डेंजर अपघातात बिझनेसमनचा मृत्यू! फॉर्च्युनर पुलावरुन नदीत कोसळली, बुडालेल्या कारमध्ये सापडला मृतदेह; मृत्यूच्या एक तास आधीच पत्नीसोबत...

'कोणाचा कधी, कुठे आणि कसा मृत्यू होईल सांगता येत नाही' हे वाक्य तुम्ही या पूर्वीही नक्कीच ऐकलं असेल. असाच काहीसा प्रकार एका 50 वर्षीय व्यवसायिकासोबत घडला असून वयाच्या 50 व्या वर्षी त्याने जगाचा निरोप घेतला आहे. भरधाव टोयोटा फॉर्च्युनर कार थेट नदीत कोसळल्याने या व्यवसायिकाचा मृत्यू झाला आहे. घरी परत येत असताना या व्यवसायिकाचा अपघात झाला असून मयत व्यक्ती माजी खासदाराचा नातेवाईक असल्याचं सांगितलं जात आहे.

मयत व्यवसायिक कोण?

हा अपघात बिहारच्या पूर्णियामध्ये गुरुवारी संध्याकाळी घडला. या अपघातामध्ये मृत्यू झालेल्या व्यवसायिकाचं नाव विनय कुमार ऊर्फ बबलू विश्वास असं आहे. पूर्णियामधील रेनॉल्ट कार शोरुमचे मालक असलेल्या विनय यांची फॉर्च्युनर कार 'कॅप्टन ब्रिज'च्या सुरक्षा कठड्याला तोडून थेट सौरा नदीत कोसळली. गाडीवरील नियंत्रण सुटल्याने गाडीचा अपघात झाल्याचं सांगितलं जात आहे. विनय हे माजी खासदार संतोष कुशवाह यांचे नातेवाईक असल्याचे सांगितले जात आहे. हा सारा प्रकार पतीच्या दिर्घायुष्यासाठी प्रार्थना करण्याची प्रथा असलेल्या 'करवा चौथ'च्या दिवशी घडल्याने विनय यांच्या कुटुंबावर आभाळ कोसळलं आहे. या अपघाताच्या एक तास आधी म्हणजेच सायंकाळी सहा वाजता विनय यांनी फेसबुकवरुन आपल्या पत्नीसोबतचा खास फोटो आणि व्हिडीओ शेअर केला होता.

तासाभरापूर्वीच पत्नीसोबतचा फोटो केलेला शेअर

हा अपघात 'करवा चौथ'च्या दिवशीच झाला. अत्यंत हृदयद्रावक बाब म्हणजे, अपघाताच्या अवघ्या एक तास आधी, संध्याकाळी सहा वाजण्याच्या सुमारास, विनय यांनी फेसबुकवर आपल्या पत्नीसोबतचा एक फोटो आणि व्हिडिओ शेअर केला होता. सोशल मीडियावर पत्नीसोबतचा फोटो शेअर करताना, त्यांनी "कभी गम ना देना खुशी देने वाले, मुझे प्यार की जिंदगी देने वाले," हे भावनिक गाणं त्यांनी या पोस्टसाठी निवडलं होतं. त्यांच्या पत्नीने 'करवा चौथ'चे व्रत ठेवले होते आणि त्या त्यांच्या घरी परतण्याची वाट पाहत होत्या. मात्र, त्यांच्यावर दु:खाचा डोंगर कोसळला आहे. विनय यांच्या पश्चात पत्नी आणि दोन मुले असा परिवार आहे.  

कठडा तोडला आणि नदीत कोसळली फॉर्च्युनर

मिळालेल्या माहितीनुसार, विनय हे सकाळी डगरुआ ब्लॉकमधील कोचाईली या आपल्या मूळ गावी गेले होते. तिथून ते प्रभात कॉलनीतील आपल्या घरी परतत असताना हा अपघात घडला. त्यांची फॉर्च्युनर कार 'लाईन बाजार' परिसरातील 'कॅप्टन ब्रिज'वरून जात असताना त्यांचे गाडीवरील नियंत्रण सुटले. त्यांची एसयूव्ही (SUV) कार पुलाचा लोखंडी आणि काँक्रीटचा सुरक्षा कठडा तोडून थेट सौरा नदीत जाऊन पडली. अपघातादरम्यान झालेल्या धडकेमुळे झालेला मोठा आवाज ऐकून परिसरातील नागरिक घटनास्थळी जमा झाले आणि त्यांनी तातडीने प्रशासनाला याची माहिती दिली. अपघाताची माहिती मिळाल्यानंतर वरिष्ठ अधिकाऱ्यांसह पोलिस कर्मचारी आणि स्थानिक पाणबुडे घटनास्थळी पोहोचले. नदीतून वाहन बाहेर काढण्यासाठी एका क्रेनची मदत घेण्यात आली.

कारमध्ये सापडला मृतदेह

अथक प्रयत्नांनंतर 'फॉर्च्युनर' कार पाण्यातून बाहेर काढण्यात आली. गाडीच्या आत विनय यांचा मृतदेह सापडला. त्यांना तातडीने पूर्णिया येथील शासकीय वैद्यकीय महाविद्यालय आणि रुग्णालयात नेण्यात आले. रुग्णालयाच्या आपत्कालीन विभागातील डॉक्टरांनी तपासणी केल्यानंतर विनय यांना मृत घोषित केले. अपघात झाला तेव्हा कारमध्ये फक्त विनय होते, अशी माहिती डीएसपी अभिनव पराशर यांनी दिली आहे. विनय यांना रुग्णालयात मृत घोषित करण्यात आल्याचंही पराशर यांनी सांगितलं. एसयूव्हीवरील नियंत्रण सुटण्यामागची नेमकी कारणे काय होती, याचा तपास सुरू आहे.

माजी खासदार रुग्णालयात पोहोचले

अपघाताची माहिती मिळताच, विनय यांच्या जवळचे मानले जाणारे माजी खासदार संतोष कुशवाह यांनी जीएमसीएच रुग्णालय गाठले. त्यांनी कुटुंबाची भेट घेऊन त्यांचं सांत्वन केले. कुशवाह यांनी विनय यांचा उल्लेख करताना, "तो माझ्या कुटुंबातील सदस्यासारखा होता. त्याचं असं अचानक जाणं हे माझ्यासाठी आणि समाजासाठीही कधीही न भरुन येण्यासाठी हानी करणारं आहे," असं म्हटलं.