महिना ₹9 लाख पगार, उत्तम लाइफस्टाइल अन्... 'या' देशांत भारतीयांना प्रचंड डिमांड; इथं नोकरी मिळवण्यासाठी काय करायचं? A To Z माहिती

तुम्हीसुद्धा परदेशात जाऊन नोकरी करण्याचा विचार करत असाल तर सध्या सुरु असलेला काळ हा सर्वोत्तम आहे. कारण भारतीयांना सध्या जगातील अनेक देशामधून मागणी असून या मोबदल्यात उत्तम पगारही दिला जातोय. भारतीयांसाठी जगातील कोणत्या देशांमध्ये कोणत्या क्षेत्रात नोकऱ्या उपलब्ध आहेत? नक्की या नोकऱ्यांसाठी किती पगार मिळू शकतो यावरच नजर टाकूयात....

कोणत्या देशांमध्ये भारतीयांना नोकरीची संधी?

परदेशात नोकरीचं स्वप्न पाहणाऱ्या भारतीयांसाठी यंदाच्या वर्षी जर्मनी, संयुक्त अरब अमिराती, जपान, सौदी अरेबिया, ब्रिटन, कॅनडा, ऑस्ट्रेलिया, आयर्लंड, सिंगापूर आणि फिनलंडमध्ये नोकरीची संधी मिळू शकते. या देशांमध्ये वेगवेगळ्या क्षेत्रातील कामांसाठी कुशल भारतीयांची गरज आहे. सदर देशांमध्ये प्रामुख्याने माहिती तंत्रज्ञान, आरोग्य, अभियांत्रिकी, बांधकाम व वित्त क्षेत्रात नोकरीच्या उत्तम संधी उपलब्ध आहेत.

कोणत्या देशात कोणत्या क्षेत्राला मागणी?

जगातील सर्वात प्रगत अर्थव्यवस्थांपैकी एक असलेला देश अशी ओळख असलेल्या जर्मनीमध्ये भारतीयांसाठी नोकरीच्या उत्तम संधी आहेत. जर्मनीमध्ये माहिती-तंत्रज्ञान, सॉफ्टवेअर, वाहन अभियांत्रिकी, यांत्रिक अभियांत्रिकी, आरोग्यसेवा आणि हरित ऊर्जा क्षेत्रात रोजगाराच्या संधी आहेत. इथं नोकरी करण्याची इच्छा असलेल्या भारतीयांसाठी 'ईयू ब्लू कार्ड' आणि 'ऑपॉच्र्युनिटी कार्ड' हे महत्त्वाचे आहेत.

आखाती देशांमध्ये आणि प्रामुख्याने संयुक्त अरब अमिरातीमध्ये तंत्रज्ञान, बांधकाम, वित्त, हॉटेल व्यवसाय आणि व्यवस्थापन क्षेत्रात भारतीयांची मागणी आहे. त्याचबरोबर सौदी अरेबियात मोठ्या पायाभूत सुविधा प्रकल्पांमुळे रोजगाराच्या संधी वाढल्या आहेत. बांधकाम, सायबर सुरक्षा, आरोग्यसेवा, पेट्रोकेमिकल आणि वाहतूक क्षेत्रात नोकऱ्या आहेत. जपानमध्ये वृद्ध लोकसंख्येमुळे कुशल कर्मचाऱ्यांची गरज असून तंत्रज्ञान, सॉफ्टवेअर, कृत्रिम बुद्धिमत्ता, रोबोटिक्स, अर्थसंवाहक आणि यांत्रिक अभियांत्रिकी क्षेत्रात संधी आहेत. तर ब्रिटनमध्ये आरोग्यसेवा क्षेत्रात मोठ्या संधी उपलब्ध आहेत. ब्रिटनमध्ये डॉक्टर, परिचारिका, तंत्रज्ञान, सायबर सुरक्षा आणि माहिती विश्लेषण क्षेत्रात संधी आहेत. आरोग्यसेवा क्षेत्रासाठी आरोग्य व काळजी कामगार व्हिसा हा महत्त्वाचा मार्ग आहे.

कोणत्या देशात, कुठल्या क्षेत्रात साधारण किती पगार मिळतो...

जर्मनीमध्ये तंत्रज्ञान, अभियांत्रिकी, आरोग्य नोकरी करणाऱ्या भारतीयांना प्रती महिना 3.80 लाख रुपये ते 6.50 लाख रुपये पगार मिळू शकतो. तसेच संयुक्त अरब अमिराती म्हणजेच युएईमध्ये तंत्रज्ञान, बांधकाम, वित्त क्षेत्रातील नोकरीसाठी दर महिना 1.15 लाख ते 6.80 लाख रुपये पगाराच्या नोकऱ्या आहेत. जपानसारख्या प्रगत देशामध्ये तंत्रज्ञान, रोबोटिक्स, अभियांत्रिकी क्षेत्रात प्रती महिना 2.30 लाख रुपये ते 4.20 लाख रुपये पगार भारतीयांना मिळू शकतो.  सौदी अरेबियामध्ये बांधकाम, सायबर सुरक्षा, आरोग्य क्षेत्रात 1.30 लाख रुपये प्रती महिना ते 6.20 लाख रुपये पगार मिळतो. ब्रिटनमध्ये 3.10 लाख ते 6.70 लाख रुपये महिना पगार आरोग्य, तंत्रज्ञान क्षेत्रात काम करणाऱ्या भारतीय कर्मचाऱ्यांना मिळू शकतो.

कॅनडासारख्या भारतीयांची संख्या मोठी असलेल्या देशामध्ये आरोग्य, तंत्रज्ञान, कुशल व्यवसाय क्षेत्रात महिना 3.30 लाख ते 5.60 लाख रुपये पगार मिळू शकतो. ऑस्ट्रेलियामध्ये प्रती महिना, 3.50 लाख ते 6.10 लाख रुपये पगार देणाऱ्या क्षेत्रांचा विचार केला तर बांधकाम, अभियांत्रिकी, आरोग्यविषयक क्षेत्रांचा पर्याय उपलब्ध आहे.  आयर्लंडमध्ये दर महिना 3.50 लाख ते 6.30 लाख रुपये पगाराच्या नोकऱ्या तंत्रज्ञान, औषधनिर्मिती क्षेत्रात उपलब्ध आहेत. सिंगापूरमध्ये 3.80 लाख रुपये ते तब्बल 9 लाख प्रती महिना पगाराच्या नोकऱ्या वित्त, कृत्रिम बुद्धिमत्ता क्षेत्रात उपलब्ध आहेत. तंत्रज्ञान, आरोग्य, स्वच्छ ऊर्जा क्षेत्रामध्ये फिनलंडमध्ये काम करणाऱ्या व्यक्तीला दर महिना 2.50 लाख ते 4.40 लाख रुपये पगार मिळू शकतो. क्षेत्राची आणि देशाची निवड करताना व्हिसा, पात्रता, भाषा, कर आणि राहणीमानाचा खर्चही लक्षात घेणे आवश्यक, संबंधित देशांमधील नियमांनुसार पात्रता बदलू शकते.

परदेशात नोकरी मिळवण्यासाठी काय करावं लागेल?

परदेशात नोकरी मिळवण्यासाठी वर नमूद केलेल्या आणि त्या त्या देशांमध्ये मागणी असलेल्या क्षेत्रातील शैक्षणिक पात्रता, कौशल्य आणि कामाचा अनुभव मिळवणं फायद्याचं ठरु शकतं.  जर्मन आणि जपानी भाषेचे ज्ञान रोजगाराच्या संधी वाढविण्यास त्या त्या देशांमध्ये वास्तव्याच्या दृष्टीने उपयुक्त ठरू शकते. ठराविक देशांमधील नोकरीसाठी अर्ज करताना त्या देशातील सरकारी खात्यांची अधिकृत वेबसाईट्स तपासत राहा. नोकरी शोधताना सरकारमान्य माध्यमांचाच वापर करा. परदेशात नोकरी मिळवून देण्याच्या नावाखाली पैसे घेणाऱ्या संस्थांची संख्या बरीच आहे. त्यामुळे सावध राहणं गरजेचं आहे. कागदपत्रे, शुल्क देण्यापूर्वी संस्थेची विश्वासार्हता निश्चित तपासून पाहा. संस्थेची नोंदणी आणि अधिकृत मान्यता तपासून पुढील निर्णय घ्या.