सिंहाचा बाईकवरुन पाठलाग करणाऱ्या वनविभागाच्या कर्मचाऱ्यांना घडली जन्माची अद्दल, पाहा VIDEO
गुजरातच्या अंबार्डी सफारी पार्कमध्ये वनविभागाचे कर्मचारी दुचाकी आणि बोलेरो एसयूव्हीवरून एका सिंहाचा पाठलाग करतानाचा व्हिडीओ सोशल मीडियावर व्हायरल झाला आहे.
गुजरातच्या अंबार्डी सफारी पार्कमधील एक धक्कादायक व्हिडीओ सध्या सोशल मीडियावर चर्चेचा विषय ठरत आहे. यामध्ये बाईकस्वार आणि एक बोलेरो गाडी कोणतीही भीती न बाळगता सिंहाच्या भोवती फिरत असून त्याचा पाठलाग करताना दिसत आहेत. सिंहाला अशाप्रकारे त्रास दिला जात असल्याने अनेकांनी नाराजी व्यक्त करत प्रश्नही विचारले. दरम्यान वन विभागाने स्पष्ट केले आहे की, सिंहाला त्याच्या परिसरात परत नेले जात होते. मात्र, या प्रक्रियेदरम्यान लागू केलेल्या नियमावलीचे पालन केले गेले नाही. परिणामी, तीन कंत्राटी कर्मचाऱ्यांना बडतर्फ करण्यात आले आहे.
या छोट्या व्हिडीओत वनविभागाचे तीन कर्मचारी दुचाकीवरून सिंहाच्या सोबत जाताना दिसत आहेत, तर एक बोलेरो एसयूव्ही (SUV) देखील त्याच्या मागे जात असल्याचे दिसून येत आहे. या व्हिडीओमुळे वन्यजीव प्रेमी आणि सिंहप्रेमी चिंता व्यक्त करु लागले होते. सिंहाचा अशाप्रकारे पाठलाग का केला जात होता, असा प्रश्न अनेकांनी उपस्थित केला आहे. या घटनेमुळे वनविभागाच्या कर्मचाऱ्यांच्या वर्तनावरही प्रश्नचिन्ह उपस्थित झाले आहे. सफारी पार्कमध्ये खासगी वाहनांना प्रवेश मिळणे निषिद्ध असतानाही कर्मचारी नियम डावलत होते का? अशी विचारणाही करण्यात आली.
व्हिडीओवरुन टीका होत असताना वन विभागाने स्पष्टीकरण दिले आहे. गिर पूर्व वन विभागाचे सहाय्यक वनसंरक्षक (ACF) अमित वानिया यांनी सांगितले की, कर्मचारी सिंहाला त्रास देण्याचा प्रयत्न करत नव्हते, तर त्याला त्याच्या ठरलेल्या बंदिस्त जागेकडे नेण्याचा प्रयत्न करत होते. या जागेला क्राल (Kraal) असे म्हणतात.
दिवाळीच्या सुट्ट्यांमध्ये अंबाडी सफारी पार्कमध्ये पर्यटकांची मोठी गर्दी होती. संध्याकाळी सफारी संपल्यानंतर, सिंहांनी त्यांच्या 'क्राल'मध्ये परतणे अपेक्षित होते. मात्र, त्यापैकी एक सिंह ठरलेल्या जागेकडे जाण्याऐवजी दुसऱ्याच दिशेने जाऊ लागला.
सिंहाला थांबवण्याच्या हेतूने आणि त्याला पुन्हा त्याच्या बंदिस्त जागेकडे (क्रालकडे) परत नेण्यासाठी कर्मचाऱ्यांनी हस्तक्षेप केला. वन विभागाच्या म्हणण्यानुसार, सिंहाला त्रास दिला गेल्याची कोणतीही कृती आढळली नाही. कर्मचारी केवळ आपली कर्तव्ये पार पाडत होते, जेणेकरून सिंह पुन्हा त्याच्या निर्धारित क्षेत्रात परत जाऊ शकेल.
तरीही, वन विभागाने संबंधित कर्मचाऱ्यांना कारणे दाखवा नोटीस बजावली असून, या घटनेच्या पुढील चौकशीचा भाग म्हणून त्यांच्याकडून स्पष्टीकरण मागितले आहे. तसंच प्रोटोकॉलचे पालन केले गेले नाही, तीन कर्मचाऱ्यांना काढून टाकण्यात आले आहे.
कर्मचाऱ्यांना काढून टाकलं
पीसीसीएफ जयपाल सिंग यांनी सांगितले की, व्हिडिओमध्ये दिसलेले तिन्ही कर्मचारी कंत्राटी कर्मचारी होते आणि त्यांना काढण्यात आले आहे. ते म्हणाले की, सिंहांना त्यांच्या नेमून दिलेल्या क्षेत्रात परत आणण्यासाठी एक ठरलेली कार्यपद्धती आहे, ज्याचे या प्रकरणात पालन केले गेले नाही. पीसीसीएफच्या म्हणण्यानुसार, सिंहांना सहसा बंद जीपमधून त्यांच्या परिसरात नेले जाते. या प्रकरणात, कार्यपद्धतीचे पालन न केल्यामुळे ही कारवाई करण्यात आली आहे.