'अमित शाह, कुऱ्हाडीचा आवाज येतो पण... '; राज ठाकरेंनी कर्जतच्या सभेतून दिला जाहीर इशारा, 'गुजरातची दोन माणसं आमचा महाराष्ट्र...'

गुजरातमधली दोन माणसं आमचा महाराष्ट्र चालवणार, सह्याद्री पोखरणार असा शब्दांत मनसे अध्यक्ष राज ठाकरेंनी संताप व्यक्त केला आहे. यावेळी त्यांनी केंद्रीय गृहमंत्री अमित शाह यांना कुऱ्हाडीचा आवाज येतो, पण देवाच्या काठीचा आवाज येत नाही अशा शब्दांत इशाराही दिला. कर्जतमधील वृक्षतोडीविरोधात आयोजित सभेत बोलताना त्यांनी मुख्यमंत्री देवेंद्र फडणवीस यांच्यासह सत्ताधारी आमदार, खासदार यांच्यावरही ताशेरे ओढले.

"अमित शाह मला तुम्हाला सांगायचं आहे की, मेहता वैगेरे सगळे तुमचे मित्र असतील. कुऱ्हाडीचा आवाज येतो, पण देवाच्या काटीचा आवाज येत नाही. ती ज्या दिवशी बसेल तेव्हा तुम्हाला आपण काय पापं केली आहेत ते कळेल," असं राज ठाकरे म्हणाले आहेत.

गुजरातमधली दोन माणसं आमचा महाराष्ट्र चालवणार, सह्याद्री पोखरणार

"गुजरात्यांसाठी जंगल कापलं आहे. या प्रकल्पांची गरज काय? मुख्यमंत्री, उपमुख्यमंत्री यांना केंद्रातल्या दोघांकडून शून्य किंमत आहे. आम्ही जे सांगू ते महाराष्ट्रात झालं पाहिजे. महाराष्ट्र गुजरात्यांच्या हातात जायला नको हे मी विधानसभेत सांगत होतो. ही हिंमत तुमच्यातूनच येते . निवडणूकीच्या तोंडावर जात, धर्म, पैशाच्या नावावर यांना मतदान करायचं. स्वत: मुख्यमंत्र्यांनीच सांगितलं की केंद्राने ठरवलं हा प्रकल्प करायचा. गुजरातमधली दोन माणसं आमचा महाराष्ट्र चालवणार, सह्याद्री पोखरणार," असा संताप राज ठाकरेंनी व्यक्त केला आहे.

महाराष्ट्र एकत्र आला पाहिजे

"महाराष्ट्र कुठे घेऊन चाललो आहोत. महाराष्ट्राला राग येत नाही, चीड येत नाही. आम्ही रोजच्या व्यवहारात गुंतलो आहोत. कुठेही संकट आलं तरी महाराष्ट्र एकत्र आला पाहिजे. नाहीतर यांनी हवं ते साध्य करता येईल," असं आवाहन राज ठाकरेंनी केलं आहे. 

छत्रपतींना काय वाटत असेल याचा विचार करा

महाराष्ट्रातील आमदार खासदार करतात काय? इतके लाचार का झाले आहेत. एकजण बोलत नाही. सत्तेवर तुम्ही बसवलंत आणि ते पद जाईल म्हणून तुमच्याबद्दल बोलायला तयार होत नाहीत. काय करायचं या लोकांचं? कशासाठी निवडून देत आहात? एकदा आकाशात पाहा आणि छत्रपतींना काय वाटत असेल याचा विचार करा. ज्या सह्याद्रीवर मी खेळलो, बागडलो.  शत्रुला ज्या सह्याद्रीवर संपवला तोच आज महाराष्ट्रात संपवला जात आहे आणि आपण सगळे हतबल बनून पाहत आहोत. महाराजांना नुसचे हार घालून काय फायदा? असं संतापही त्यांनी व्यक्त केला. यावेळी त्यांनी महाराजांचं आज्ञापत्र वाचून दाखवलं ज्यामध्ये झाडं लेकरांप्राणे वागवावीत असं सांगण्यात आलं होतं. 
 

तुम्हाला अल्पमतात आणत आहेत

संपूर्ण सह्याद्रीच्या कुशीत 23 प्रकल्प येत आहेत. त्यातील काही बाहेरचे आहेत. तीन प्रकल्प केंद्र सरकारचे आहेत आणि बाकी 20 अदानी हायड्रो, मेघा इंजिनिअरिंग, जेएसडब्ल्यू, टाटा, अदानी, ग्रीनको यांचे आहेत सांगत त्यांनी यादीच वाचून दाखवली. हे सर्व खासगी प्रकल्प आहेत. मी पैसे टाकतो जंगल तोडून द्या, माणसं मारुन द्या सांगतात. 236 वीजनिमिर्तीचे प्रकल्प येत आहे. पुढील गोष्टींसाठी हे प्कल्प येत आहेत. कोळशावर चालणारे 40 प्रकल्प येत आहेत. कोणासाठी प्रकल्प येत आहेत? कोणासाठी, कशासाठी आणत आहेत? नीट गोष्टी पाहिल्या तर मतदारसंघ फोडत आहेत. तुम्हाला अल्पमतात आणत आहेत. तुम्ही कमी होणार आणि बाकीचे वाढणार. त्यासाठी वीज रस्ते हवेत. पण आम्ही बेसावध आहोत अशी खंत त्यांनी व्यक्त केली.