टोल प्लाझाच्या 20 किमी परिसरात राहणाऱ्यांसाठी गुड न्यूज; 1 नोव्हेंबरपासून नवे नियम लागू

टोल नाक्यापासून 20 किमीच्या परिसरात राहणाऱ्या नागरिकांसाठी एक गुड न्यूज आहे. रस्ते वाहतूक आणि महामार्ग मंत्रालयाने (MoRTH) फास्टॅग वार्षिक पासच्या नियमांबाबत एक अधिसूचना जारी केली आहे. टोल प्लाझापासून 20 किमीच्या परिघात राहणाऱ्या लोकांसाठी कमी किंमतीत वार्षिक पास मिळणार आहे. नवी नियमांतर्गंत आका 1500 ते 3000 रुपयांत वर्षभराचा पास घेऊ शकतो. याबाबत जाणून घेऊयात सविस्तर

राष्ट्रीय महामार्गावरील टोल नाक्यापासून 20 किलोमीटरच्या परिसरात राहणाऱ्या पात्र खासगी वाहनधारकांसाठी केंद्र सरकारने सवलतीच्या स्थानिक पासची सुविधा सुरू करण्याचा निर्णय घेतला आहे. राष्ट्रीय महामार्ग शुल्क (दर निश्चिती आणि वसुली) (पाचवी सुधारणा) नियम, 2026 अंतर्गत ही सुविधा 1 नोव्हेंबर 2026 पासून लागू होणार असल्याची माहिती देण्यात आली आहे. या नियमानुसार, टोल नाक्यापासून 20 किलोमीटरच्या परिसरात राहणाऱ्या आणि वैध, कार्यरत FASTag असलेल्या बिगरव्यावसायिक खासगी वाहनधारकांना संबंधित टोल नाक्यासाठी वार्षिक पास घेता येणार आहे.

वार्षिक पाससाठी शुल्क किती?

1,500 रुपये : नगरपालिका किंवा स्थानिक शहराच्या हद्दीबाहेरील टोल नाक्यांसाठी

3,000 रुपये : नगरपालिका किंवा स्थानिक शहराच्या हद्दीतील टोल नाक्यांसाठी.

या सुविधेसाठी काही अटी निश्चित करण्यात आल्या आहेत. बंदिस्त वापरकर्ता शुल्क वसुली प्रणाली (Closed User Fee Collection System) असलेल्या राष्ट्रीय महामार्ग किंवा द्रुतगती महामार्गांवर ही सुविधा लागू होणार नाही. तसेच, पर्यायी रस्ता किंवा सर्व्हिस रोड उपलब्ध असलेल्या ठिकाणीही या पासचा लाभ मिळणार नाही.

त्यामुळे टोल नाक्यांजवळ राहणाऱ्या पात्र खासगी वाहनधारकांना या नव्या नियमांचा लाभ घेता येणार आहे.

सध्या स्थानिकांना पाससाठी 360 रुपये प्रति महिना इतके द्यावे लागतात. या हिशोबाने वर्षभरात साधारणपणे 4,320 रुपये भरावे लागत होते. नवीन वार्षिक पासमुळं नागरिकांची हजारो रुपयांची बचत होणार आहे. मात्र या पासचा लाभ घेण्यासाठी काही अटी-शर्थीं पाळाव्या लागणार आहेत.

या असतील अटी

वैयक्तिक वाहने आणि फास्टॅग - हा वार्षिक पास फक्त वैयक्तिक वापरासाठी नोंदणी केलेल्या वाहनांसाठीच वैध आहे. वाहनावर एक सक्रिय फास्टॅग असणे आवश्यक आहे. याशिवाय, पास दिला जाणार नाही.

विशिष्ट टोल प्लाझावर वापर - हा वार्षिक पास फक्त एका विशिष्ट टोल प्लाझासाठीच वैध आहे. तो फक्त त्याच टोल प्लाझावर वापरला जाऊ शकतो ज्यासाठी तो जारी करण्यात आला आहे. तो इतर कोणत्याही टोल प्लाझावर वापरला जाऊ शकत नाही.

सेवा रस्ता किंवा पर्यायी मार्ग नाही - हा पास मिळवण्यासाठी एक अत्यावश्यक अट अशी आहे की, टोल प्लाझावर सेवा रस्ता किंवा पर्यायी मार्ग नसावा. जर सेवा रस्ता किंवा पर्यायी मार्ग उपलब्ध असेल, तर त्या भागातील रहिवाशांना हा पास दिला जाणार नाही.

Closed User Fee Collection System: ज्या द्रुतगती मार्गांवर किंवा राष्ट्रीय महामार्गांवर बंद वापरकर्ता शुल्क संकलन प्रणालीअंतर्गत टोल आकारला जातो, तिथे हा वार्षिक पास दिला जाणार नाही.