महिलेने थेट आम आदमी पक्षाच्या नेत्यालाच घातला गंडा! लग्नही केलं, अन् अखेर...; हायप्रोफाइल प्रकरणामुळे खळबळ

पंजाबमधील 'आम आदमी पार्टी'च्या (AAP) एका नेत्याची फसवणूक झाल्याची घटना समोर आली आहे. महिलेने आपण पीसीएस अधिकारी असल्याची खोटी बतावणी केली होती. तसंच आपण अविवाहित असल्याचे भासवून या नेत्याशी लग्न केले. मात्र लग्नानंतर काही महिन्यांतच ती सोने-चांदीचे दागिने व इतर मौल्यवान वस्तू घेऊन पसार झाली. 'आप'चे सहसचिव अमरिंदर सिंग मांडोफल यांनी हा आरोप केला आहे. त्या महिलेने आणि तिच्या कुटुंबीयांनी ती 'पीसीएस' अधिकारी असल्याचे सांगितले होते आणि तिचे वयही खोटे सांगितले होते, असेही सिंग यांनी नमूद केले.

सिंग यांनी मनविंदर कौरशी फेब्रुवारी 2026 मध्ये विवाह केला होता. या विवाह सोहळ्याला पंजाब विधानसभेचे अध्यक्ष कुलतार सिंग संधवान आणि कॅबिनेट मंत्री तरुणप्रीत सिंग सौंद यांच्यासह 'आप'चे अनेक प्रमुख नेते व लोकप्रतिनिधी उपस्थित होते. लग्नानंतर ती महिला सोने-चांदीचे दागिने आणि इतर मौल्यवान वस्तू घेऊन घर सोडून निघून गेली, असा आरोप 'आप'च्या या नेत्याने केला आहे.

अमरिंदर यांच्या म्हणण्यानुसार, त्यांनी नंतर त्या महिलेबद्दल माहिती मिळवली आणि त्यांना असे समजले की ती पूर्वी विवाहित होती आणि तिचा घटस्फोट झाला आहे. तसेच, तिला 18 वर्षांचा मुलगा असल्याचेही त्यांनी सांगितले. खोटी ओळख आणि दिशाभूल करणारी माहिती देऊन आपल्याला लग्नासाठी फसवण्यात आले, असा आरोपही त्यांनी केला आहे.

त्यांच्या तक्रारीनंतर, पोलिसांनी कौरसह सहा जणांविरुद्ध फसवणूक आणि बनावट कागदपत्रे तयार केल्याप्रकरणी गुन्हा दाखल केला. एफआयआरमध्ये (FIR) नमूद केलेल्या इतर आरोपींमध्ये तिचा भाऊ तरलोचन सिंग, आई वरिंदरजित कौर, चुलत भाऊ नरिंदर सिंग गोल्डी, वहिनी रुपिंदर कौर आणि गावाचे माजी सरपंच सुरिंदर सिंग राणा यांचा समावेश आहे.

पोलिसांनी दिलेल्या माहितीनुसार, हे सर्व आरोपी तरन तारण जिल्ह्यातील भिखीविंड पोलीस ठाण्याच्या हद्दीतील 'सुर सिंग' गावचे रहिवासी आहेत.

फेब्रुवारी 2026 मध्ये झालेल्या या विवाहसोहळ्याला 'आप'चे (AAP) अनेक नेते आणि लोकप्रतिनिधी उपस्थित राहिल्यामुळे हे प्रकरण चर्चेत आले आहे. या समारंभातील काही फोटो आणि व्हिडिओही समोर आले होते, ज्यामध्ये राजकीय नेते नवविवाहित जोडप्यासोबत आनंद साजरा करताना आणि 'भांगडा' करताना दिसत होते.

सिंह हे जिल्हा परिषदेचे सदस्य आणि सिरहिंद बाजार समितीचे सभापतीही आहेत. या हाय-प्रोफाईल विवाहसोहळ्यानंतर काही महिन्यांनी हे आरोप समोर आले असून, पोलीस या प्रकरणाचा तपास करत आहेत आणि यात नाव असलेल्या आरोपींचा शोध घेण्याचे प्रयत्न सुरू आहेत.