पुणेरी मेट्रोचे उद्धाटन, मेट्रो-3 हिंजवडीचं ट्रॅफिक कसं कमी करेल?, तिकिटाचे दर किती? वाचा A TO Z माहिती

माण–हिंजवडी ते शिवाजीनगर या पुणे मेट्रो लाईन-3 मार्गिकेचे आज पंतप्रधान नरेंद्र मोदी यांच्या हस्ते ऑनलाइन पद्धतीने लोकार्पण झाले. 4 नोव्हेंबरपासून सकाळी 6 वाजल्यापासून 17 स्थानके प्रवाशांसाठी खुली होणार असून, गर्दीच्या वेळेत दर सहा मिनिटांनी मेट्रो धावणार आहे. पुण्याची ही मेट्रो हिंजवडी आयटी पार्कची वाहतूक कोंडी मोठ्या प्रमाणात कमी करणार असून या मेट्रोतून 14 हजार लोक प्रवास करतील अशी शक्यता आहे.

पुणे मेट्रोची मार्गिका 3 याला पिंक लाइन मार्ग नाव देण्यात आलं आहे. तसंच, पुणे आयटी सिटी मेट्रो म्हणूनही ओळख मिळणार आहे. हिंजवडीत आयटी पार्कमुळं मोठी वाहतूक कोंडी होते. पुणेकरांना तासनतास या वाहतूक कोंडीत अडकून राहावे लागत होते. मात्र या मेट्रोमुळं ही वाहतूक कोंडी फोडण्यास मदत होणार आहे.

हिंजवडी आयटी पार्क हे काही दिवसांपूर्वी चर्चेत आले होते. आयटी पार्कमध्ये कार्यरत असणारे अनेक कर्मचारी स्वतःची कार किंवा दुचाकी वापरतात. त्यामुळं येथील रस्त्यांवर प्रचंड वाहतूक कोंडी होते. शिवाजीनगर ते हिंजवडी हे अंतर पार करण्यासाठी सध्या रस्त्याने पीक अवर्समध्ये 1 ते दीड तास लागतो. मात्र मेट्रोमुळं हे अतंर फक्त अर्धा ते पाऊण तासांत पार करता येणार आहे.

मेट्रो स्थानकांवरून आयटी कंपन्यांपर्यंत पोहोचण्यासाठी फीडर बस सेवा, ई-सायकल आणि शेअरिंग रिक्षांचे नियोजन केले जात आहे. यामुळे प्रवाशांना मेट्रोतून उतरून कंपनीत जाणे सोपे होईल आणि मुख्य रस्त्यांवर गर्दी होणार नाही, अशी माहितीही समोर येत आहे.

मेट्रो 3 मार्गिका शिवाजीनगर आणि दिवाणी न्यायालय (Civil Court) इंटरचेंज स्टेशनला जोडली जाईल. त्यामुळे पिंपरी-चिंचवड (PCMC), वनाझ, किंवा रामवाडीहून येणारे प्रवासी थेट मेट्रो बदलून हिंजवडीला जाऊ शकतील. यामुळे संपूर्ण पुण्यातून हिंजवडीकडे जाणाऱ्या खाजगी वाहनांचा ताण कमी होईल.

मेट्रो मार्गिका 3 ही बुधवार 4 नोव्हेंबरपासून सुरू होणार आहे. या मेट्रोतून जिल्हा न्यायालय ते हिंजवडी फेज 3 पर्यंत प्रवास करण्यासाठी 62 रुपये मोजावे लागणार आहेत. पहिल्या टप्प्यात केवळ 17 स्थानकांवर मेट्रो थांबणार असून, तर उर्वरित सहा स्थानके जानेवारीत सुरू होण्याची शक्यता आहे. शिवाजीनगर, बाणेर, बालेवाडी फाटा, बाणेर गाव, बाणेर-पाषाण लिंक रोड आणि भोसलेनगर ही स्थानके सध्या बंद आहेत.

तिकीट दर असे आहेत...

0-2 किमी 12 रुपये
2-4 किमी 25 रुपये
4-8 किमी 37 रुपये
8-12 किमी 45 रुपये
12-18 किमी 49 रुपये
18 किमीच्या पुढे 45 रुपये