'नरेंद्र मोदींना जाऊ देणार नाही, तिहार जेलच्या...'; संजय राऊतांचं मोठं विधान, 'त्यांच्यावर खटला चालेल'

काँग्रेसचे खासदार राहुल गांधी यांनी पंतप्रधान नरेंद्र मोदींना कुठेही जाऊ देणार नाही असं विधान केलं असून, शिवसेना खासदार संजय राऊतांनी त्याचा पुनरुच्चार केला आहे. राहुल गांधी अगदी योग्य बोलले आहेत. आम्ही त्यांना कुठे जाऊ देणार नाही, कुठे पळू देणार नाही. मोदी इथेच राहतील, त्यांच्यावर खटले चालतील आणि त्यांची कंपनी इथेच तुरुंगात जाईल असं मोठं विधान संजय राऊतांनी माध्यमांशी संवाद साधताना केलं आहे. भाजपाची नजर कमजोर आहे. त्यांना जवळचं दिसत नाही आणि लांबचंही दिसत नाही. त्यांना नेत्रदान करण्याची गरज आहे असं प्रत्युत्तरही त्यांनी गर्दीवरुन होणाऱ्या टीकेवर दिलं आहे.

"मोदी जाणार नाहीत हे बरोबर आहे आणि त्यांनी जाऊही नये. मोदी येथेच राहतील, तिहार जेलच्या आसपासच हे सर्व लोक राहतील. आम्ही मोदींना सोडणार नाही. देशात मागील 12 वर्षात इतके कांड केले आहेत की देश सोडून जाऊ देणार नाही. ना अमित शाह, ना ज्ञानेश कुमार यांना," असं संजय राऊतांनी म्हटलं आहे.

काँग्रसेची रॅली फ्लॉप शो असल्याची टीका भाजपाकडून होत आहे. त्यावर ते म्हणाले की, "भाजपाची नजर कमजोर आहे. त्यांना जवळचंही दिसत नाही आणि लांबचं दिसत नाही. रामलीला मैदान आम्ही डोळ्याने पाहत होतो. ते ओसांडून वाहत होतं. अनेक ठिकाणी अमित शाहांकडून गर्दी अडवण्यात आली होती. कालची रॅली यशस्वी झाली. जो संदेश द्यायचा होता तो देण्यात आला तो म्हणजे, की ज्ञानेश कुमार, मोदी आणि शाहांना जावं लागेल".

पुढे ते म्हणाले की, "ती फक्त एक गर्दी नव्हती तर संघर्ष करण्यासाठी लोक रस्त्यावर उतरले होते. 1974 नंतर इतकी मोठी रॅली झाली नाही. जयप्रकाश नाराणय यांनी तेव्हा लोकशाहीच्या रक्षणासाठी चलो दिल्ली घोषणा दिली होती आणि जनता रस्त्यावर उतरली होती. त्यानंतर इतकी मोठी रॅली झालेली नाही. लोकशाही वाचवायची आणि पापी, जुलमी सरकरला हटवायचं या मुद्द्यावर 1974 मध्ये आणि आता राहुल गांधींनी आवाहन केलं ते यशस्वी झालं".

"मोदी, शाह, ज्ञानेश कुमार यांची जाण्याची वेळ आली आहे. जनता मोदींविरोधात उसळली आहे. अंधभक्तांना कोणी किंमत देत नाही. त्यांना बाहेर काय सुरु आहे माहिती नाही. झोपेच्या गोळ्या घेतात आणि सकाळी उठून काहीही बोलतात," असा टोला त्यांनी लगावला.

"राहुल गांधींना पंतप्रधान करायचं का हे अमित शाह ठरवणार नाहीत, ते जनता ठरवणार. भाजपा नेते म्हणतात हे जनेतेने निवडून दिलेलं सरकार आहे. पण ज्ञानेश कुमार यांच्या मेहरबानाने निवडून आले आहेत," अशीही टीका त्यांनी केली.  

बांगलादेशची लोकसंख्या 15 कोटी आहे आणि त्यातील 13.5 कोटी इथे कधी आले? आले असतील तर अमित शाहांचं अपयश आहे. त्यांनी तात्काळ पद सोडलं पाहिजे, मोदींनी त्यांना मुक्त केलं पाहिजे असं ते म्हणाले. लेड लडाख, अरुणाचलमध्ये चीन घुसलं आहे त्यावर बोलत नाही आणि चीनचे फंडिंग असल्याचा आरोप करता अशी टीका त्यांनी केली.

कर्जतमध्ये आता एकही झाड तुटणार नाही. 287 वं झाड तुटणार नाही, त्यांनी तोडूनच दाखवावं. आज ठाकरेंच्या नेतृत्वाखाली शिवसेना, संघर्ष समिती, मनसे, काँग्रेस, एनसीपी आम्ही सगळ्यांनी कर्जत बंद करायचं ठरवलं आहे असं ते म्हणाले. तसंच मुख्यमंत्र्यांनी मनात आणलं तर पूर्णेकर प्रकरणी न्याय मिळेल. त्यांनी जर ठाण्यातील गुडंशाहीपुढे गुडघे टेकले असतील तर न्याय मिळणार नाही असा आरोप केला.