बोहल्यावर चढायला वर्षाअखेर 'इतके'च दिवस शुभ, तारीख चुकली तर थेट 2027

उत्साहात साखरपुडा उरकला आणि आता डोक्यात थेट लग्नाचे वेध लागलेत? दोन-तीन महिन्यांत छानसा हॉल बुक करू आणि थंडीच्या दिवसांत वाजवू सनई-चौघडे असा प्लॅन करून अनेक कुटुंबं लग्नाच्या तयारीत गुंतली आहेत. पण थांबा! जर तुम्ही वर्षाअखेर लग्न उरकण्याचा विचार करत असाल, तर पंचांगातील गणित ऐकून तुम्हाला मोठा धक्का बसू शकतो. कारण साखरपुडा जरी झटपट झाला असला, तरी बोहल्यावर चढण्यासाठी मात्र प्रचंड मोठी कसरत करावी लागणार आहे.  सध्या चातुर्मास सुरू असल्यानं सर्व प्रकारच्या शुभ कार्यांना आणि लग्नसोहळ्यांना ब्रेक लागला आहे. ऑक्टोबर महिना तर तोंडावर आलाय, पण या संपूर्ण ऑक्टोबर महिन्यात लग्नाचा एकही शुभ मुहूर्त उपलब्ध नाही. त्यामुळं ज्यांना वाटत होते की साखरपुड्यानंतर लगेच पुढच्या महिन्यात लगीनघाई सुरू करता येईल, त्यांच्या पदरी पूर्ण निराशा पडणार आहे.

पंचांगानुसार, 20 नोव्हेंबर 2026 रोजी 'देवउठणी एकादशी' (प्रबोधिनी एकादशी) आहे. या दिवशी भगवान विष्णू चार महिन्यांच्या योगनिद्रेतून जागे होतात आणि तुळशी विवाहाची सुरुवात होऊन विवाह मुहूर्तांचे दार उघडते. म्हणजेच, 20 नोव्हेंबरपूर्वी महाराष्ट्रात किंवा देशात कुठेही शास्त्रोक्त पद्धतीनं लग्नाची गाठ बांधता येणार नाही.20 नोव्हेंबरला देव जागे झाल्यानंतर नोव्हेंबर महिन्यात लग्न करण्यासाठी हातात उरतात अवघे 10 दिवस! या 10 दिवसांमध्ये पंचांगाने लग्नासाठी केवळ 4 शुभ मुहूर्त दिले आहेत (उदा. 21, 24,25 नोव्हेंबर आणि आणखी एक तारीख). एकाच वेळी लाखो इच्छुक आणि मुहूर्त फक्त चार; त्यामुळे या चार दिवसांसाठी आत्तापासूनच मॅरेज हॉल, लॉन्स आणि भटजींचे बुकिंग मिळणे कठीण आहे.

नोव्हेंबर संपल्यानंतर वर्ष संपायला फक्त डिसेंबर महिना शिल्लक राहतो. या डिसेंबर महिन्यात विवाहाचे केवळ 7 शुभ मुहूर्त उपलब्ध आहेत. नोव्हेंबर आणि डिसेंबरचे मिळून मोजले तरी परिस्थिती इतकी बिकट आहे की, एकाच मुहूर्तावर एकाच हॉलमध्ये दोन-दोन शिफ्टमध्ये लग्न लावण्याची वेळ केटरर्स आणि व्यवस्थापकांवर येईल; परिणामी हॉलचे भाडे दुपटीने वाढले आहे. दरवर्षी साधारणपणे 80 ते 100 लग्न मुहूर्त असतात, पण 2026 या संपूर्ण वर्षात केवळ 59 च मुहूर्त मिळाले. मे-जूनमध्ये आलेला 'ज्येष्ठ अधिक मास', त्यानंतरचा प्रदीर्घ चातुर्मास आणि वर्षाच्या सुरुवातीला झालेला शुक्राचा अस्त यामुळे शेकडो तारखा पंचांगातून बाद झाल्या. त्यामुळेच वर्षाच्या शेवटी लग्न करू पाहणाऱ्यांची मोठी कोंडी झाली आहे.

2026 संपण्यापूर्वी वर्षभरात आता फक्त 11 लग्न मुहूर्त शिल्लक आहेत; जर या 11 दिवसांत हॉल किंवा तारीख मिळाली नाही, तर थेट 2027 चीच वाट पाहावी लागेल! मात्र दिलासादायक बाब म्हणजे, 2026 मधील ही 11 दिवसांची घाई आणि चढ्या भावातील बुकिंग टाळल्यास, 2027 च्या सुरुवातीला तब्बल 96 हून अधिक मुहूर्त आहेत.