भिवंडीकरांना थेट मुंबई गाठता येणार; ठाणे-भिवंडी-कल्याण मेट्रो मार्गिकेबाबत मोठी अपडेट, मेट्रो 5 चा आणखी विस्तार होणार
ठाणे-भिवंडी-कल्याण मेट्रो 5 मार्गिकेबाबत एक महत्त्वाची माहिती समोर येतेय. या मार्गिकेच्या दुसऱ्या व तिसऱ्या टप्प्यात मेट्रो धावणार आहे.
ठाणे-भिवंडी मेट्रो 5 मार्गिकेच्या कामाला गती आली आहे. येत्या काही दिवसांत या मार्गिकेचा पहिला टप्पा सुरू होण्याची शक्यता आहे. त्याचबरोबर, मेट्रोच्या दुसऱ्या आणि तिसऱ्या टप्प्याबाबतही गुड न्यूज समोर आली आहे. मेट्रो 5 मार्गिकेचा 2 आणि 3 रा टप्पा यासाठी एमएमआरडीएने निविदा जारी केली आहे. यामुळं मेट्रो 5 मार्गिकेचा विस्तार असलेल्या धामणकर नाका ते दुर्गाडी चौक मेट्रो 5 टप्पा 2, दुर्गाडी ते कल्याण मेट्रो 5 अ आणि भोईरवाडी ते उल्हासनगर मेट्रो 5 अ विस्तारीत मार्ग प्रकल्पाचा मार्ग मोकळा झाला आहे.
मुंबई मेट्रो मार्गिका 5 ही ऑरेंज लाइन म्हणून ओखळली जाते. ही मार्गिका ठाणे कापूरबावडी ते कल्याण पर्यंत साधारण 24.90 किमी लांब असून यात 17 स्थानके प्रस्तावित होती. मात्र आता या मार्गिकेचा विस्तार करण्यात आला असून 2 आणि 3 टप्प्यांतर्गंत ही मार्गिका 34 किमीपर्यंत वाढवण्यात आली आहे. त्यानंतर यातील स्थानकांची संख्या 19 झाली आहे. येत्या काही महिन्यात या मेट्रोच्या कामाला सुरुवात होणार आहे.
एमएमआरडीएकडून मेट्रो 5 मार्गिकेच्या टप्पा 1 अंतर्गंत कापूरबावडी ते धामणकर नाका असा 11.90 किमीचा मार्ग उभारण्यात येत आहे. याची 100 टक्के कामे पूर्ण झाली असून यंत्रणेची कामे आणि चाचण्या सुरू आहेत. हा मार्ग पुढील वर्षापर्यंत प्रवाशांच्या सेवेत दाखव करण्याचा एमएमआरडीएचा प्रयत्न आहे.
आता मेट्रो 5 च्या धामणकर नाका ते दुर्गाडी टप्पा 2 या 10.48 किमीच्या मार्गाची उभारणी एमएमआरडीएकडून करणार आहे. त्यापुढे मेट्रो 5 टप्पा 3 अंतर्गत दुर्गाडी ते कल्याण मेट्रो 5 अ असा 6.51 किमी आणि पुढे भोईरवाडी ते उल्हासनगर स्पर मार्ग 5 अ 17.21 किमीचा मार्ग उभारणार आहे. या तिन्ही टप्प्यांचा मिळून 34 किमीची मेट्रोची उभारणी होणार असून त्यात 19 स्थानके असतील.
इंटरचेंज कसं असतील
मेट्रो 5 ही मार्गिका कापूरबावडी मेट्रो लाइन 4 सोबत परस्पर जोडणी प्रदान करेल. त्याचबरोबर, कल्याण-तळोजा या मेट्रो मार्गिका 12 सोबत थेट जोडण्यात येणार आहे. त्याचबरोबर, मध्य रेल्वेसोबतही कनेक्टिव्हीटी मिळणार आहे. या मेट्रो मार्गिकेसाठी कशेळी येथे 27 हेक्टर क्षेत्रात कारशेड करण्यात येत आहे.
अशी असतील स्थानके
१. बाळकुम नाका, २. कशेळी, ३. काल्हेर, ४. पूर्णा, ५.अंजुरफाटा, ६. धामणकर नाका, ७. भिवंडी, ८. गोपाळ नगर, ९. टेमघर, १०. रजनोली, ११. गोव गाव, १२ कोन गाव, १३. लाल चौकी, १४. कल्याण स्टेशन, १५. कल्याण एपीएमसी.
