पीएफ खात्यातील पैसे आता व्हॉट्सअ‍ॅपवर! बॅलन्स ते पासबुक एका मेसेजवर; आजपासून काय बदललंय?
ईपीएफओने व्हॉट्सअ‍ॅपवर पीएफ बॅलन्स, पासबुक आणि अलीकडील व्यवहार पाहण्याची सुविधा सुरू केली आहे. तसेच 1 हजार रुपयांपर्यंतच्या पात्र निष्क्रिय पीएफ खात्यांचे पैसे आपोआप जमा होणार आहेत.
नोकरी करणाऱ्या कर्मचाऱ्यांसाठी महत्त्वाची बातमी आहे. कर्मचारी भविष्य निर्वाह निधी संघटना म्हणजेच ईपीएफओने 1 नोव्हेंबर 2026 रोजी व्हॉट्सअ‍ॅप आधारित सेवा सुरू केली आहे. केंद्रीय कामगार आणि रोजगारमंत्री मनसुख मांडविया यांनी ईपीएफओच्या 74 व्या स्थापना दिनानिमित्त या सुविधेचे उद्घाटन केले. यामुळे सदस्यांना पीएफ खात्यातील शिल्लक, पासबुकची माहिती आणि अलीकडील पाच व्यवहार व्हॉट्सअ‍ॅपद्वारे पाहता येणार आहेत. आजपासून काय बदललंय? याचा पीएफ खातेदारांवर काय परिणाम होणार? सविस्तर जाणून घेऊया.
कोणत्या सुविधा मिळणार?
या सेवेमुळे पीएफ खात्यातील जमा रक्कम, अलीकडील व्यवहार आणि पासबुकची माहिती मिळवणे सोपे होणार आहे. तसेच प्रधानमंत्री विकसित भारत रोजगार योजना (PMVBRY) संदर्भातील आवश्यक प्रक्रिया पूर्ण करण्यासाठी वैयक्तिक मार्गदर्शन आणि मदतही मिळणार आहे. त्यामुळे पीएफ खातेधारकांना किरकोळ माहिती मिळवण्यासाठी ईपीएफओ कार्यालयात जाण्याची गरज कमी होऊ शकते.
निष्क्रिय खात्यांचे पैसे आपोआप मिळणार
ईपीएफओने आणखी एक महत्त्वाचा निर्णय घेतला आहे. आधार पडताळणी पूर्ण झालेल्या आणि निष्क्रिय असलेल्या ज्या पीएफ खात्यांमध्ये 1 हजार रुपये किंवा त्यापेक्षा कमी रक्कम आहे, अशा पात्र खात्यांचे पैसे मिळवण्यासाठी सदस्यांना स्वतंत्र क्लेम दाखल करावा लागणार नाही. आवश्यक ओळख आणि बँक खात्याची पडताळणी पूर्ण झाल्यानंतर ईपीएफओ स्वतःच पैसे हस्तांतरित करण्याची प्रक्रिया सुरू करणार आहे. या निर्णयाचा देशातील सुमारे एक लाख खात्यांना फायदा होण्याचा अंदाज असून, त्यात एकूण पाच कोटी रुपयांची रक्कम आहे.
आठ कोटी सदस्यांना सेवा देणारी यंत्रणा
ईपीएफओ देशातील सुमारे आठ कोटी योगदान देणाऱ्या सदस्यांना आणि 85 लाख पेन्शनधारकांना सेवा देते. संस्थेच्या व्यवस्थापनाखाली जवळपास 32 लाख कोटी रुपयांचा निवृत्ती निधी आहे. त्यामुळे व्हॉट्सअ‍ॅप सारख्या लोकप्रिय माध्यमातून सेवा उपलब्ध होणे ही डिजिटल सुविधांच्या विस्तारातील महत्त्वाची पायरी मानली जात आहे.
महाराष्ट्रातील कर्मचाऱ्यांना कसा फायदा?
मुंबई, पुणे, ठाणे, नाशिक आणि राज्यातील औद्योगिक क्षेत्रांत काम करणाऱ्या लाखो कर्मचाऱ्यांसाठी ही सुविधा उपयुक्त ठरू शकते. विशेषतः वारंवार नोकरी बदलणाऱ्या किंवा जुन्या पीएफ खात्यांची माहिती मिळवू इच्छिणाऱ्या सदस्यांना याचा फायदा होईल. असे असले तरी व्हॉट्सअ‍ॅपसेवेचा अधिकृत क्रमांक आणि वापरण्याची संपूर्ण प्रक्रिया ईपीएफओच्या वेबसाईटवरूनच तपासावी. अनोळखी क्रमांकावर यूएएन पासवर्ड, ओटीपी किंवा बँक तपशील देऊ नका, असे आवाहन करण्यात आले आहे.
