लवकरच भिवंडीत धावणार मेट्रो, आता मुंबईत येणे सोप्पे होणार; मेट्रो 5 प्रकल्पाबाबत मोठी अपडेट

ठाणे-भिवंडीतील नागरिकांसाठी आनंदाची बातमी समोर येतेय. लवकरच ठाणे-भिवंडीत मेट्रो धावणार आहे. ठाणे-भिवंडी मार्गिकेवर महिनाअखेरीस मेट्रो गाडीच्या चाचण्यांना सुरुवात होणार आहे. ठाणे-भिवंडी मेट्रो 5 मार्गिकेच्या रुळांवर पहिली गाडी दाखल झाली आहे.

नवरात्रीच्या दिवशी ठाणे-भिवंडी मेट्रो 5 मार्गिकेवर ही गाडी आणण्यात आली.  लवकरच या गाडीच्या चाचण्यांना या महिन्याच्या अखेरीस सुरुवात होणार आहे. त्या पूर्ण होताच पुढील वर्षाच्या सुरुवातीला या मेट्रोवर गाडी धावण्याचा मार्ग मोकळा झाला आहे. मेट्रो 5 मार्गिका ही 11.9 किमी लांबीची असून त्यावर सहा स्थानके आहेत. सद्यस्थितीत या मार्गिकेवर यंत्रणेची आणि अंतिम फिनिशिंगची कामे सुरू आहेत.

पहिल्या टप्प्यात मेट्रो गाडीच्या सुरक्षिततेशी संबंधित चाचण्या केल्या जाणार आहेत. तसंच, या मेट्रोवरील चाचण्या आणि सुरक्षा तपासण्या पूर्ण झाल्यानंतर अंतिम तपासणीसाठी सीएमआरएस पथकाला बोलवण्यात येणार आहे.

कशी असेल मार्गिका?

मेट्रो 5चा पहिला टप्पा ठाणे ते धामणकर नाका असा असेल. पहिल्या टप्प्यात 11.9 किमी अशी धावणार आहे. या मार्गिकेवर बाळकुम, कशेळीस, काल्हेर, पूर्णा, अंजूरफाटा, धामणकर नाका अशी 6 स्थानके असणार आहेत. तर या प्रकल्पाचा अंदाजित खर्च 6,741 कोटी रुपये इतका आहे.

कारशेड पूर्ण होईपर्यंत पिटलाईनवरून सेवा सुरू करणार

कशेळी टोल नाक्याजवळ 27 हेक्टर जागेवर मेट्रो मार्गिकेच्या कारशेडचे काम सुरू आहे. कारशेड कशेळी टोल नाक्याजवळ सुमारे 27  हेक्टर जागेवर उभारले जात आहे. मेट्रो 5 मार्गिकेच्या तिन्ही टप्प्यातील सुमारे 32 किमी मार्गासाठी हे कारशेड उभारले जात आहे.

या कारशेडचे काम सुरू आहे. हे काम पूर्ण होण्यासाठी आणखी काही वर्ष लागण्याची चिन्हे आहेत. त्यामुळे कारशेडचे काम पूर्ण होईपर्यंत मेट्रो मागिंकेचा पहिला टप्पा सुरू करण्यासाठी तात्पुरत्या स्वरूपातील पिट लाईन उभारण्यात आली आहेत.

कसा असेल प्रकल्प?

मेट्रो मार्ग-5 (ठाणे- भिवंडी- कल्याण ) या प्रकल्पाची एकूण लांबी 24.9  कि .मी आहे. या मार्गामध्ये 15 मेट्रो स्थानके आहेत. सध्या सुरू असलेल्या मेट्रो मार्ग -4 (वडाळा ते कासारवडवली) आणि प्रस्तावित मेट्रो मार्ग- 12 (कल्याण ते तळोजा) आणि मध्य रेल्वे यांच्यात परस्पर एकीकरण साधण्यात येईल. हा मेट्रो मार्ग सध्याच्या प्रवासाची वेळ 50 % ते 75 % पर्यंत कमी करेल

कोणती 15 स्थानके

1. बाळकुम नाका, 2. कशेळी, 3. काल्हेर, 4. पूर्णा, 5.अंजुरफाटा, 6. धामणकर नाका, 7. भिवंडी, 8. गोपाळ नगर, 9. टेमघर, 10. रजनोली, 11. गोव गाव, 12 कोन गाव, 13. लाल चौकी, 14. कल्याण स्टेशन, 15. कल्याण एपीएमसी.