धक्कादायक! सासूने जावयाला घरी बोलावलं अन् नंतर...; सत्य उघड झाल्यानंतर अख्खा गाव हादरला, टीव्ही टॉवरजवळ...

एका व्यक्तीने आपली पत्नी आणि सासूविरोधात पोलीस ठाण्यात तक्रार दाखल करत धक्कादायक आरोप केले आहेत. दोघांनी आपल्यावर इस्लाम धर्म स्वीकारण्यासाठी दबाव टाकल्याचा त्याचा आरोप आहे. इतकंच नाही तर त्याला गुवाहाटीमधील एका निर्जन ठिकाणी नेऊन त्याच्या इच्छेविरुद्ध त्याची सुंता (circumcision) करण्यात आल्याचाही दावा केला आहे. तक्रारदार अखिल कुमार चांडकने याप्रकरणी भांगागड पोलीस ठाण्यात आपली 24 वर्षीय पत्नी नुरशिका बेगम आणि तिची 36 वर्षीय आई नूर खातून यांच्या विरोधात एफआयआर (FIR) दाखल केला आहे. जावयाच्या तक्रारीनंतर सासूला अटक करण्यात आली आहे. दरम्यान पत्नी बंगळुरुत असून तिला तपासात सहभागी होण्यास सांगितलं आहे.

अखिल कुमारने दिलेल्या माहितीनुसार, 2019 मध्ये त्याची नुरशिकाशी दिल्लीत भेट झाली होती. त्यानंतर त्यांनी आसाममध्ये कोर्टात लग्न केलं. ते सुमारे तीन वर्षे एकत्र राहिले. सुरुवातीच्या काळात धर्मावरून त्यांच्यात कोणतेही मोठे मतभेद नव्हते असेही त्याने सांगितले.

धर्मांतरासाठीचा कथित दबाव कसा सुरू झाला?

अखिल कुमारने दावा केला आहे की, जेव्हा त्यांच्या पत्नीच्या कुटुंबाला आणि तिच्या गावातील लोकांना तो हिंदू आहे समजले तेव्हा अचानक बदल घडले. त्याने सांगितले की, नुरशिकाने फेसबुकवर सिंदूर लावलेला एक फोटो अपलोड केला होता, ज्यावरून गावकर्‍यांना त्यांच्या आंतरधर्मीय विवाहाबद्दल माहिती मिळाली. त्यानंतरच त्याच्यावर इस्लाम स्वीकारण्यासाठी दबाव टाकण्यास सुरुवात झाली, असा आरोप त्याने केला.

"सुरुवातीला सर्व काही सामान्य होते. मी त्यांच्या घरी सुमारे दहा दिवस राहिलो आणि तिच्या कुटुंबीयांनी मला चांगली वागणूक दिली. त्यावेळी धर्मांतराबाबत कोणतीही चर्चा झाली नव्हती. गावातील लोकांना जेव्हा हे समजले की तिने एका हिंदू पुरुषाशी विवाह केला आहे, तेव्हा खूप नंतर दबाव टाकण्यास सुरुवात झाली," असं त्याने सांगितले आहे.  

गुवाहाटीच्या टीव्ही टॉवरजवळ काय घडले?

वाद झाल्यानंतर पत्नी सुमारे सहा महिन्यांपूर्वी आपल्या गावी निघून गेली होती असं त्याने सांगितलं. यानंतर सासूने आपल्याला वाद मिटवण्यासाठी फोन करुन बोलावले अशी माहिती दिली.

अखिल कुमारच्या म्हणण्यानुसार, त्याला जालुकबारी येथे पोहोचण्यास सांगण्यात आले होते. तिथे दोन अनोळखी व्यक्तींनी त्याला एका गाडीत बसवले. ते नातेवाईक आहेत असे मला सांगण्यात आले होते. त्यानंतर ते त्यांना टीव्ही टॉवर परिसराच्या दिशेने घेऊन गेले.

अखिल कुमार यांचा आरोप आहे की, गाडीत असताना शुद्ध हरपण्यासाठी त्यांना काहीतरी पदार्थ देण्यात आला आणि त्यानंतर त्यांची सुंता (circumcision) करण्यात आली. त्याने पुढे असा दावा केला की, नकार देऊनही त्याला गोमांस खाण्यास भाग पाडण्यात आले. त्याच्या म्हणण्यानुसार, हा त्याला इस्लाम स्वीकारण्यास प्रवृत्त करण्याचाही एक प्रयत्न होता.

नाव बदलण्याची आणि अधिकृतपणे धर्मांतर करण्याची मागणी

अखिल कुमारने सांगितले की, वारंवार झालेल्या चर्चा आणि दबावानंतर, त्याने सुरुवातीला धर्मांतराचा विचार करण्यास सहमती दर्शवली होती. मात्र, ते कायदेशीररित्या आपले नाव बदलण्यास किंवा धर्मांतराची अधिकृत प्रक्रिया पूर्ण करण्यास तयार नव्हते. त्याने असा दावा केला की, गेल्या दोन महिन्यांत नाव बदलण्यासाठी आणि अधिकृतपणे धर्मांतर जाहीर करण्यासाठी त्याच्यावर दबाव वाढला होता, त्यानंतर त्याने पोलिसांकडे जाण्याचा निर्णय घेतला.

सासूला ठरवलं जबाबदार

अखिल कुमारने कथित दबावासाठी सासू मुख्यत्वे जबाबदार असल्याचा आरोप केला आहे. त्याने स्पष्ट केले की, त्यांनी तक्रारीत आपल्या सासऱ्यांचे नाव दिलेले नाही, कारण सासऱ्यांनी त्यांना कधीही थेट धर्मांतर करण्यास सांगितले नव्हते. "मला विनाकारण कोणालाही गोवायचे नाही. मला वाटते की माझी सासू यासाठी प्रामुख्याने जबाबदार आहे. माझ्या सासऱ्यांनी मला कधीही धर्मांतरासाठी भाग पाडले नाही," असे त्याने सांगितले.

पोलीस या आरोपांचा तपास करत असून घटनेशी संबंधित परिस्थितीची पडताळणी करत आहेत.