नाशिकमधील टीसीएस मधील धर्मांतरण आणि महिला कर्मचाऱ्यांच्या शोषण प्रकरणात आज मोठी अपडेट आहे. या प्रकरणात एमआयएम नेते इम्तियाज जलील यांना कोर्टाकडून जामीन मंजूर झाल्यामुळे त्यांना मोठा दिलासा मिळालाय. 50 हजारांच्या जात मुचलक्यावर नाशिक जिल्हा आणि सत्र न्यायालयाने त्यांना जामीन मंजूर केलाय.
एमआयएम नेते इम्तियाज जलील यांच्यावर आरोप आहे की, त्यांनी टीसीएस प्रकरणातील प्रमुख आरोपी निदा खान हिला आश्रय दिला होता. या प्रकरणात त्यांच्याविरोधात गुन्हा दाखल करण्यात आला होता. आज नाशिकच्या जिल्हा आणि सत्र न्यायालयात इम्तियाज जलील यांच्या जामीन अर्जावर सुनावणी झाली. ज्यात त्यांना जामीन मंजूर झाला. या सुनावणीदरम्यान सरकारी पक्षाचे वकील सोनवणे यांनी जलील यांना जामीन न मिळावा यासाठी जोरदार युक्तीवाद केला. तर इम्तियाज जलील यांना का जामीन द्यावा यासाठी त्यांच्या वकील अडव्होकेट अमोल अंधारे यांनी जबरदस्त युक्तीवाद केला. जामीनपात्र गुन्हा असून तपासात पूर्णपणे सहकार्य केले जात असल्याचा इम्तियाज यांच्या वकिलांचा युक्तिवाद केला. दोन्ही बाजूंचा युक्तिवाद पूर्ण झाल्यावर कोर्टाने इम्तियाज जलील यांना जामीन मंजूर केला. ही सुनावणी ए. व्ही. खारकर यांच्या न्यायदालनात झाली.
दरम्यान नगरसेवक मतीन पटेल यांनी जलील यांच्या सांगण्यावरून आश्रय दिल्याचा तपासात दावा करण्यात आला आहे. इम्तियाज जलील यांना हजर राहण्याची न्यायालयाची नोटीस बजावली होती. या नोटीसनंतर आजच्या सुनावणी दरम्यान इम्तियाज जलील कोर्टात हजर झाले होते.