महिना ₹1 लाख 60 हजार पगार, राहण्यासाठी रुम अन्... IIT मुंबईमध्ये नोकरीची सुवर्णसंधी; जाणून घ्या अर्ज करायची शेवटची तारीख, पात्रतेसहीत इतर तपशील

मुंबईतील मोक्याच्या ठिकाणी असलेल्या पवईमधील आयआयटी मुंबईच्या कॅम्पसमध्ये नोकरीची सुवर्णसंधी उपलब्ध असून यासंदर्भातील माहिती आयआयटी प्रशासनानेच जारी केली आहे. या ठिकाणी 30 पदं भरली जाणार आहेत. जाणून घ्या यासंदर्भातील सविस्तर तपशील...

Reported BySwapnil Ghangale

Published: Oct 12, 2026, 01:45 PM IST|Updated: Oct 12, 2026, 01:58 PM IST

join share

महिना ₹1 लाख 60 हजार पगार, राहण्यासाठी रुम अन्... IIT मुंबईमध्ये नोकरीची सुवर्णसंधी; जाणून घ्या अर्ज करायची शेवटची तारीख, पात्रतेसहीत इतर तपशील

Image Credit: आयआयटी प्रशासनानेच जारी केली माहिती (प्रातिनिधिक फोटो, सौजन्य रॉयटर्सवरुन साभार)

आयआयटी मुंबईने एक मोठा निर्णय घेतला आहे. मागील महिन्यामध्ये येथील विद्यार्थी साहिल वाकोडेने आत्महत्या केल्यानंतर विद्यार्थ्यांच्या मानसिक आरोग्यासाठी आयआयटी प्रशासन पुरेशी काळजी घेत नसल्याचे आरोप करण्यात आला. याच पार्श्वभूमीवर आता आयआयटी मुंबई प्रशासनाने विद्यार्थी कल्याण केंद्रामार्फत विद्यार्थ्यांच्या मानसिक आरोग्याला प्राधान्य देण्यासाठी समुपदेशकांच्या भरतीची प्रक्रिया सुरु केली आहे. विद्यार्थ्यांना भावनिक आणि मानसिक आधार देण्यासाठी समुपदेशकांची आयआयटी मुंबई नियुक्ती करण्यात येणार आहे. यामध्ये 26 समुपदेशक आणि चार वरिष्ठ समुपदेशकांचा समावेश असणार आहे. या भरतीसाठी 12 ते 18 ऑक्टोबरदरम्यान मुलाखती होणार आहेत.

उद्देश काय?

पदवी, पदव्युत्तर आणि पीएचडीचे शिक्षण घेणाऱ्या विद्यार्थ्यांचे भावनिक, मानसिक आणि एकूणच कल्याण साधणे, हा या केंद्राचा उद्देश आहे. विद्यार्थ्यांना समुपदेशनाची सुविधा उपलब्ध करून देण्याबरोबरच गरजेनुसार पुढील मदत आणि उपचारांसंदर्भतील सेवा देण्याची जबाबदारीही नव्याने नियुक्त होणाऱ्या समुपदेशकांवर असेल.

अनुभवी उमेदवारांना संधी

समुपदेशक पदासाठी मानसशास्वातील पदव्युत्तर पदवी आवश्यक असून, त्यामध्ये किमान 55 टक्के गुण मिळवलेले असणे बंधनकारक आहे. संबंधित पदवी मान्यताप्राप्त विद्यापीठ किंवा संस्थेची असावी. समुपदेशक पदासाठी पदव्युत्तर पदवीनंतर शैक्षणिक किंवा वैद्यकीय संस्थेतील किमान दोन वर्षांचा संबंधित अनुभव आवश्यक आहे. तर वरिष्ठ समुपदेशक पदासाठी किमान दहा वर्षांचा अनुभव असणे गरजेचे आहे.

मानधन किती?

पूर्णवेळ समुपदेशकांना अनुभवानुसार दरमहा 70 हजार ते एक लाख रुपये, तर वरिष्ठ समुपदेशकांना एक लाख 40 हजार ते एक लाख 60 हजार रुपये मानधन मिळणार आहे. अर्धवेळ कामासाठी समुपदेशकांना अनुक्रमे 35 ते 50 हजार रुपये तर वरिष्ठ समुपदेशकांना 70 ते 80 हजार रुपये मासिक मानधन निश्चित करण्यात आले आहे. निवड झालेल्या किमान दहा समुपदेशकांसाठी वसतिगृहात स्वतंत्र खोलीची सुविधाही उपलब्ध करून देण्याचे नियोजन आहे.

ऑनलाइन अर्जाची सुविधा

इच्छुका उमेदवारांना 17 ऑक्टोबरपर्यंत ऑनलाइन अर्ज करता येणार आहे. मुंबईतील उमेदवारांच्या प्रत्यक्ष मुलाखती आयआयटी मुंबईत घेतल्या जातील. मुंबईबाहेर राहणाऱ्या उमेदवारांना ऑनलाइन मुलाखतीची सुविधा असेल. निवड झालेल्या उमेदवारांना 17 नोव्हेंबरदरम्यान रुजू होता येणार आहे.

... या उमेदवारांना प्राधान्य

किशोरवयीन आणि तरुणांसोबत काम करण्याचा अनुभव, निवासी शैक्षणिक संस्थेतील कामाचा अनुभव तसेच संकटाच्या परिस्थितीमधील प्रकरणे हाताळण्याचे कौशल्य असलेल्या उमेदवारांना प्राधान्य दिले जाऊ शकते. इंग्रजी किंवा हिंदीव्यतिरिक्त भारतीय भाषांची जान असणाऱ्यांना उमेदवारांचाही निवड प्रक्रियेत विचार केला जाणार आहे. विविध भाषिक पार्श्वभूमीच्या विद्यार्थ्यांना समुपदेशनाची सुविधा मिळावी, यासाठी उमेदवारांची भाषिक विविधताही विचारात घेतली जाणार आहे.

Add Zee News as a Preferred Source

TAGS:

Mumbai

Mumbai News

Jobs News

About the Author

Swapnil Ghangale

मोजक्या शब्दांमध्ये...स्वप्निल घंगाळे हे मागील 12 वर्षांहून अधिक काळापासून डिजिटल पत्रकारितेमध्ये सक्रीय आहेत. 'महाराष्ट्र टाइम्स', 'लोकसत्ता' यासारख्या नामांकित कंपन्यांमध्ये त्यांनी यापूर्वी काम केलेलं आहे. राजकीय बातम्यांबरोबरच ताज्या घडामोडी, ट्रेण्डींग/ व्हायरल, टेक्नोलॉजी, क्रीडा, मनोरंजन अशा सर्वच क्षेत्रातील बातम्यांमध्ये हातखंडा आहे. अवांतर वाचनाबरोबरच बातम्यांव्यतिरिक्त सोशल मीडियावर लिहायची आवड आहे. फावल्या वेळात चित्रपट पाहणे, भटकंती करायला आवडतं. बातमी अचूक असावी असा त्यांचा कटाक्षाने प्रयत्न असतो. सध्या ते 'झी 24 तास'मध्ये 'डेप्युटी न्यूज एडिटर' म्हणून कार्यरत आहेत.पत्रकारितेचा श्रीगणेशास्वप्निल यांनी पत्रकारितेच्या दुसऱ्या वर्षापासूनच 'ठाणे वैभव' या ठाण्यातील स्थानिक वृत्तपत्रामध्ये शिकाऊ पत्रकार म्हणून कामाला सुरुवात केली. सांस्कृतिक आणि गुन्हेगारी यासंदर्भातील वृत्तांकन यांनी या सहा महिन्याच्या कालावधीमध्ये केलं. बीएमएमच्या तृतीय वर्षाला ठाण्यातील जोशी-बेडेकर महाविद्यालयातील 'ऋत' या पत्रकारिता विभागाच्या महाविद्यालयीन वृत्तपत्रासाठी स्वप्निल यांनी उपसंपादक म्हणून काम पाहिले.डिजिटलमध्ये एन्ट्री'महाराष्ट्र टाइम्स डॉट कॉम'च्या माध्यमातून पहिल्यांदा डिजिटल क्षेत्रामध्ये काम करणाऱ्या स्वप्निल यांनी सुरुवातीला सोशल मिडिया व्यवस्थापक म्हणून काम पाहिले. त्यानंतर हळूहळू ते डिजिटल वृत्तांकनाकडे वळले. त्यांनी 'महाराष्ट्र टाइम्स' वृत्तपत्रामध्येही माहिती-तंत्रज्ञान या विषयावर लेखन केलं. मुख्य पुरवणीसोबतच अनेकदा रविवार विशेष अंकांमध्येही त्यांचे लेख छापून आले आहेत. 'मुंबई टाइम्स' या पुरवणीअंतर्गत विद्यार्थ्यांच्या विश्वातील अनेक विषय त्यांनी कॉलेज क्लब रिपोर्ट्सच्या माध्यमातून हाताळले. कॉलेज क्लब रिपोर्टर्ससोबतच्या कामासोबतच त्यांनी 'मटा सन्मान', 'मटा श्रावण क्विन' यासारख्या कार्यक्रमांसाठी डिजिटल आणि प्रिंटदरम्यान संयोजक म्हणून काम पाहिलं. जवळपास पाच वर्ष ते मटामध्ये कार्यरत होते.प्रगल्भतेची आसमहाराष्ट्र टाइम्सनंतर तितक्याच तोलामोलाच्या 'लोकसत्ता'मध्ये स्वप्निल यांनी काम केलं. या ठिकाणीही ते पाच वर्ष कार्यरत होते. 'मटा'पासून सुरु झालेल्या प्रवासाला 'लोकसत्ता'मध्ये प्रगल्भता लाभली. राजकीय बातम्या, ताज्या घडामोडी, ट्रेडींग बातम्या याबरोबरच त्यांनी डिजिटल आणि प्रिंटमधील समन्वयाचं (इंटीग्रेशन) कामही त्यांनी लोकसत्तामध्ये केलं. 'लोकसत्ता'मधील 'व्हिवा' या पुरवणीमध्ये तरुणाईसंदर्भातील विषयांवर त्यांनी लेखन केलं. तसेच 'लोकप्रभा'च्या माध्यमातून त्यांनी माहिती-तंत्रज्ञान या विषयावर लिखाण केलं. लोकसत्ता डॉट कॉममध्ये स्वप्निल यांनी चार ते पाच सेक्शनसची जबाबदारी पार पाडली.तो सध्या काय करतो?'लोकसत्ता'नंतर स्वप्निल यांनी पहिल्यांदाच टीव्हीशी संलग्न वेबसाईटसाठी म्हणजेच 'झी 24 तास'च्या वेबसाईटसाठी काम करण्याचा निर्णय घेतला. या ठिकाणी ते ताज्या घडामोडींबरोबरच, राजकीय बातम्या, ब्रेकिंग बातम्या, ट्रेडिंग बातम्या हाताळतात. बातमीमधील अचूक माहिती, व्याकरण, उत्तम मथळे यासारख्या गोष्टींकडे त्यांचं कटाक्षाने लक्ष असतं. लिखाणबरोबरच मॅरेथॉन पळणं, वेगवेगळ्या ठिकाणी खादडीसाठी जाणं, पुस्तकांसोबतच अवांतर वाचन यासारख्या गोष्टींना ते प्राधान्य देतात.