जम्मूमधील कठुआमध्ये CISF जवानांमध्येच गोळीबार; चार जवानांचा मृत्यू

जम्मूच्या कठुआ जिल्ह्यात सीआयएसएफ कर्मचाऱ्यांदरम्यान झालेल्या गोळीबारात 4 जवान शहीद झाले आहेत. यामध्ये एका असिस्टंट कमांडंट आणि एका इन्स्पेक्टरचा समावेश आहे. ही घटना बसोहलीच्या माश्का भागातील सेवा पॉवर प्रोजेक्ट येथील सीआयएसएफ कॅम्पमध्ये घडली. माहिती मिळताच पोलीस घटनास्थळी दाखल झाले आणि त्यांनी तपास सुरू केला.

ही घटना जम्मूच्या कठुआ जिल्ह्यातील बिल्लावर भागातील माश्का परिसरात घडली. सूत्रांनुसार, माश्का भागातील सेवा पॉवर प्रोजेक्टमध्ये तैनात असलेल्या सीआयएसएफ जवानांमधील वाद विकोपाला जाऊन त्याचे रूपांतर रक्तरंजित चकमकीत झाले. मिळालेल्या प्राथमिक माहितीनुसार, सीआयएसएफ जवानांमधील वादाचे रूपांतर झटापटीत झाले आणि त्यानंतर कॅम्पमध्ये गोळीबार झाला.

हे सीआयएसएफ जवान हिमाचल प्रदेशच्या सीमेला लागून असलेल्या बसोहली येथील माश्का गावातील सेवा-3 पॉवर प्रोजेक्टचे रक्षण करत होते. दोन जवानांमध्ये वाद झाला आणि एकाने अंदाधुंद गोळीबार केला. अधिकाऱ्यांनी सांगितले की, वरिष्ठ अधिकारी घटनास्थळी पोहोचले असून परिस्थितीवर लक्ष ठेवून आहेत.

जवानांची ओळख पटली

या घटनेत असिस्टंट कमांडंट आणि सब-इन्स्पेक्टर यांच्यासह सीआयएसएफचे चार जवान शहीद झाले. मृत जवानांची ओळख असिस्टंट कमांडंट अंकित कुमार पांडे, सब-इन्स्पेक्टर लक्ष्मण सिंग, कॉन्स्टेबल रफीक अहमद आणि कॉन्स्टेबल संदीप कुमार अशी पटली आहे.

गोळीबारात सर्व जवान सुरुवातीला जखमी झाले होते आणि त्यांना हिमाचल प्रदेशच्या बाजूला असलेल्या एनएचपीसी रुग्णालयात नेण्यात आले, जिथे नंतर त्यांचा मृत्यू झाला. सीआयएसएफ मुख्यालयाने या घटनेची चौकशी करण्याचे आदेश दिले आहेत. ज्या ठिकाणी गोळीबार झाला तो परिसर हिमाचल प्रदेशच्या सीमेजवळ आहे.