ज्ञानेश कुमार यांच्या राजीनाम्यासाठी इंडिया आघाडीची नवी रणनीती; राहुल गांधीचा जबरदस्त प्लान
देशातील निवडणूक प्रक्रिया उद्ध्वस्त केल्याचा गंभीर आरोप राहुल गांधी यांनी केंद्र सरकारवर केला आहे. आता लोकशाही जिवंत ठेवण्यासाठी लढाई सुरू राहणार. इंडिया आघाडीची रणनीती ठरली आहे.
इंडिया आघाडी : दिल्लीत राहुल गांधींच्या निवासस्थानी चहापानचा कार्यक्रम झाल्यानंतर इंडिया आघाडीच्या नेत्यांनी एकत्र पत्रकार परिषद घेतली. यावेळी निवडणूक आयोगाचे मुख्य आयुक्त ज्ञानेश कुमार यांच्यावर इंडिया आघाडीच्या नेत्यांनी निशाणा साधला. भाजपविरोधात आमच्या सगळ्यांची एकजूट असल्याचं राहुल गांधी यांनी म्हटलं. तसंच संविधानाचं रक्षण करणं हाच आमचा आंदोलनाचा उद्देश असल्याचं सुप्रिया सुळे यांनी म्हटलं.
इंडिया आघाडी मागील काही दिवसांपासून निवडणूक आयोग आणि केंद्र सरकारविरोधात चांगलीच आक्रमक झाली आहे. ज्ञानेश कुमार यांच्या राजीनाम्यासाठी दिल्लीत आंदोलनाचा धडाका सुरू आहे. दरम्यान आज झालेल्या 'टी डिम्लोमसी'त इंडिया आघाडीनं त्यांची पुढची रणनीती ठरवली आहे.
इंडिया आघाडीनं ज्ञानेश कुमार यांच्या राजीनाम्यासाठी आंदोलनाचं हत्यार उपसलं आहे. मागील 6 दिवसांपासून दिल्लीत इंडिया आघाडीचं आंदोलन सुरू होतं. आज दिल्लीत इंडिया आघाडीनं बैठकीत पुढची रणनीती ठरवण्यात आली आहे. जोपर्यंत ज्ञानेश कुमार राजीनामा देत नाहीत तोपर्यंत इंडियाचा एल्गार सुरूच राहणार असल्याचा इशारा देण्यात आला आहे. आंदोलनाची तीव्रता कमी न होऊ देता वाढवली पाहिजे यावर बैठकीत चर्चा झाली.
ज्ञानेश कुमार यांचा राजीनामा होत नाही तोपर्यंत आंदोलन सुरूच ठेवलं जाणार आहे. आंदोलनात केवळ राजकीय पक्ष नाही तर सामाजिक संघटना देखील सहभागी असल्या पाहिजे. आंदोलनात केवळ निवडणूक आयोग नाही तर सरकारला देखील धारेवर धरले जाणार.
इंडिया आघाडी अमित शाहांच्या घरासमोर आंदोलन करणार?
इंडिया आघाडी केंद्रीय गृहमंत्री अमित शाहांच्या घरासमोर आंदोलन करण्याची शक्यता आहे. खासदार संजय राऊतांकडून याबाबत आंदोलन करण्याचे संकेत देण्यात आलेत. मोदींच्या घरासमोर आंदोलन केलं, तसंच शाहांच्या घरासमोरही आंदोलन करू शकतो असं राऊतांनी म्हटलंय.
राहुल गांधींनी मानले आंदोलनाला पाठिंबा देणाऱ्यांचे आभार
सुप्रीम कोर्टावरील मोर्चात सहभागी झालेल्यांचे राहुल गांधी यांनी आभार मानलेत. आंदोलनाला पाठिंबा देणा-यांचेही राहुल गांधींनी आभार व्यक्त केले. तसंच राहुल गांधींनी पंतप्रधान मोदींवरही टीका केली. इंडिया आघाडीतील एकजुटीचं बैठकीत कौतुक करण्यात आलं. आमची लढाई थांबणार नाही. आम्ही शेवटपर्यंत लढणार. महाराष्ट्रातून ठाकरेंची शिवसेना आणि पवारांच्या राष्ट्रवादीनं देखील दिल्लीत जात एल्गार पुकारला. संविधान वाचवण्यासाठी लढाई सुरूच राहणार असल्याचा निर्धार सुप्रिया सुळे यांनी केला आहे. तर संजय राऊत यांनी निवडणूक आयोगासह केंद्र सरकारवर हल्लाबोल केला.
दिल्लीसह प्रत्येक जिल्ह्या जिल्ह्यात इंडिया आघाडी आंदोलन करण्याच्या तयारीत आहे.
पुढचं आंदोलन इंडिया आघाडी कुठे करणार आहे आणि कधी करणार आहे देखील सध्या गुलद्स्त्यात ठेवण्यात आलं आहे. निवडणूक आयोग, जंतरमंतर, राजघाट आणि त्यानंतर सुप्रीम कोर्टावर मोर्चा काढल्यानंतर इंडिया आघाडी मोठ्या आंदोलनाच्या तयारीत आहे. त्यासाठी रणनीती ठरली आहे. मात्र आंदोलनाचा वार, तारीख आणि वेळ गुलदस्त्यात ठेवण्यात आली आहे.
