‘ना बॅटिंग येत, ना बॉलिंग’, 'ओढून ताणून तो अष्टपैलू' म्हणत माजी कॅप्टनची 'या' खेळाडूवर टीका; 2027 वर्ल्डकपसाठी अयोग्य असल्याचा शेरा
2027 चा वर्ल्डकप हा रोहित शर्मा आणि विराट कोहली या दोघांसाठी शेवटचा वर्ल्डकप ठरणार आहे. असं असतानाच हा वर्ल्डकप जिंकण्यासाठी संघ बांधणी सुरु असतानाच त्यावरुन कठोर शब्दांमध्ये माजी कर्णधाराने सुनावलं आहे. त्याचा नेमका आक्षेप काय आहे पाहूयात...
भारत आणि वेस्ट इंडिजदरम्यान नुकत्याच झालेल्या एकदिवसीय मालिकेमधील शेवटच्या सामन्यात भारताने पराभवाचं तोंड पहावं लागलं. विशेष म्हणजे या सामन्यात भारताने 350 हून अधिक धावांचं टार्गेट देऊनही वेस्ट इंडिजसारख्या संघाला रोखण्यात भारतीय गोलंदाजांना अपयश आल्याने सर्वच स्तरातून आश्चर्य व्यक्त होत आहे. भारताने ही मालिका 2-1 ने जिंकली असली तरी शेवटचा पराभव अनेकांच्या जिव्हारी लागला आहे. 2027 चा वर्ल्डकप जिंकणाऱ्याची स्वप्न पाहणाऱ्या भारताला परफेक्ट संघ सापडलेला नसून संघात अष्टपैलू खेळाडूचीही कमतरता जाणवतेय. याच मुद्द्यावरुन सध्या भारतीय संघ व्यवस्थापनाकडून अष्टपैलू खेळाडूसाठी जे प्रयोग केले जात आहेत ते पाहता उगाच एका खेळाडूला ओढून ताणून तो अष्टपैलू असल्याचं भासवलं जात असल्याचा गंभीर आरोप एका माजी कर्णधाराने केला असून संघ व्यवस्थापनावर टीकास्र सोडलंय.
कोणी आणि कोणावर केलीये टीका?
दुखापतीमुळे हार्दिक पांड्या हा अनिश्चित काळापासून मैदानापासून दूर असताना वेस्ट इंडिजविरुद्धच्या मालिकेमध्ये नितीश रेड्डीला संधी देण्यात आलेली. मात्र त्याची कामगिरी पाहून भारतीय संघाचे माजी कर्णधार कृष्णम्माचारी श्रीकांत चांगलेच संतापलेत. शेवटच्या सामन्यात भारताचा पराभव झाल्यानंतर कृष्णम्माचारी श्रीकांत यांनी, नितीश रेड्डीला संघात स्थान देण्यावरुनच प्रश्न उपस्थित केलाय. नितीश कुमार रेड्डीला ओढून ताणून अष्टपैलू खेळाडू असल्याचं दाखवण्याचा प्रयत्न केला जातोय असं कृष्णम्माचारी श्रीकांत यांनी म्हटलं आहे.
ना बॅटींग धड ना बॉलिंग
एकदिवसीय मालिकेत वेस्ट इंडिजविरुद्धच्या अंतिम सामन्यामध्ये नितीश रेड्डीने ज्या पद्धतीने सुमार खेळ केला, त्यावर बोट ठेवताना कृष्णम्माचारी श्रीकांत यांनी, त्याला ना बॅटिंग येत, ना बॉलिंग जमत, असं म्हटलंय. नितीश रेड्डी हा 23 वर्षीय तरुण खेळाडू अगदीच क्लूलेस वाटत होता. त्याने 16 चेंडूंमध्ये 9 धावा केल्या. गोलंदाजी करताना त्याने 6.5 ओव्हरमध्ये 50 धावा देत एकही विकेट घेतली नाही. यावरुनच टीका करताना कृष्णम्माचारी श्रीकांत यांनी, "एकदा का चेंडू अधिक उसळी घेऊ लागला की नितीश रेड्डी गोंधळायला लागतो. त्याला फलंदाज चोपत असतानाही तो तसेच चेंडू टाकत राहतो. ते सर्वजण त्याला अष्टपैलू खेळाडू म्हणून दाखवण्याचा प्रयत्न करत आहेत. हे भारतीय संघासाठी चांगले संकेत नाहीत. उसळी घेणाऱ्या खेळपट्टीवर त्याच्या फलंदाजीबद्दलही शंका येते," असं स्पष्टपणे म्हटलं आहे.
अनेकदा संधी दिली तरी...
नितीश रेड्डीला हार्दिकची रिप्लेसमेंट म्हणून अनेकदा संधी दिली जात आहे. मागील काही सामन्यामध्ये नितीशला बऱ्याचा अंतीम 11 खेळाडूंमध्ये म्हणजेच प्लेइंग इलेव्हमध्ये संधी देण्यात आली आहे. मात्र आठ एकदिवसीय सामन्यांमध्ये केवळ 3 विकेट्स मिळाल्या असून त्याने 91.33 च्या सरासरीने धावा दिल्या. त्याने फलंदाजीमध्येही 27.25 च्या सरासरीने पाच डावांमध्ये धावा केल्या आहेत.
