लालकृष्ण अडवाणी रुग्णालयात दाखल! अपोलो रुग्णालयाने जारी केलं स्टेटमेंट; अडवणींना झालंय काय? रुग्णालयाने काय माहिती दिली?
लालकृष्ण अडवाणी हे 98 वर्षांचे आहेत. 7 ऑक्टोबर रोजी रोजी पंतप्रधान नरेंद्र मोदी यांनीही अडवाणी यांच्या निवासस्थानी जाऊन त्यांची भेट घेतली होती. वर्ष 2024 मध्ये भारताचा सर्वोच्च नागरी सन्मान 'भारतरत्न' प्रदान करण्यात आला.
भारताचे माजी उपपंतप्रधान तसेच भारतीय जनता पार्टीचे ज्येष्ठ नेते लालकृष्ण अडवाणी यांना शुक्रवारी रात्री दिल्लीतील अपोलो रुग्णालयात दाखल करण्यात आले आहे. त्यांची प्रकृती स्थिर असून त्यांच्या प्रकृतीसंदर्भात रुग्णालयाने एक पत्रक जारी केलं आहे. त्यांना नेमकं झालंय काय? त्यांच्यावर कोणते डॉक्टर उपचार करत आहेत याची माहिती रुग्णालयाकडून देण्यात आली आहे.
कोणत्या रुग्णालयात दाखल करण्यात आलंय?
98 वर्षीय लालकृष्ण अडवाणी यांना शुक्रवारी 16 ऑक्टोबर रोजी सायंकाळी सुमारे साडेसात वाजण्याच्या सुमारास इंद्रप्रस्थ येथील अपोलो रुग्णालयात आणण्यात आले. त्यांना श्वसनाचा त्रास जाणवू लागल्याने रुग्णालयात दाखल करण्याचा निर्णय घेण्यात आला. इंद्रप्रस्थ येथील अपोलो रुग्णालयात सध्या त्यांच्यावर अतिदक्षता विभागात उपचार सुरू आहेत. न्यूरोलॉजी विभागाचे वरिष्ठ सल्लागार डॉ. विनीत सुरी यांच्या देखरेखीखाली त्यांच्यावर उपचार सुरू आहेत. त्यांची प्रकृती स्थिर असून, डॉक्टरांकडून त्यांच्यावर बारकाईने लक्ष ठेवलं जात आहे, अशी माहिती रुग्णालय प्रशासनाने दिली आहे. अडवाणींच्या प्रकृतीसंदर्भात रुग्णालयाने एक स्टेटमेंट जारी केलंय.
स्टेटमेंटमध्ये काय म्हटलंय रुग्णलयाने? अडवाणींना झालंय काय?
प्रसारमाध्यमांसाठी अपोलो रुग्णालयाने मोजून तीन शब्दांचं स्टेटमेंट जारी केलं आहे. यामध्ये, "लालकृष्ण अडवाणी यांना छातीत संसर्ग (चेस्ट इन्फेक्शन) झाल्यामुळे अपोलो हॉस्पिटलमध्ये दाखल करण्यात आले आहे. ते सध्या अतिदक्षता विभागात (आयीसूमध्ये) असून, वरिष्ठ न्यूरोलॉजी सल्लागार डॉ. विनीत सुरी यांच्या देखरेखीखाली आहेत. त्यांची प्रकृती स्थिर असून, ते वैद्यकीय निरीक्षणाखाली आहेत," असं रुग्णालयाने सांगितलं आहे.
केंद्रीय आरोग्यमंत्री रुग्णालयात पोहोचले
शुक्रवारी रात्रीच्या प्राथमिक तपासणीनंतर त्यांना रुग्णालयाच्या फुफ्फुसविकार विभागात दाखल करण्यात आले. न्यूरोलॉजी विभागाचे वरिष्ठ सल्लागार डॉ. विनीत सुरी यांच्या बरोबरच श्वसनविकार तज्ज्ञांच्या विशेष पथकाची टीम त्यांच्या प्रकृतीवर बारकाईने लक्ष ठेवून आहे. अडवाणी रुग्णालयात दाखल झाल्याचे समजताच केंद्रीय आरोग्यमंत्री जे. पी. नड्डा यांनी अपोलो रुग्णालयात जाऊन त्यांची भेट घेतली आणि डॉक्टरांकडून त्यांच्या प्रकृतीची विचारपूस केली.
वैद्यकीय चाचण्या
अपोलो रुग्णालयाने यापूर्वी जारी केलेल्या हेल्थ बुलेटिनमध्ये अडवाणींच्या वयाचा संदर्भ देण्यात आला आहे. अडवाणी यांची प्रकृती सध्या स्थिर आहे आणि सध्या काळजी करण्याचे कारण नाही. वाढते वय लक्षात घेता त्यांच्या आवश्यक वैद्यकीय चाचण्या केल्या जात आहेत, असं रुग्णालयाने स्पष्ट केलेलं.
