कोण आहेत निधी राजदान? CM ओमर अब्दुल्लांच्या ‘नव्या प्रवासा’च्या पोस्टने आल्या चर्चेत!

कोण आहेत निधी राजदान? CM ओमर अब्दुल्लांच्या ‘नव्या प्रवासा’च्या पोस्टने आल्या चर्चेत!

जम्मू-काश्मीरचे मुख्यमंत्री उमर अब्दुल्ला आणि ज्येष्ठ पत्रकार निधी राजदान यांच्या वैयक्तिक आयुष्याची सध्या सोशल मीडियावर जोरदार चर्चा सुरू आहे. दोघांनीही एकमेकांसोबतचे फोटो सोशल मीडियावर शेअर केले. उमर अब्दुल्ला यांनी ‘कालपासून एका नव्या प्रवासाची सुरुवात झाली’ असा संदेश दिला, तर निधी राजदान यांनी 'इट्स डन ब्रो' असे लिहिले. या पोस्टनंतर दोघांचा साखरपुडा झाल्याची चर्चा सुरू झाली आहे. नेमके काय घडले आणि या घटनेची पार्श्वभूमी काय, जाणून घेऊया.

निधी राजदान यांचीही प्रतिक्रिया

निधी राजदान यांनीही उमर अब्दुल्ला यांच्यासोबतचे फोटो शेअर केले. इट्स डन ब्रो असा छोटा संदेश आणि अंगठीचा इमोजी त्यांनी पोस्ट केला. दोघांच्या पोस्टमधील समान संकेतांमुळे सोशल मीडियावर चर्चेला उधाण आले.

30 ऑक्टोबरला पार पडला सोहळा?

उमर अब्दुल्ला यांचा साखरपुडा झाल्याचे म्हटले जात आहे. दोघांनी फोटो शेअर केले असले तरी सोहळ्याचे ठिकाण, उपस्थित पाहुणे आणि इतर तपशील दोघांनीही जाहीर केलेले नाहीत.

निधी राजदान कोण आहेत?

निधी राजदान या देशातील परिचित पत्रकार आणि वृत्तनिवेदिका आहेत. त्यांनी खासगी वृत्तवाहिनी दीर्घकाळ काम केले असून राजकीय, राष्ट्रीय आणि आंतरराष्ट्रीय घडामोडींवरील वार्तांकनासाठी त्या ओळखल्या जातात. पत्रकारितेतील त्यांच्या कारकिर्दीमुळे या घडामोडीला विशेष लक्ष मिळत आहे.

दोघांच्या नात्याची चर्चा आधीपासून

उमर अब्दुल्ला आणि निधी राजदान यांच्याबाबत यापूर्वीही चर्चा झाली होती. ऑक्टोबर 2024 मध्ये उमर अब्दुल्ला यांनी मुख्यमंत्रीपदाची शपथ घेतली, त्यावेळी निधी राजदान कार्यक्रमाला उपस्थित होत्या. त्यानंतरही दोघांचे एकत्रित फोटो आणि सार्वजनिक कार्यक्रमांतील उपस्थिती चर्चेत राहिली.

पायल अब्दुल्ला यांच्याशी जुलैमध्ये घटस्फोट

उमर अब्दुल्ला यांचे यापूर्वी पायल अब्दुल्ला यांच्याशी लग्न झाले होते. 1 सप्टेंबर 1994 रोजी त्यांचा विवाह झाला होता. दोघे अनेक वर्षांपासून वेगळे राहत होते. 31 जुलै 2026 रोजी सर्वोच्च न्यायालयाने परस्पर संमतीने त्यांचा विवाह संपुष्टात आणण्याचा आदेश दिला.

दोन मुलांचे वडील आहेत उमर अब्दुल्ला

उमर अब्दुल्ला आणि पायल अब्दुल्ला यांना दोन मुलगे आहेत. घटस्फोटाच्या प्रक्रियेदरम्यान दोन्ही पक्षांनी परस्परांमधील वाद मिटवून प्रलंबित खटले मागे घेण्यास सहमती दर्शवली होती. सर्वोच्च न्यायालयाच्या आदेशात या समझोत्याची नोंद आहे.

लग्न की साखरपुडा?

उमर अब्दुल्ला आणि निधी राजदान यांच्या पोस्टमुळे त्यांच्या नात्याबाबत महत्त्वाची माहिती समोर आली आहे. असे असले तरी पोस्टमध्ये लग्न झाल्याची स्पष्ट घोषणा करण्यात आलेली नाही. त्यामुळे सोशल मीडियामध्ये चर्चेला उधाण आलंय.