SOCIAL MEDIA

Newsletter

PARTNER SITES
Select Language Select State

उपमुख्यमंत्री एकनाथ शिंदेंच्या हेलिकॉप्टरमध्ये तांत्रिक बिघाड, आत येऊन बसले असतानाच...

उपमुख्यमंत्री एकनाथ शिंदे यांच्या हेलिकॉप्टरमध्ये तांत्रिक बिघाड झाला आहे.

Reported By Shivraj Yadav Written By Shivraj Yadav
Published: Nov 19, 2026, 16:20 IST | Updated: Nov 19, 2026, 17:07 IST
Image Credit: एकनाथ शिंदेंच्या हेलिकॉप्टरमध्ये तांत्रिक बिघाड
Join

उपमुख्यमंत्री एकनाथ शिंदे यांच्या हेलिकॉप्टरमध्ये तांत्रिक बिघाड झाला आहे. उपमुख्यमंत्री एकनाथ शिंदे पंढरपूर येथून मुंबईकडे येत असताना विमानात तांत्रिक बिघाड झाला. उपमुख्यमंत्री एकनाथ शिंदे हेलिकॉप्टरमध्ये बसले असतानाच हा तांत्रिक बिघाड लक्षात आला. दरम्यान या बिघाडामुळे त्यांच्या मुंबई प्रवासाला उशीर झाला, यानंतर एकनाथ शिंदे कारने मुंबईला रवाना झाले.   

एकनाथ शिंदे पंढरपूर येथून मुंबईला येण्यासाठी हेलिपॅडवर पोहोचले होते. ते हेलिकॉप्टरमध्ये बसलेले असतानाच त्यात तांत्रिक बिघाड असल्याचं समोर आलं. हा बिघाड दुरुस्त होण्यासाठी बराच वेळ लागणार असल्याचं सांगण्यात आलं. यानंतर एकनाथ शिंदे यांनी तिथे उपस्थित अधिकारी, जिल्हाधिकारी आणि इतरांशी चर्चा केली. सूर्यास्तानंतर हेलिकॉप्टरने प्रवास करणे अधिक जोखमीचे असेल असं सांगण्यात आलं. तसंच मुंबईला पोहोचण्यासही उशीर होण्याची शक्यता व्यक्त करण्यात आली.

अखेर चर्चेअंती आणि सल्ल्यानुसार एकनाथ शिंदे यांनी रस्त्याने कारने जाण्याचा निर्णय घेतला. त्यांच्यासोबत आमदार उत्तम जानकर आणि स्वीय्य सहाय्यक आहेत. यामुळे एकनाथ शिंदे आपल्या ताफ्यासह मुंबईच्या दिशेने प्रवास करत आहेत.

'दुसरं इंजिनच सुरु झालं नाही'

आमदार अभिजीत पाटील यांनी दिलेल्या माहितीनुसार, "आताच एकनाथ शिंदे पंढरपूर दौऱ्यावर आले होते. पंढरपुरात त्यांनी आढावा बैठक घेतली. सर्व वारकरी आणि सोयी सुविधांची त्यांनी माहिती घेतली. 3.30 वाजता ते टेक ऑफ करणार होते. मात्र आढाव बैठकीत उशीर झाला. हेलिकॉप्टरमध्ये येऊन बसले होते. पहिलं इंजिन सुरु झालं, मात्र दुसरं इंजिन सुरु बॅटरी कमी असल्याने सुरु झालं नाही. पायलटने प्रयत्न केल्यानंतर सुरु होत नसल्याने जिल्हाधिकारी, एसपी आणि आम्ही सर्व आमदारांनी जोखीम न घेता कारने पुण्याला जाण्याची विनंती केली. ती मान्य करत ते पुण्यापर्यंत कारने जाणार असून, त्यानंतर पुढील प्रवास करतील". 

कार्तिकी एकादशीनिमित्त एकनाथ शिंदे पंढरपूर दौऱ्यावर होते. कार्तिकी यात्रेसाठी प्रशासनाने केलेल्या तयारीवर उपमुख्यमंत्री एकनाथ शिंदे यांनी समाधान व्यक्त केले, कार्तिकी यात्रेसाठी प्रशासनाला पाच कोटी रुपयाचा निधी एकनाथ शिंदे यांनी दिला असून रस्त्याची कामे आणि इतर खर्चासाठी हा निधी देण्यात आला आहे.
 

एकनाथ शिंदे यांच्या हेलिकॉप्टरशी संबंधित प्रमुख घटना

1) ऑक्टोबर 2023 – खराब हवामानामुळे हेलिकॉप्टर मुंबईत परत
- मुंबईहून साताऱ्यातील दरे गावाकडे जात असताना खराब हवामानामुळे हेलिकॉप्टरचे उड्डाण वळवण्यात आले.
- दरे गावाजवळ पोहोचण्याआधी हेलिकॉप्टर जुहूच्या दिशेने परत आणण्यात आले.
- ही घटना तांत्रिक बिघाडामुळे नव्हे, तर हवामानामुळे घडली.

2) ऑक्टोबर 2024 – साताऱ्यात हेलिकॉप्टरचे इमर्जन्सी लँडिंग
- 18 ऑक्टोबर 2024 रोजी दरे गावातून पुण्याच्या दिशेने जाताना अचानक पावसाळी आणि ढगाळ वातावरण निर्माण झाले.
- टेक ऑफनंतर सुमारे पाच मिनिटांत हेलिकॉप्टर पुन्हा दरे येथे उतरवण्यात आले.
- कोयना जलाशयाच्या परिसरात खराब हवामानामुळे धोका निर्माण झाला होता.
- त्यानंतर शिंदे रस्तेमार्गे पुण्याकडे रवाना झाले.

3) मे 2026 – ऐरोलीजवळ वादळ, हेलिकॉप्टर पुन्हा मुंबईत
7 मे 2026 रोजी मुंबईच्या महालक्ष्मी रेसकोर्सवरून मुरबाडच्या दिशेने हेलिकॉप्टरने उड्डाण केले.
ऐरोलीजवळ पोहोचल्यावर पुढे धुळीचे वादळ आणि खराब हवामान दिसून आले.
पायलटने संभाव्य धोका लक्षात घेऊन हेलिकॉप्टरचा मार्ग बदलला.
हेलिकॉप्टर जुहू येथील पवन हंस हेलिपॅडवर सुरक्षित उतरवण्यात आले.

4) सप्टेंबर 2026 – गुजरात दौऱ्यात तांत्रिक बिघाड
17 सप्टेंबर 2026 रोजी गुजरात दौऱ्यादरम्यान वडनगर येथून अहमदाबादला जाण्याची तयारी सुरू होती.
उड्डाणापूर्वी हेलिकॉप्टरमध्ये तांत्रिक अडचण आढळली.
सुरक्षेच्या कारणास्तव हेलिकॉप्टरचे उड्डाण रद्द करण्यात आले.
एकनाथ शिंदे नंतर कारने अहमदाबादला रवाना झाले.

Add Zee News as a Preferred Source
TAGS:

About the Author

शिवराज यादव झी 24 तास डिजिटलमध्ये सीनिअर सब एडिटर म्हणून कार्यरत आहेत. राज्यासह देश, विदेशातील चालू घडामोडींसह राजकीय, गुन्हेगारी विषयांवरील लिखाण ते करतात. हे लिखाण करताना ते सखोल पद्धतीने करण्याकडे कल असतो. वाचकाला बातमी अत्यंत सहजपणे समजावी यासाठी ती समजेल अशा पद्धतीने लिहितात. याशिवाय क्रीडा, मनोरंजन यांचीही आवड असल्याने त्या क्षेत्राशी संबंधित घडामोडींवरही लिखाण करतात.करिअरशिवराज यांनी 2009 मध्ये आपल्या पत्रकारितेतील करिअरला सुरुवात केली. सर्वात आधी Fotocorp संस्थेत कॅप्शन रायटर म्हणून काम केल्यानंतर पुढील 7 वर्ष त्यांनी टीव्हीमध्ये प्रदीर्घ अनुभव घेतला. लोकमतमधून ऑनलाइन पत्रकारितेला त्यांनी सुरुवात केली. त्यानंतर लोकसत्ता आणि सध्या झी 24 तास अशाप्रकारे त्यांच्याकडे 9 वर्षांचा अनुभव आहे.शैक्षणिक पार्श्वभूमीशिवराज यादव यांनी मुंबईतच आपलं शिक्षण पूर्ण केलं. मुंबई विद्यापीठ मान्यताप्राप्त एमडी कॉलेजमध्ये त्यांनी आर्टसमधून 12 वी उत्तीर्ण केली. यानंतर पुढील 3 वर्षं BMM मधून शिक्षण घेत पत्रकारितेत पदवी घेतली. यादरम्यान बातम्यांचं जग, त्याची समाजाला असणारी गरज आणि त्याचं महत्व याबद्दल चांगली समज निर्माण झाली.लेखन शैली आणि दृष्टीकोणशिवराज यांचं म्हणणं आहे की, प्रत्येक व्यक्तीला आपल्या आजुबाजूला तसंच देश, विदेशात नेमक्या कोणत्या घडामोडी घडत आहेत हे माहिती असलं पाहिजे. ही जबाबदारी माध्यमांवर जास्त असून, त्यांनी ती अवितरपणे पार पडली पाहिजे. प्रत्येक माहिती जशीच्या तशी वाचकांपर्यंत पोहोचवताना माध्यमांच्या खांद्यावर मोठी जबाबदारी असते.कोणत्या विषयांची सखोल जाणराजकीय घडामोडीचालू घडामोडीमनोरंजनक्रीडा
Read More

ZEENEWS TRENDING STORIES