SOCIAL MEDIA

Newsletter

PARTNER SITES
Select Language Select State

'मोदींच्या सूचनेवरून विरोधी पक्षनेत्यांचे फोन ‘टॅप’ केले जात असतील तर...', ठाकरेंच्या सेनेचा हल्लाबोल; 'राजकारण हा गुन्हेगारांचा...'

"राहुल गांधीच कशाला, हे लोक योगी आदित्यनाथ, देवेंद्र फडणवीस, राजनाथ सिंह, लष्करी अधिकाऱ्यांचेही फोन ‘टॅप’ करीत असावेत," अशी शंका ठाकरेंच्या शिवसेनेनं उपस्थित केली आहे.

Reported By Swapnil Ghangale Written By Swapnil Ghangale
Published: Nov 16, 2026, 06:33 AM IST | Updated: Nov 16, 2026, 06:43 AM IST
Image Credit: ठाकरेंच्या शिवसेनेनं मोदींवर साधला निशाणा (प्रातिनिधिक फोटो)
Join

"भारताची राज्य व्यवस्था, सरकारी कारभार, यंत्रणा भ्रष्टाचाराने कशी सडली आहे याचे ताजे उदाहरण म्हणजे, राहुल गांधी यांनी केलेले ‘फोन टॅपिंग’चे आरोप. गांधी यांनी सांगितले की, मोदी यांच्याविरोधातले अनेक पुरावे माझ्या फोनमध्ये आहेत. ते पुरावे उडवण्याचा व माझा फोन चोरून ऐकण्याचा प्रयत्न सुरू आहे. गांधी हे लोकसभेतील विरोधी पक्षनेते आहेत व ते कधीच हवेत बोलत नाहीत. मतचोरीपासून एपस्टीन प्रकरणापर्यंत त्यांनी जे स्फोट केले ते पुराव्यासह खरे ठरले. मोदी यांना काही शंका असतील तर त्यांनी खुल्या मंचावर येऊन आपल्याशी चर्चा करावी, असे आव्हान राहुल गांधी यांनी दिले आहे, पण ते स्वीकारायला मोदी तयार नाहीत. मोदी यांच्या हाती असलेली सत्ता त्यांनी बेकायदेशीर मार्गाने मिळवली आहे. त्यांची सत्ता आता डळमळीत होताना दिसत आहे. त्यामुळे सत्ता वाचवण्यासाठी ते रोज नवा गुन्हा करत आहेत," असा घणाघाती आरोप ठाकरेंच्या शिवसेनेनं केला आहे. 

हा विनोदच म्हणावा लागेल

"राजकारण हा गुन्हेगारांचा खेळ बनवून मोदी-शहा वगैरे लोकांनी देशाच्या परंपरेचे धिंडवडे काढले आहेत. राहुल गांधी म्हणतात, त्यांचे फोन ‘टॅप’ होतात. हा विषय चेष्टा करण्याचा नाही, तर गांभीर्याने घ्यायचा आहे. मोदी यांच्याच काळात इस्रायलमधून ‘पेगॅसस’ नावाचे आधुनिक टॅपिंग यंत्र आणले गेले आणि त्या माध्यमातून पत्रकार, विरोधक, स्वपक्षातील मंत्री, नेते, लष्करी अधिकाऱ्यांचे फोन चोरून ऐकण्यात आले. पेगॅसस नेतान्याहूकडून त्यासाठीच आणले गेले. या प्रश्नावर संसदेत गदारोळ झाला. मोदी-शहा इथेही चर्चेपासून पळून गेले. आश्चर्य असे की, इस्रायलमध्ये आता नेतान्याहू व त्यांच्या सरकारचा पराभव झाला आहे. आपला पराभव घडवण्यात परकीय शक्तींचा हात असल्याचा आरोप आता नेतान्याहू करतात हा विनोदच म्हणावा लागेल. ज्या नेतान्याहूने जगभरातील लोकांवर पाळत ठेवली, त्यासाठी संशोधन करून यंत्र निर्माण केले, त्याला स्वतःच्या देशात परकीय शक्ती कार्यरत आहेत हे कसे समजले नाही?" असा सवाल 'आता आले ‘फोन टॅपिंग’, हे सुधारणार नाहीत!' या मथळ्याखालील 'सामना' अग्रलेखातून विचारण्यात आला आहे. 

मोदींच्या सूचनेवरून विरोधी पक्षनेत्यांचे फोन ‘टॅप’ केले जात असतील तर...

"नेतान्याहूने इस्रायलमध्ये ज्या राजकीय विरोधकांवर पाळत ठेवली, ज्यांचे फोन टॅप केले तेच लोक तेथे सत्तेवर आले. त्यामुळे मोदी जर राहुल गांधी यांचे फोन ‘टॅप’ करत असतील तर त्याचाही अर्थ तोच आहे. मोदी हे जात आहेत व राहुल गांधी सत्तेची सूत्रे हाती घेत आहेत. काही वर्षांपूर्वी महाराष्ट्रात सत्तांतराची प्रक्रिया सुरू असताना देवेंद्र फडणवीस यांनी पोलीस महासंचालक पदावरील अधिकाऱ्यांना हाताशी धरून त्यांच्याकडून राज्यातील प्रमुख नेते आणि पत्रकारांवर पाळत ठेवली होती. त्या सगळ्यांचे फोन ‘टॅप’ करून माहिती गोळा केली होती. पोलीस यंत्रणाच त्यासाठी जुंपली गेली होती. प्रशासनातील व पोलीस दलातील महत्त्वाच्या अधिकाऱ्यांना त्याआधी इस्रायलला पाठवून ‘फोन टॅपिंग’चे प्रशिक्षण देण्यात आले. हे सर्व उघड झाल्यावर फडणवीस यांनी असा कांगावा केला की, ‘सरकार मला अटक करू पाहात आहे.’ खरे तर पंतप्रधान मोदी यांच्या सूचनेवरून विरोधी पक्षनेत्यांचे फोन ‘टॅप’ केले जात असतील तर तो गुन्हा आहे व एखाद्याच्या खासगी जीवनावर अतिक्रमण आहे," असं ठाकरेंच्या शिवसेनेनं म्हटलं आहे. 

लोकशाहीमध्ये असे प्रकार चालत असतील तर...

"इंडियन टेलिग्राफ अॅक्ट, 1885 च्या कलम 5 (2) नुसार भारताचे सार्वभौमत्व, एकता, राज्याची सुरक्षा कोणी संकटात आणत असेल तर अशा आणीबाणीच्या वेळी केंद्र किंवा राज्य सरकार फोन टॅप करू शकतात. अशा फोन टॅपिंगचे आदेश देशाचे किंवा राज्याचे गृह सचिव देऊ शकतात. टेलिकम्युनिकेशन अॅक्ट, 2023, कलम 20 मध्येही हीच तरतूद कायम केली गेली आहे. राहुल गांधी व इतर राजकीय विरोधकांकडून देशाच्या अखंडतेला कोणता धोका आहे की, ज्यामुळे त्यांचा फोन टॅप केला जात आहे? मोदी, शहा, मुख्य निवडणूक आयुक्त ज्ञानेश कुमार यांच्या भ्रष्टाचाराचे व व्होट चोरीचे वाभाडे काढणे हे कृत्य राष्ट्रीय एकात्मतेला धोका आहे असे सरकारला वाटत असेल तर त्यांचे डोके तपासायलाच हवे. फोन टॅपिंग हा सरळ सरळ नागरिकांच्या गोपनीयतेच्या अधिकाराचा भंग आहे. मोदी व त्यांचे लोक हे बेकायदेशीर कृत्य नक्कीच करत असावेत. राहुल गांधीच कशाला, हे लोक योगी आदित्यनाथ, देवेंद्र फडणवीस, राजनाथ सिंह, लष्करी अधिकाऱ्यांचेही फोन ‘टॅप’ करीत असावेत. भारतीय लोकशाहीची पातळी रसातळाला नेणारा हा प्रकार आहे. लोकशाहीमध्ये असे प्रकार चालत असतील तर या राज्यपद्धतीवर लोकांनी विश्वास का ठेवावा? असाच प्रश्न उपस्थित होईल व हे भ्रष्ट, जुलमी सरकार उलथवून टाकण्यासाठी लोक रस्त्यावर येतील," असं लेखाच्या शेवटी म्हटलं आहे.

Add Zee News as a Preferred Source
TAGS:

About the Author

मोजक्या शब्दांमध्ये...स्वप्निल घंगाळे हे मागील 12 वर्षांहून अधिक काळापासून डिजिटल पत्रकारितेमध्ये सक्रीय आहेत. 'महाराष्ट्र टाइम्स', 'लोकसत्ता' यासारख्या नामांकित कंपन्यांमध्ये त्यांनी यापूर्वी काम केलेलं आहे. राजकीय बातम्यांबरोबरच ताज्या घडामोडी, ट्रेण्डींग/ व्हायरल, टेक्नोलॉजी, क्रीडा, मनोरंजन अशा सर्वच क्षेत्रातील बातम्यांमध्ये हातखंडा आहे. अवांतर वाचनाबरोबरच बातम्यांव्यतिरिक्त सोशल मीडियावर लिहायची आवड आहे. फावल्या वेळात चित्रपट पाहणे, भटकंती करायला आवडतं. बातमी अचूक असावी असा त्यांचा कटाक्षाने प्रयत्न असतो. सध्या ते 'झी 24 तास'मध्ये 'डेप्युटी न्यूज एडिटर' म्हणून कार्यरत आहेत.पत्रकारितेचा श्रीगणेशास्वप्निल यांनी पत्रकारितेच्या दुसऱ्या वर्षापासूनच 'ठाणे वैभव' या ठाण्यातील स्थानिक वृत्तपत्रामध्ये शिकाऊ पत्रकार म्हणून कामाला सुरुवात केली. सांस्कृतिक आणि गुन्हेगारी यासंदर्भातील वृत्तांकन यांनी या सहा महिन्याच्या कालावधीमध्ये केलं. बीएमएमच्या तृतीय वर्षाला ठाण्यातील जोशी-बेडेकर महाविद्यालयातील 'ऋत' या पत्रकारिता विभागाच्या महाविद्यालयीन वृत्तपत्रासाठी स्वप्निल यांनी उपसंपादक म्हणून काम पाहिले.डिजिटलमध्ये एन्ट्री'महाराष्ट्र टाइम्स डॉट कॉम'च्या माध्यमातून पहिल्यांदा डिजिटल क्षेत्रामध्ये काम करणाऱ्या स्वप्निल यांनी सुरुवातीला सोशल मिडिया व्यवस्थापक म्हणून काम पाहिले. त्यानंतर हळूहळू ते डिजिटल वृत्तांकनाकडे वळले. त्यांनी 'महाराष्ट्र टाइम्स' वृत्तपत्रामध्येही माहिती-तंत्रज्ञान या विषयावर लेखन केलं. मुख्य पुरवणीसोबतच अनेकदा रविवार विशेष अंकांमध्येही त्यांचे लेख छापून आले आहेत. 'मुंबई टाइम्स' या पुरवणीअंतर्गत विद्यार्थ्यांच्या विश्वातील अनेक विषय त्यांनी कॉलेज क्लब रिपोर्ट्सच्या माध्यमातून हाताळले. कॉलेज क्लब रिपोर्टर्ससोबतच्या कामासोबतच त्यांनी 'मटा सन्मान', 'मटा श्रावण क्विन' यासारख्या कार्यक्रमांसाठी डिजिटल आणि प्रिंटदरम्यान संयोजक म्हणून काम पाहिलं. जवळपास पाच वर्ष ते मटामध्ये कार्यरत होते.प्रगल्भतेची आसमहाराष्ट्र टाइम्सनंतर तितक्याच तोलामोलाच्या 'लोकसत्ता'मध्ये स्वप्निल यांनी काम केलं. या ठिकाणीही ते पाच वर्ष कार्यरत होते. 'मटा'पासून सुरु झालेल्या प्रवासाला 'लोकसत्ता'मध्ये प्रगल्भता लाभली. राजकीय बातम्या, ताज्या घडामोडी, ट्रेडींग बातम्या याबरोबरच त्यांनी डिजिटल आणि प्रिंटमधील समन्वयाचं (इंटीग्रेशन) कामही त्यांनी लोकसत्तामध्ये केलं. 'लोकसत्ता'मधील 'व्हिवा' या पुरवणीमध्ये तरुणाईसंदर्भातील विषयांवर त्यांनी लेखन केलं. तसेच 'लोकप्रभा'च्या माध्यमातून त्यांनी माहिती-तंत्रज्ञान या विषयावर लिखाण केलं. लोकसत्ता डॉट कॉममध्ये स्वप्निल यांनी चार ते पाच सेक्शनसची जबाबदारी पार पाडली.तो सध्या काय करतो?'लोकसत्ता'नंतर स्वप्निल यांनी पहिल्यांदाच टीव्हीशी संलग्न वेबसाईटसाठी म्हणजेच 'झी 24 तास'च्या वेबसाईटसाठी काम करण्याचा निर्णय घेतला. या ठिकाणी ते ताज्या घडामोडींबरोबरच, राजकीय बातम्या, ब्रेकिंग बातम्या, ट्रेडिंग बातम्या हाताळतात. बातमीमधील अचूक माहिती, व्याकरण, उत्तम मथळे यासारख्या गोष्टींकडे त्यांचं कटाक्षाने लक्ष असतं. लिखाणबरोबरच मॅरेथॉन पळणं, वेगवेगळ्या ठिकाणी खादडीसाठी जाणं, पुस्तकांसोबतच अवांतर वाचन यासारख्या गोष्टींना ते प्राधान्य देतात.
Read More

ZEENEWS TRENDING STORIES