमाचा मृतदेह घेऊन जाणाऱ्या एका व्यक्तीस पोलिसांनी ताब्यात घेतले आहे.  संशयितरित्या या वाहनातून मृतदेह लपवून नेला जात होता. दरम्यान पोलिसांनी तात्काळ घटनास्थळी दाखल होत मृतदेह उपजिल्हा रुग्णालय येवला येथे पाठवला असून मृत पावलेली व्यक्ती नेमकी नैसर्गिक मृत्यू पावली आहे की काही घातपात झाला आहे या संदर्भात पोलिस आता शोध घेत आहेत.