सरकारने कॉर्पोरेट करात पुरेशी सवलत दिली आहे. मात्र त्यामुळे पगारात वाढ झालेली किंवा नोकरींची निर्मिती झालेली दिसत नाही असे पंतप्रधान नरेंद्र मोदी यांनी म्हटले आहे. कॉर्पोरेट क्षेत्राला मिळणारे फायदे देशातील खासगी क्षेत्रातील कर्मचाऱ्यांपर्यंत पोहोचत नसल्याकडे त्यांनी सर्वांचे लक्ष वेधले. नवी दिल्ली येथे 'फेडरेशन ऑफ इंडियन चेंबर्स ऑफ कॉमर्स अँड इंडस्ट्री' (FICCI) च्या वार्षिक मेळाव्यात ते बोलत होते. त्यांनी यावेळी अधोरेखित केले की, सरकारने मूळ कॉर्पोरेट कर दर 30 टक्क्यांवरून 22 टक्क्यांपर्यंत कमी केला आहे आणि 12 लाख रुपयांपर्यंतच्या वार्षिक पगारावर आयकरातून सूट दिली आहे.
"मला माहित आहे की तुम्ही टाळ्या वाजवणार नाही, कारण तुमची भूक इतकी मोठी आहे की, तुम्हाला कितीही दिले तरी ते कधीच पुरेसे नसते. मी 12 लाख रुपयांपर्यंतच्या उत्पन्नावर आयकर प्राप्तिकर सवलत दिली आहे. पण, तुम्ही कर्मचाऱ्यांची संख्या वाढवली का? किंवा त्यांचे पगार वाढवले का? नाही. नेहमी असेच असते: 'मोदीजी, तुम्हीच करा; आम्ही बघू काय होते ते.' अशा प्रकारे गोष्टी सुरू राहणार आहेत का?", अशी विचारणा त्यांनी केली.
केवळ सरकारनेच विकासाची प्रक्रिया पुढे न्यावी अशी अपेक्षा ठेवण्याऐवजी, कंपन्यांनी आपल्या कर्मचाऱ्यांसाठी अधिक प्रयत्न केले पाहिजेत असे मत त्यांनी यावेळी मांडले. त्यांनी सांगितले की, 12 लाखांपर्यंतच्या उत्पन्नावर मिळालेल्या आयकर सवलतीमुळे लोकांची खरेदीशक्ती वाढली आहे, ज्यामुळे मागणीत वाढ होऊन व्यवसायांचा विस्तार होण्यास मदत होईल.
त्यांनी यावर भर दिला की, कोणताही देश तेव्हाच प्रगती करतो जेव्हा तो आपल्या शेतकऱ्यांचा, संपत्ती निर्माण करणाऱ्यांचा, लघु उद्योगांचा आणि करदात्यांचा आदर करतो. त्यांना दोष देऊन किंवा टीका करून प्रगती होत नाही. पंतप्रधान म्हणाले, "त्यांच्यावर टीका करून किंवा त्यांना अपशब्द वापरून कोणताही देश पुढे जाऊ शकत नाही."
India's growth story is creating new opportunities. Our industries must be ready to seize them. Speaking at FICCI's centenary convention. @ficci_india https://t.co/tJCw2NnpjW
— Narendra Modi (@narendramodi) November 19, 2026
पंतप्रधान मोदींनी उद्योगप्रमुखांनाअसा इशाराही दिला की, देशांतर्गत बाजारपेठ ही हमखास विक्री होणारी जागा आहे हा दृष्टिकोन त्यांनी सोडून दिला पाहिजे. त्याऐवजी, त्यांनी उत्पादनांचा दर्जा सुधारण्यावर आणि जागतिक स्तरावर स्पर्धा करण्यावर लक्ष केंद्रित केले पाहिजे. पंतप्रधान पुढे म्हणाले, "आपली देशांतर्गत बाजारपेठ ही केवळ सोयीची जागा (Comfort Zone) न राहता, जागतिक बाजारपेठेत स्पर्धा करण्यासाठी आपल्याला आत्मविश्वास देणारी ठरायला हवी."
पंतप्रधान मोदींनी यावेळी काही उत्पादनांना एक्सपोर्ट क्वालिटी म्हणून ब्रँडिंग करण्याच्या पद्धतीवरही टीका केली आणि म्हटले की, देशातील नागरिकांनाही दर्जेदार उत्पादने मिळायला हवीत. त्यांनी उद्योग क्षेत्रातील नेत्यांना इतर देशांशी केलेल्या व्यापार करारांचा स्वतःच्या फायद्यासाठी वापर करण्याचे आवाहन केले. असे करार जागतिक बाजारपेठेची दारे उघडतात, ज्यामुळे भारतीय उद्योगांना मोठी संधी मिळते, असेही त्यांनी नमूद केले.
"गेल्या काही वर्षांत भारताने जगभरातील अनेक देशांशी व्यापार करार केले आहेत. 'फिक्की' (FICCI) च्या सदस्यांनो, तुम्ही कधी यावर शांतपणे विचार केला आहे का? जेव्हा जगातील प्रमुख अर्थव्यवस्थांशी मुक्त व्यापार करार केले जातात, तेव्हा त्याचा अर्थ असा होतो की तुमच्यासाठी संधींची दारे उघडली गेली आहेत. या संधींचा लाभ घेण्यासाठी तुम्ही काही योजना आखली आहे का, की मला त्याबद्दलही मार्गदर्शन करावे लागेल?," असा प्रश्नही त्यांनी विचारला.