कचऱ्याच्या पोत्यात आढळले दोन पाय;सिमकार्ड कव्हरने उघडलं हत्येचं गूढ; 12 तासांत पोलिसांनी कशी केली आरोपीला अटक?

पिंपरी-चिंचवडमधील पिंपळे गुरव परिसरात शुक्रवारी सकाळी एक धक्कादायक प्रकार उघडकीस आला. काटेपुरम चौक ते रामकृष्ण मंगल कार्यालयादरम्यान श्रीनगर गल्ली क्रमांक तीन येथे कचरा गोळा करणाऱ्या कर्मचाऱ्यांना एका पोत्यावर रक्ताचे डाग दिसले. सुरुवातीला त्यांना पोत्यात प्राण्याचे अवशेष असल्याचा संशय आला. पण पुढचा प्रकार पाहून त्यांच्या पायाखालची जमीन सरकरील. कर्मचाऱ्यांनी पोते उघडून पाहिले आणि त्यात गुडघ्यापासून वेगळे केलेले पुरुषाचे दोन पाय  दिसले. त्यांनी तातडीने पोलिसांना माहिती दिली. या घटनेमुळे संपूर्ण परिसरात खळबळ उडाली. काय घडलंय नेमकं? सविस्तर जाणून घेऊया

मृताची ओळख पटली

घटनास्थळी दाखल झालेल्या सांगवी पोलिसांनी तपास सुरू केला. पोत्यामध्ये पोलिसांना एक सिमकार्डचे कव्हर आढळले. त्यावरील मोबाइल क्रमांकाच्या आधारे तपासाची दिशा मिळाली. पोलिसांनी संबंधित क्रमांकाचा माग काढत मृत व्यक्तीच्या कुटुंबीयांपर्यंत पोहोचण्याचा प्रयत्न केला. त्यातून मृताची ओळख अनिल खाडे नावाने पटली. त्यांचे वय 50 वर्षे होते. त्यानंतर अनिल यांचे मित्र आणि त्यांच्या संपर्कातील व्यक्तींची चौकशी सुरू करण्यात आली.

सिमकार्ड कव्हरमुळे उलगडा

पोलिसांनी आजुबाजूच्या परिसरात चौकशी सुरु केली. जवळचे नातेवाईक, शेजारी यांच्याकडे चौकशी केली असता अनिल खाडे यांचा विष्णू उर्फ पिंट्या कुंभार याच्याशी जवळचा संपर्क असल्याची माहिती पोलिसांना मिळाली. त्यानुसार पोलिसांनी विष्णूचा शोध सुरू केला. तपासादरम्यान पोलिसांचे पथक त्याच्या घरी पोहोचले. घराची पाहणी केली असता तेथे अनिल खाडे यांचा उर्वरित मृतदेह आढळला. पोत्यातील सिमकार्ड कव्हरपासून सुरू झालेला तपास अखेर संशयिताच्या घरापर्यंत पोहोचला. या एका महत्त्वाच्या पुराव्यामुळे पोलिसांना हत्येचा उलगडा करण्यात मदत झाली.

दारू पिण्यावरून वाद

अनिल खाडे आणि विष्णू कुंभार हे मित्र होते. दोघांमध्ये मद्यपान करताना वाद झाला. या वादातून विष्णूने अनिल यांच्यावर हल्ला करून त्यांची हत्या केल्याचा आरोप आहे. पोलिसांच्या प्राथमिक तपासात ही माहिती समोर आली. पुरावा नष्ट करण्याच्या उद्देशाने मृतदेहाचे तुकडे करून दोन्ही पाय पोत्यात भरून कचऱ्यात टाकल्याचे तपासात समोर आले आहे.

सांगवी पोलिसांची 12 तासांत कारवाई

या गंभीर गुन्ह्याचा तपास सांगवी पोलिसांनी वेगाने केला. पोत्यात सापडलेले सिमकार्ड कव्हर, मोबाइल क्रमांक आणि मित्रांकडून मिळालेली माहिती या धाग्यांच्या आधारे पोलिसांनी विष्णू तानाजी कुंभार याला अटक केली. अवघ्या 12 तासांत आरोपीपर्यंत पोहोचण्यात पोलिसांना यश आले. पोलीस उपायुक्त संदीप आटोळे, सहायक पोलीस आयुक्त मनीषा कदम आणि वरिष्ठ पोलीस निरीक्षक जितेंद्र कोळी यांच्या मार्गदर्शनाखाली ही कारवाई करण्यात आली. आरोपीविरोधात पुढील कायदेशीर कारवाई सुरू असून या हत्याकांडामागील सर्व बाबींचा तपास पोलीस करत आहेत.