दिल्लीच्या राजकारणात मोठी घडामोड! सुनेत्रा पवारांशिवाय राष्ट्रवादीचे नेते अमित शाहांच्या भेटीला

दिल्लीतील राजकारणातून मोठी घडामोड घडली आहे. राष्ट्रवादींच्या नेत्यांनी केंद्रीय गृहमंत्री अमित शाहांची भेट घेतली आहे. विशेष म्हणजे राष्ट्रवादीचे नेत्यांसोबत उपमुख्यमंत्री आणि पक्षाच्या अध्यक्षा सुनेत्रा पवार आणि पार्थ पवार नसल्याने देशासह महाराष्ट्रातील राजकीय वर्तुळात चर्चांना उधाण आलं आहे. अमित शाह यांना भेटण्यासाठी सुनील तटकरे, प्रफुल्ल पटेल, छगन भुजबळ, दिलीप वळसे पाटील, धनंजय मुंडे आणि हसन मुश्रीफही गेले होते. रविवारी रात्री ही भेट झाली. बंद दरवाज्यामागे नेमकं काय बोलणं झालं हे अद्याप गुलदस्त्यात आहे. पण गेल्या काही दिवसांपूर्वी अर्थ खात पुन्हा राष्ट्रवादीकडे येणार अशा आशयाचा बातमी आली होती. त्यामुळे अमित शाहांसोबत अर्थ खात्याबाबत काही बोलणं झालं का, अशी चर्चा राजकीय वर्तुळात रंगली आहे. गेल्या काही दिवसांपासून महाराष्ट्राच्या राजकारणात राष्ट्रवादी काँग्रेसमध्ये अंतर्गत मतभेद असून पक्षात दोन गट पडल्याची बातम्या अनेक वेळा समोर आल्या आहेत. त्यामुळे या भेटीमुळे अनेक तर्क-वितर्क लावण्यात येत आहे. 

राष्ट्रवादी काँग्रेस पक्षाची आज कोअर कमिटीची बैठक 

तर इकडे महाराष्ट्रात आज संध्याकाळी 5 वाजता देवगिरीवर बंगल्यावर राष्ट्रवादी काँग्रेस पक्षाची कोअरची बैठकी होणार आहे. या बैठकीला पक्षाच्या अध्यक्षा सुनेत्रा पवार, प्रफुल्ल पटेल, सुनील तटकरे यांच्यासह इतर प्रमुख नेते उपस्थित राहणार आहे. विधान परिषदेच्या निवडणुकीत झालेल्या पराभवानंतर होत असलेल्या या बैठकीला विशेष महत्त्व आहे. पक्षांतर्गत विविध विषयांवर चर्चा होणार आहे, अशी माहिती राजकीय सूत्रांनी दिली आहे. 

राष्ट्रवादी काँग्रेस पक्षाच्या आमदारांची महत्त्वपूर्ण बैठक

तरदुसरीकडे राष्ट्रवादी काँग्रेस पक्षाच्या आमदारांची मंगळवारी संध्याकाळी 7 वाजता महत्त्वपूर्ण बैठक होणार आहे. सुनेत्रा पवार यांच्या उपस्थितीत ही बैठक पार पडणार आहे. दर मंगळवारी होणारी आमदारांची नियमित बैठक गेल्या काही आठवड्यांपासून होत नसल्याने पक्षातील आमदारांमध्ये नाराजी पसरली होती.  त्यामुळे अनेक आठवड्यांच्या प्रतीक्षेनंतर उद्या ही बैठक होत असल्याने या बैठकीकडे सर्वांचे लक्ष लागले आहे. या बैठकीत आगामी रणनीती आणि पक्ष संघटनेबाबत चर्चेसोबत आमदारांच्या मतदारसंघातील कामांबाबद्दल देखील चर्चा होणार आहे.