NIA ची मोठी कारवाई, 13 आरोपींना अटक; भारतातील मोठा दहशतवादी कट उधळला
पश्चिम बंगाल आणि ईशान्येकडील राज्यांमध्ये मोठा दहशतवादी कट रचण्यात आला होता. जेएमबीच्या दहशतवादी कटाप्रकरणी धडक करावाई करण्यात आली आहे. एनआयएने 13 आरोपींना अटक केली आहे.
राष्ट्रीय तपास संस्था : राष्ट्रीय तपास संस्थेने (एन आय ए) आसाम, पश्चिम बंगाल आणि केरळमधील 16 ठिकाणी छापे टाकून, बंदी घालण्यात आलेल्या 'जमात-उल-मुजाहिदीन बांगलादेश' (जेएमबी) या दहशतवादी संघटनेच्या एका गटाने रचलेल्या दहशतवादी कटाशी संबंधित 13 आरोपींना 29 सप्टेंबर 2026 रोजी अटक केली. त्यांच्याकडून मोबाईल फोन, पेन ड्राइव्ह आणि मेमरी कार्ड्स यांसारखी डिजिटल उपकरणे जप्त करण्यात आली. अटक करण्यात आलेल्या 13 आरोपींपैकी 8 जण आसाममधील, जण पश्चिम बंगालमधील आणि १ जण केरळमधील आहे.
हे प्रकरण 28 डिसेंबर 2025 रोजी आसाम पोलिसांनी आसाम, पश्चिम बंगाल आणि त्रिपुरातील विविध जिल्ह्यांतून 11 आरोपींना केलेल्या अटकेतून उद्भवले आहे. 'आयएमके' च्या बांगलादेशस्थित सूत्रधारांकडून 'पूर्वा आकाश' या टेलिग्राम ग्रुपद्वारे चालवल्या जाणाऱ्या ऑनलाइन कट्टरतावादी मॉड्यूलप्रकरणी, एसटीएफ पोलीस ठाण्याने 30 डिसेंबर 2025 रोजी 35 आरोपींविरुद्ध गुन्हा क्र. ०६/२०२५ दाखल केला होता.
या 11 आरोपींविरुद्ध 25 जून 2026 रोजी आरोपपत्र दाखल करण्यात आले असून ते सध्या न्यायालयीन कोठडीत आहेत. त्यानंतर NIA ने हे प्रकरण आपल्या हाती घेतले आणि गुवाहाटी येथील NIA विशेष न्यायालयात BNS,2023 आणि UAPA कायद्याच्या विविध कलमांखाली या 11 आरोपींविरुद्ध आरोपपत्र दाखल केले.
JMB चेच एक रूप असलेल्या 'इमाम महमूदर काफिला' (IMK) या गटाच्या कटात या आरोपींचा सक्रिय सहभाग असल्याचे NIA च्या तपासात निष्पन्न झाले. या कटाचा उद्देश पश्चिम बंगाल आणि भारतातील ईशान्येकडील राज्यांमध्ये या दहशतवादी संघटनेची विचारसरणी पसरवणे हा होता. या कटात दहशतवादी संघटनेच्या अतिरेकी अजेंड्याचा प्रसार करणे, असुरक्षित तरुणांचे कट्टरतावादीकरण करणे आणि भारतात संघटनेचे जाळे विस्तारणे या गोष्टींचा समावेश होता. दहशतवादविरोधी तपास यंत्रणेच्या तपासातून असे निष्पन्न झाले की, जेएमबी (JMB) चा वरिष्ठ सदस्य इमाम महमूद हबीबुल्ला याने भारतीय भूमीवर या बंदी घातलेल्या संघटनेचा अजेंडा पुढे नेण्यासाठी 'आयएमके' (IMK) ची स्थापना केली होती.
एनआयएच्या (NIA) तपासातून पुढे असेही समोर आले की, आरोपींनी गुप्त बैठका, धार्मिक विचारसरणी रुजवण्याचे कार्यक्रम, अतिरेकी साहित्याचा प्रसार आणि भारतविरोधी प्रचारासाठी डिजिटल प्लॅटफॉर्मचा वापर करून भारतात आयएमके/जेएमबीचा प्रभाव वाढवण्याचा कट रचला होता. ते आयएमके/जेएमबीच्या नेतृत्वाशी निष्ठा राखण्याचा प्रचार करत होते.
या प्रकरणात 10 आरोपी अद्याप फरार आहेत. यामध्ये एका भारतीय नागरिकाचा आणि नऊ बांगलादेशी नागरिकांचा समावेश आहे. 'RC-01/2026/NIA/GUW' या प्रकरणाचा तपास सुरू आहे.
