नाशिकमध्ये निवृत्त सहाय्यक मोटार परिवहन (RTO) अधिकारी हेमंत गोविंद हेमाडे यांनी स्वत:च्या घरात आत्महत्या केली. राहत्या घरात स्वत:वर गोळी झाडून त्यांनी जीवन संपवलं आहे. या घटनेमुळे नाशिक शहरात खळबळ माजली आहे. हेमंत गोविंद हेमाडे यांचं घर सिटी सेंटर मॉल परिसरात आहे. घटनेची माहिती मिळताच पोलिसांनी घटनास्थळावर धाव घेतली. हेमंत हेमाडे यांनी हा टोकाचा निर्णय घेतला याचं कारण अद्याप समोर आलेले नाही. तर पोलिसांनी घटनास्थळी धाव घेत पंचनामा केला असून मृतदेह शवविच्छेदनासाठी सरकारी रुग्णालयात पाठवले आहे.
निवृत्त सहाय्यक मोटार परिवहन (RTO) अधिकारी हेमंत गोविंद हेमाडे यांच्या घरातून गोळीबाराचा आवाज आला. गोळीबाराच्या आवाजाने शेजारच्यांनी त्यांच्या घराकडे धाव घेतली तर हेमंत हे रक्ताच्या थारोळ्यात पडलेले आढळले. मोठ्या प्रमाणात रक्तस्त्राव झाल्यामुळे त्यांच्या जागीच मृत्यू झाला. हेमंत गोविंद हेमाडे यांच्या या टोकाच्या पावलामुळे हेमाडे कुटुंबाला मोठा धक्का बसला आहे. दरम्यान पोलिसांनी घटनास्थळाची झाडाझडती घेतली पण कोणतीही सुसाईट नोट न सापडल्यामुळे आत्महत्येमागील कारण अस्पष्ट आहे.